Қазыналы қос бәйтерек
«Ауылыңда қартың болса, жазып қойған хатпен тең», «Қарты бар үйдің – қазынасы бар» деген аталы сөздердің мағынасына терең мән берсек, қазыналы қарттар береке мен бірліктің жарасым тапқан көрінісі деп білеміз.
Ел мүддесін бәрінен биік қоятын, өзінен кейінгі ізіне ерген інілеріне ізеттігін аямайтын, ізінен ерген ұрпағына ұлылығын ұялатып, бір қауымға бас-көз бола білген ауыл қарттарының орны ерекше.
Жалағаш ауылында жасына лайық ауызы дуалы, сөзі берекелі, ісі тыңғылықты ойы терең ақылы телегей теңіз болып келетін қарттарымыз бар. Сондай қарияларымыздың бірегейі келместің кемесіне мініп кетсе де, артында сөзі мен ісі, өнегелі өмірімен ұрпағына, еліне құрметті болған Кеген, Райымбек ауданының құрметті азаматы,құрметті ардагер Тоқтыманұлы Мұхтар мен асыл жары,батыр ана, «Алтын алқа» иегері,зейнеткер ұстаз Қайыпова Шаруан Омарқызының есімдерін мақтанышпен атауға болады.
Мұхтар атамыз 1942 жылы Кеген ауданы Тоғызбұлақ ауылында дүниеге келіп, өмірінің соңына дейін туған жерінде абыройлы қызмет атқарып, туған жеріне өлшеусіз қызмет атқарған азамат.Еңбек жолын «Тоғызбұлақ» колхозында колхозшы болып бастаған Мұхтар Тоқтыманұлы осы колхозда есепші, бас есепшінің орынбасары,бас экономист,бас үнемдеуші болып еңбегңн жалғастырды.
1980-1982 жылдары Шырғанақ ауылдық кеңесінің депутаты, 1982-1984 жылдары Алғабас ауылдық кеңесінің депутаты болды.
1983 жылы «Кеген ет-сүт» қауымдастығының бас есепшісі, 1983-1985 жылдары Алғабас қауымдастығының бас есепшісі,1985-1987 жылдары «Кеген аудандық өндірістік ауыл шаруашылығы басқармасы» бастығының экономика жөніндегі орынбасары, 1987-1989 жылдары «Жылысай» қауымдастығының бас есепшісі, 1989-1995 жылдары Тоғызбұлақ ұжымдық шаруашылығындағы басқарма бастығының орынбасары және бас есепші, 1996-1997 жылдары Кеген ауданы «Міндетті медициналық сақтандыру қорының» директоры, 1997-1998 жылдары Райымбек ауданы «Міндетті медициналық сақтандыру қорының» директоры қызметін атқарды.Абыройлы атқарған қызметтерінен кейін 2005 жылдан бастап құрметті зейнеткерлікке шықты.
Осындай елге, халыққа жасаған ізгілікті істерін, қызметін жоғары бағалаған Үкімет Мұхтар атамыздың еңбегін бағалап әр түрлі марапатпен марапаттап отырды.
Қазақстан Республикасының Тәуелсіздігіне 10 жылдығына байланысты Елбасының Алғыс хаты, «Қазақстан Республикасының Тәуелсіздігіне 25 жыл» мерекелік медалі, Қазақстан Республикасы «Ауыл шаруашылығы Ардагерлер кеңесі» қоғамдық бірлестігінің «Құрметті ардагері» төсбелгісімен марапатталды.
Өз заманының білгірі зейнеткерлікке шықса да ауылдық «Ақсақалдар алқасын» басқарып,ауыл тұрғындарының мәселесін шешуде де ауыл азаматтарымен бірге белсенділік танытып жүрді.
Отбасында сүйікті, қадірлі ата өзінің өмірлік тағылымдарын балаларына, немерелеріне көрсете білді.
Бала жанының бағбаны, ардақты ұстаз, аяулы әже, ақылшы ана отбасының ұйытқысы бола білген Шаруан Омарқызының өнегелі өмір жолы әркімге үлгі. 10 баланы дүниеге әкелген «Алтын алқа» иегері, көпбалалы ана. Мұғалім мамандығын алағаннан кейін Мұхтар атамыздың шаңырағына келін болып түсіп, енесіне сый-құрмет жасай білгені, иманды, салихалы, парасатты келін болғаны ел аузында. Еңбек жолын Жалағаш ауылындағы қазақ орта мектебінен қатардағы мұғалімнен бастап, тәжірибелі ұстаз болып абыройлы қызмет етіп, құрметті зейнеткерлік демалысқа шықты. Адамның ішкі жан дүниесінде бір нәрсе бар. Ол – адамның асыл ойы, адамгершілігі, айналасындағыларды жақсы көруі, оларға деген адалдығы, сүйіспеншілігі десек, осы қасиеттердің бәрі ұлағатты ұстаз Шаруан апамыздың бойына дарыған.
Ұстаздың еңбегі – өмір бойы бағаланатын, болашақ ұрпақтың жақсы азамат болып қалыптасуына негіз болатын маңызды және қасиетті жол. Шаруан Омарқызы да осы ұстаздық жолында біраз тер төгіп, қазір оқушыларының жемісін көріп отырған тұлғалардың бірі еді.Еткен еңбектің еленгені кімге де болса қуаныш, көңілге үлкен медет. Шаруан анамыз да «Білім беру ісінің үздігі» төсбелгісінің иегері.
Дүниеге келер бір рет,
Дария-кеуде,
Тау-мүсін,
Құрыштан құйған құдірет –
Қарттарым, аман-саумысың?-
деп ақын жырлағандай қазіргі таңда Мұхтар атамыз бен Шаруан апамыздың орны ойсырап, көңіліміз жабырқайды. Десек те «Орнында бар оңалар» демекші аллаға шүкір артында қалған үрім-бұтағы бар,тамырын тереңге жайған мәуелі бәйтерек отбасының көрер жарығы сөнбесін деп тілеймін. Ата-апамыздың жатқан жері пейіш, рухы нұрлана берсін деймін.
Айгүл Садырова,
Жалағаш ауылдық
округінің әкімі.
