ӨНЕРДІҢ ШОҒЫ ТҰТАНҒАН АУЫЛ
Әже деген сөз құлаққа да жағымды естілетін құдіретті ұғым. Ал немере үшін кез – келгеннің қолы жете бермейтін үлкен бақыт. Мойныңызға асылып тұрып «әже» деген асыл сөзді естіген сәтте – ақ күні бойы күйбең тірліктен бойыңыздағы шаршап – шалдыққаныңыз басылып, тамырыңыздағы қан атойлап жүгіріп, ерекше күйге бөленетініңіз шындық. Біздің ауыл екі таудың ішіне орналасқан, ортаны бөліп аққан өзені бар шағын ауыл еді. Ақ кимешек киген әжелер көп болатын. Бала күнімізде сол асыл жандарды көзімізбен көріп өстік. Ақ кимешекті әжелер отырып алып, жүн түтіп, ұршық иіріп, киіз басатын еді. Сол асыл жандардың бәрі бала біздерге, шебер қол болып көрінетін. Мен сөз еткелі отырған сондай әжелердің бірі де бірегейі Қарқара ауылының әжелері жайлы сөз қозғамақпын. Қарқара ауылындағы көп құбылыс құрылымдары өзгеріп, ауылға жаңа әкім, жаңа мәдениет үйі, жаңа дәрігерлік ғимараты бой көтерген көптеген өзгеріске куә болдық. Бұл қуанарлық жағдайды көзімізбен көріп, қолмызбен ұстап қайтқандай күй кештік.
Қарқара ауылындағы мәдениет үйі алдағы күндерде есігін айқара ашып, ішінде көптен бәсеңсіп қалған, өнердің шоғы қайта тұтанып маздайтынын байқадық. Есіме тоқырау жылдың есенгіреткен күндері барлығын ұмыттырып, салт – дәстүр, мәдени құндылықтардың су құрдымға кете жаздағанын, осы ауыл орталығында орналасқан зәулім еңселі, мәдениет үйі көз алдымызда тас талқаны шыққанын ауыл тұрғындары әлі ұмыта қоймаса керек. Қазіргі уақыт кемелденген сәулетті құрылыстар ауылымызда көбейіп, көркейгені кімді болсада қуантары анық. Енді жастарымыздың жігерленіп, жалындауы қажет. Барды жоқ жасап алмай жас өркен туған жері елі үшін еңбектенуі қажет. Қазіргі Қарқара кешегі Қарқара емес, өсіп өркен жайып ел экономикасына өз үлесін қосып келеді. Зейнет демалысына шықса да, намысын қолдан бермей өнердің дамуына үлесін тигізіп жүрген әжелеріміз аз емес. Ауылымызда ақ жаулықты аналардан құрылған «Айшуақ» әжелер ансамблі жұмыс жасайды,- дейді өнерді құрметтейтін жандардың бірі, аналар кеңесінің төрайымы Әлдібаева Күләйхан. «Айшуақ» әжелер ансамбілі мүшелері ауылдың алтын алқа иегері Үркінбева Оралхан анамызды, Сарыбаева Дина, Нұрғожаева Батима, Оразәлиева Сейсехан, Оразбаева Майра өнер десе өнеге бола білген асылдың сынықтары десек артық айтқандық емес.
Нұрболат
ТАСТАНҚҰЛОВ.
