Біз халықпен біргеміз! Шолпан Ілікқызымен сұхбат

1066

27 ақпан – Бүкіләлемдік үкіметтер емес ұйымдар күні. Алғаш рет Финляндия мемлекетінінің Хельсинки қаласында халықаралық деңгейде аталып өткен мейрам, осы күнге дейін жалғасын тауып, кең көлемде әрбір жылы күнтізбеден мейрам ретінде орын алды. Аталған мейрам қарсаңында осы сала бойынша қызмет көрсетіп, бүгін де халық алғсын арқалаған Жанбабаева Шолпан Ілікқызымен тілдесіп-сұхбаттастық. Назарларыңызға қойылған сұрақтар мен тұщымды жауаптарды ұсынамыз.

Сұрақ:
Үкіметтік емес ұйымдардың артықшылығы қандай?

Жауап: Бұл да адамзат үшін берілген үлкен мүмкіндік. Ең біріншіден, үкіметтік емес ұйымдар, тың идеяларды қолданысқа асырады. Сондай-ақ, халықпен етене араласып, ойларын жүзеге асыруға көмек қолын созады. Бұл дегеніміз, үкіметтік ұйымға қарсы шығуға емес, керісінше, бір мүдде бір мақсат барысында жұмыс атқарады деген сөз. Ауданымызда да үкіметтік емес ұйымдардың жұмысы мейлінше дамып, өркендеп келеді. Бұл, біз үшін зор қуаныш!

Сұрақ:

Сіздердің ұйымдарыңыздың аты және неше жыл жұмыс атқарып келесіз?

Жауап:

2005 жылдан бастау алған «Шолпан ресурстық орталығы» қоғамдық қоры. Орта және шағын бизнесті қолдау, қамқорлық, қайырымдылық іс-шараларды жүзеге асыру, мәдени кештерді ұйымдастыру, нашақорлық пен ащы суға қарсы іс-шаралар жүргізу, көпбалалы отбасылар мен жалғызбасты аналарға, жетімдерге көмектесу мақсатында құрылған ұйым бүгін де мақсатынан мүдірмей жұмыс атқаруда. Сондай-ақ, халық алғысы мен ақ батасын арқалап, ел үшін қызмет атқаруда.

«Денсаулық зор байлық» мүгедектер бірлестігі 2016 жылдан өз жұмысын атқаруда. Басты мақсат: мүгедектері біріктіріп, олардың өміріндегі шектеулерді жоюға, мүдделері мен құқықтарын қорғауға, оларды әлеуметтік жағынан оңалтуға және біріктіруге, еңбекке, мәдениет және спортқа қатыстыруға арналған шаралар мен бағдарламаларды қолдау және жүзеге асыру. Аталған мақсатымыз толығымен орындалып, Кеген ауылынан «Мүгедектерді оңалту орталығы» ашылып, бүгін де өз бағыты бойынша жұмыс атқаруда. Бұл да ел игілігі мен біздің бүлдіршіндерге арналған бастамаларымыздың бірі.

Сұрақ:

Алдағы уақытта ҮЕҰ-дың жұмысы жалғасын таба ма?

Жауап:

Міндетті түрде біздің ұйымдар жұмысын жандандырып, халқының асыл армандарын жүзеге асыру барысында, «бір жағадан бас, бір жеңнен қол» шығарып, «бірлік түбі – береке» екенін естен шығармай, мақсат-мұратынан таймай қызмет атқарады. Біз, біргеміз!

Сұхбатыңызға рахмет!

Сұхбаттасқан: Әділет Чукенов