Қазақ аналары: кеше, бүгін, ертең…

Халқымыз: «Қыз өссе-елдің көркі», «Ана бір қолымен бесікті, екінші қолымен әлемді тербетеді»- дейді. Демек, әйел бақытының, әйел тәрбиесінің, салиқалы әйелдің саналы ғұмырының-ұлт болашағына, тіпті әлем болашағының баянды болуына тигізер үлесі орасан зор.
Осыған орай, Тасашы ауылдық Мәдениет үйінде Кеген аудандық Жастар ресурстық орталығы, Тасашы ауылдық округінің аналар кеңесі мүшелерінің ұйымдастыруымен «Қазақ аналары: кеше, бүгін, ертең» атты тақырыпта аудандық семинар өтті. Іс-шараның мақсаты: кешегі қазақ әйелінің даналығы арқылы қазіргі заман әйелінің, анасының, әжесінің бейнесін ашып, болашақ қазақ әйелінің болмысын қалыптастыруға серпін беру, қазақ қыз-келіншектерін білімге, қоғамдық өмірге бағыттау және психология, тұлғалық даму, бала тәрбиесі бойынша кеңінен талқылау.
Айтулы шараға аудандық аналар кеңесінің төрайымы Бақытгүл Көнеева, Алматы облысы жастар ресурстық орталығының психолог маманы Меруерт Рысбекова, Алматы облысы жастар ресурстық орталығының ұйымдастыру бөлімінің маманы Әкежан Қабдолдаев, аудандық жастар ресурстық орталығының психолог маманы Гүлназ Толонқызы, ауыл әкімі Ерболат Төребаев, ауылдық округтердегі аналар кеңесінің төрайымдарымен ауыл тұрғындары қатысты.
Қонақтарды «Ару Ана» әжелер тобы шашумен қарсы алып, қазақ дәстүрінен сыр шертетін арнайы көрмені ұлағатты ұстаз Сара Қасымханова таныстырып, аралап көрсетті.
Алғашқы кіріспе сөз алған Тасашы ауылдық округінің аналар кеңесінің төрайымы Сара Қасымханова:
– Бүгінгі әйел мәртебесі, кешегі аналарымыздың мәртебесінен өзгеше. Бүгінгі әйел отбасының ұйытқысы ғана емес, қоғамның дамуына белсенді үлес қосып, Қазақстанның жарқын болашағын құруға барын салатын, жан- жақты әйел. Дәстүрлі қазақ қоғамындағы әйел мәртебесінің биіктігі ең алдымен әйелдердің құрметтелуінен, екіншіден құқық берілуінен, үшіншіден қорғалуынан танылады. Анаға құрмет, жарға жанашырлық, қызға қамқорлық-иманға ұйыған ұлтымыздың басты ұстанымдарының бірі болды. Өз болмысына даналық мінез бен ізгі қасиеттерді жия білуі қазақ әйелін құрметті етті,- дей келе іс-шараның маңыздылығына тоқталды.
Сахнада «Кеше мен бүгін» диалогы оқылып, баланы бесікке салу, келі – келсап, көрпе жасау, әжелердің құрақ құрау сынды дәстүрлі қолөнер бұйымдары көрсетіліп, шараның мазмұнын айшықтай түсті. Бір әулеттің ғана емес, бүкіл елдің данагөйіне, асыл анасына айналған жандардың бірі – Домалақ ана жайлы «Ару Ана» ансамбльнің орындауындағы «Домалақ ана» әні көпшілікті баурап алса, Ақтасты Мәдениет үйінің директоры Жандос Маратұлы бастаған өнерпаздар қазіргі заман әйелдері жайлы әзіл-шыны аралас қалжыңы жарасқан сахналық көріністе көпті бей-жай қалдырмады.
Қазіргі уақытта қазақ халқында бар өзекті мәселелердің бірі, жастарға сабақ болсын деген мақсатта «Күйеуін басқаратын әйелдерге не айтар едіңіз?», «Ата-аналарды қарттар үйіне өткізу – ата-ана тағдырымен ойнау. Осы дұрыс па?» деген сауалдар семинар аясында қамтылып, қатысушылардың жауабы тыңдалып, ой-пікірлері ортаға салынды.
Жастар ресурстық орталығының психолог маманы Гүлназ Толонқызы ана тақырынбында баяндамасын оқып, тренинг-сауалдар жүргізді.
– Аяғымызбен тік жүріп, ұрпағымызды жақсылап өсірейік! Ұлттық құндылығымызды ұмытпайық! Жас ұрпаққа құндылық дегеннің не екенін көбірек түсіндірейік! Осы шараға аналар кеңесінің төрайымдарын, жастар нұсқаушыларын да арнайы шақырып отырмыз,- деген аудандық аналар кеңесінің төрайымы Бақытгүл Көнеева ұрпақ тәрбиесіне бей-жай қарамауға шақырды.
Семинардың құрметті қонақтары Тасашы ауылдық ақсақалдар алқасының мүшесі, ардагер ұстаз Жеңіс Қарабалаев, Алматы облысы жастар ресурстық орталығының психолог маманы Меруерт Рысбекова, Алматы облысы жастар ресурстық орталығының ұйымдастыру бөлімінің маманы Әкежан Қабдолдаевтар тақырып аясына тоқталып, қоғамдағы ана рөлінің бүгінімен кешегісін тілге тиек етті.
Ауыл әкімі Ерболат Төребаев ұйымдастырушыларға алғысын білдіріп:
-Көңілдің жыры, отбасының алтын діңгегі-аналарға деген ыстық сезім, алғыс пен құрметке лайықты,-дей келе еңбегі елеулі аналарға Алғыс хаттарды табыс етті.