Біртуар азамат Советжанға арналған турнир
Жиырма бес жас қысқа ғұмырында достың да, туыстың да, баршаның көңілінен шыға білген, қайран, асылым!
Ақкөңіл, мейірімді, қамқоршы, жүрегі кең, жаны жайсаң, қонақжай, қадірлім! Досқа адал, отбасының ұйытқысы, аңқылдаған алтын бауырым, ғазиз бейнең жүрегіміздің төрінде сақтаулы, қымбаттым! “Жақсының аты өлмейді” деп бекер айтылмаса керек, бауырымның дүниеден өткеніне қырық жыл өтсе де жарқын бейнесі, істеген жақсылығы, әдемі қалжыңы мен күлкісі құрдастарының жадында әлі күнге лентадай көз алдарынан сырғиды. “Советжанмен бірге өстік, бірге жүрдік. Өте жайдарлы, көмектессем деп тұратын жан болатын. Досым жүректі еді, он алты жасында Қату деген жерден жалаң қамшымен атойлап қасқыр соғып алғанын әлі күнге батырлыққа теңеймін”- деп еске алады Жарданбек аға.
Осы орайда, Кеген ауданы Ұзынбұлақ ауылының 1976 жылғы түлектері біртуар азамат Бакеев Советжан Әуелханұлын еске алуға арналған волейбол ойынынан аудандық турнир ұйымдастырды. Салауатты өмір салтын ұстану, спортты насихаттау, жастарға үлгі көрсету мақсатында өткізілген жарысқа Кеген, Еңбекшіқазақ аудандарынан, Талғар қаласынан ардагерлер арасында 10 команда, оқушылар арасында 6 команда қатысты.
Жарыста Кеген ауданының дене шынықтыру және спортты дамыту орталығы КММ-нің директоры Гайдар Әріпбайұлы сөз сөйлеп, спортшыларды құттықтап, жарысты салтанатты түрде ашып берді. Сонымен қатар Ұзынбұлақ ауылдық округ әкімі Олжас Маратұлы және Советжан Әуелханұлының туыстары, артында қалған жары мен қызы, достары сөз алып, спортшыларға сәттілік тіледі. Жарыс өте тартысты және жоғары деңгейде өтті.
Доп додасының қорытындысы бойынша ардагерлер арасында 1-орын Кеген, 2-орын Жылысай, 3-орын Алғабас командалары иеленді.
Оқушылар арасында 1-орын Ақсай, 2-орын Ұзынбұлақ, 3-орын Жылысай мектебінің командалары өзара бөлісті. Жарыс жеңімпаздарын Ұзынбұлақ ауылдық округ әкімі Олжас Маратұлы, ауылдық спорт нұсқаушысы Есен Күребайұлы ұйымдастыру алқасының кубок, медаль, мақтау қағаздары және қаржылай сыйлықтарымен марапаттады. Жарыстың жоғары деңгейде өтуін ұйымдастырушы топқа, яғни, ағамыздың құрбы-құрдастарына алғысымыз шексіз. Жарғақ құлағы жастыққа тимей атсалысқан Жарданбек Дайыров, Тұрсын Ұзақов, Нұрбай Советов, Бекет Шортанов, Құдайберген Егізеков, Иманбек Батанов ағаларымызға және Жамилә Дәркенбаева, Мадина Бошқаева апайларымызға отбасымыздың атынан рақмет айтамыз! Арамыздан ерте кеткен Советжан бауырымыздың әруғы риза болсын!
Салтанат Бакеева,
Ұзынбұлақ ауылы.
