Ұстаз әлемдегі ең ерекше адам. Себебі, ұстаз барлық балаларға алғаш әріп үйретеді және алғаш қолдарына әліппе ұстатады. Ештеңе білмейтін кішкентай баланы өз баласындай көріп, оған білім береді.
Ұстаз ұлы тұлға, батыр және мейірімді жан! Мың ғасыр өтсе де ұстаздың аты және«ұстаз»деген ұғым өлген жоқ. Өйткені қай дәуір болмасын, ол қоғамға ұстаздың еңбегі керек-ақ. Тіпті зәру. Әр таңның атысы мен әр күннің батысы өзінің емес, сіздің қамыңыз үшін қамығып жүретін әрбір ұстаз атаулы жандардың еңбегін ұлы демей не дейсіз?
Тарыдай болып кірген күніңізден бастап мектеп қабырғасында сіздің еркелігіңізді көтеретін де, қателіктеріңізді кешіретін де, сабақ бере отырып сүйіспеншілікке баурайтын да, махаббатқа тәрбиелейтін де, өмір сүрудің қыр-сырын үйрететін де ұстаздар қауымы. Таудай болып шыққан күніңізде де талабыңызға тілекші болып отыратын тағы да ұстаз.
Ұстаздар шәкірттерін тек жақсылыққа баулиды.Ұстаздың қызметі тек мектеп қабырғасымен шектелмейді. Ол шәкірттің өмір бойына жадында қалатын тұлға. Ұстаз шәкірттерге білім беріп қана қоймай, олардың жеке қасиеттерін шыңдап, өзіндік жолын табуға көмектеседі. Еліміздің болашағы- бүгінгі білім алып жатқан ұрпақ, яғни біздің қолымызда болса, сол ұрпақты тәрбиелейтін де ұстаз! «Ұстаздық еткен жалықпас, үйретуден балаға»-деген халық даналығы ұстаздың өмір бойғы еңбегін айқын көрсетеді.
Қорытындылай келе, ұстаз-адам өміріндегі ең құрметті тұлғалардың бірі. Оның еңбегі ұшан-теңіз, себебі ол білім мен тәрбие арқылы қоғамды, болашақты қалыптастырады. «Адамның адамшылдығы жақсы ұстаздан» деп Абай хәкім айтпақшы, әрбір ісіңіз жеңіске жетіп жатса, оның артында ұстаздың бір тамшы болса да еңбегі барын есте сақтаңыз.
Фатима Русланқызы,
С.Серкебаев атындағы мектеп-гимназиясының
8 ә сынып оқушысы.
