Ең жақсы өмір ауылда

Ауыл – әркімге ыстық сезім сыйлайтын, жүрек түбінде жатқан ерекше махаббаттарды оятатын, кең тыныс сыйлайтын құдіретті күш. Ауыл десе, жүрегі селт етпейтін пенде жоқ шығар. Әр адамның ойында бәрібір де ауылға деген махаббат, ауылға деген сағыныш тұрады. Ол тіпті, қалада туып, қалада өскен болса да, ауылға деген махаббатын жоққа шығара алмаймыз. Себебі, бар қазақтың бойында ауылдың иісі сіңген. Десек те, қазіргі күні көп ауылдардан қаңырап бос қалған үйлерді байқап, жанымыз құлазиды. Күйбең тіршілік бар, балаларының соңынан кету бар, әйтеуір не десек те қалаға көшу көбейіп кетті. Осы жайттарды алдын алу мақсатында өз педагогикалық мамандығымды пайдаланып оқушыларға ең жақсы өмір ауылда екенін дәріптегім келеді. Біздің ертеңіміз жастар болғандықтан еңбегін ауылда көрсетіп, ауылдың демографиясын көтеру керек деп санаймын. Өзім де солардың бірімін. Үлкен шаһар – Алматыда оқығаныммен, қазір «Туған жерге туыңды тік» демекші, туған жерім -Шырғанақ ауылында І.Жұмағұлов атындағы орта мектепте қазақ тілі мен әдебиеті пәнінің мұғалімі болып өз еңбек жолымды бастадым. Ағартушы Ы.Алтынсарин Н.И.Ильминскийге жазған хатында «Мен балаларды оқытуға қойға шапқан аш қасқырдай қызу кірістім» дегеніндей, мен де балалардың бойына біліммен бірге ұлттық құндылықтарымыз бен тәрбиені қатар беруге қызу кірісіп кеттім. Атап айтқанда, «Ең жақсы өмір ауылда» тақырыбында 9 және 10 сыныптар арасында пікірталас өткіздім. 9-сынып оқушылары Үкімет тарапта, яғни, «Ең жақсы өмір ауылда» тақырыбын қозғаса, 10-сынып оқушылары Оппозиция тарапты таңдап, «Ең жақсы өмір қалада» тақырыбымен пікір сайысып, ой жарыстырып көрді. Пікірталас барысында ауыл мен қаладағы мәдениет пен өнер, спорт, ауыл мен қала адамдарының айырмашылығы, тіл және мектеп мәселелері, заманауи технологиялар, медицина сынды тақырыптар ашылды. Оқушылар өз ойларын еркін жеткізді. Әрқайсысы берілген тақырыптарын дебат ережелерін сақтай отырып, өте жоғары деңгейде қорғап шықты. Өмірден бірнеше мысалдар, деректер келтіре отырып, пікірсайыста алға шығуға ұмтылды. Қазылық жасаған сарапшылар да ойды дұрыс жеткізуі, дерек(факт) келтіруі, шешен сөйлеуі, ұтымды проблемалық сұрақтар қойып шабуыл жасауы сынды бірнеше критерийлер бойынша сараптап жеңімпазды анықтады. Нәтижесінде, «Ең жақсы өмір ауылда» тақырыбын қорғаған фракция(топ) жеңіске жетті. Оқушылар марапатталып, «Ең үздік спикер» номиницияларымен 9-сынып оқушысы Оразбақ Мұхамедәли мен 10-сынып оқушысы Бекен Дінмұхамед марапатталды. Осы сайыс барысында, оқушылардың ауылға деген махаббатын оттай жанған көздері мен ауыл үшін тырысып, қорғаған сөздерінен байқап, ішім жылыды. «Ауылдан адам көшкенмен, адамнан ауыл көшпейді» демекші, оқушыларының, жастарға, ауылдың туын биік ұстар, ауылға қызмет етер тұлға боларына сенемін!
Болат Айзада Бақытжанқызы,
І.Жұмағұлов атындағы орта мектебінің Қазақ тілі мен әдебиеті пәнінің мұғалімі.