Жастар орталығы жастарға серпін бермек
Қазақстан Республикасының Президенті Қасым-Жомарт Кемелұлы Тоқаев Тәуелсіз Қазақстанның болашағы жастардың қолында екендігін айта отырып, «Жастар тек қана біліммен қаруланып, еңбекке арқа сүйеу керек» деген болатын. Бүгінде Қазақстан жастары азаматтық қоғамның толыққанды, бастамашыл және жауапты субъектісіне айналды. Жастар үшін көптеген бағдарламалар іске асырылуда, жыл сайын мыңдаған жас мамандар, жоғары оқу орындары мен колледждердің түлектері өмірлік бастаудың жаңа мүмкіндіктерін алуда.
Жастарға қызмет көрсету және жастар бастамаларын қолдау мақсатында Кеген ауылында «Жастар ресурстық орталығының» ресми ашылуы өтіп, жастардың игілігіне берілді.
Орталықтың негізгі міндеттері: ақпараттық-әдістемелік сүйемелдеуді жүзеге асыру, жастардың бастамаларын консультациялық сүйемелдеу және қолдау, жастар ортасындағы ахуалға талдау жүргізу және мониторинг жүргізу.
Іс-шараға Алматы облысының әкімі Сұлтанғазиев Марат Елеусізұлы, Мәдениет және ақпарат министрлігі Жастар және отбасы істері комитетінің төрағасы Қамбаров Қайрат Тельманұлы, аудан әкімі Нұрбақыт Теңізбаев және аудан тұрғындары қатысты.
Алғашқы құттықтау сөз Алматы облысының әкімі Сұлтанғазиев Марат Елеусізұлына берілді.
-Белсенді жастар барлық салада бар және олар өз саласының негізгі күші, ертеңгі тұтқаұстарлар. Бір қуанарлығы олар белсенді, ой-сана ауқымы кең және білімді. Олардың бойындағы буырқанған күш тек бір бағытқа- күнделікті жұмысты атқаруға ғана емес, елді, Отанды дамытуға үлес қосуға, жаңаша ойлап, заманауи бастамалар көтеруге де негізделуі тиіс. Әрине аға ұрпақтың ізгі ісі-жастарға оң жағдай жасау.- деді облыс әкімі Марат Сұлтанғазиев.
-Кеген өңірі жастарының басын бір арнаға тоғыстыратын орталықтың ашылғаны мені қуантады. Уақытын қалай тиімді өткіземін деп алаңдайтын жастар қатары азаяды деген сенімдемін. Жаңа ғимаратта жаңа жұмыстардың басталатыны, тың жобалардың қолға алынатыны белгілі. Заманауи жабдықталған орталықта жастар үшін барлық жағдай жасалған. Коворкинг орталық, кітапхана, жаттығу залы жастардың бос уақытын тиімді өткізу үшін тиімділігі зор. Ашылуына аймақ басшысы қатысып, жастарға сәттілік тіледі. Мұның өзі Кегендік жастарға жігер береді.- деген Жастар және отбасы істері комитетінің төрағасы Қайрат Қамбаров жастар жұмысына сәттілік тіледі.
Кеген аудандық ақсақалдар алқасының төрағасы Сабыр Досымбеков ақ батасын беріп, Жастар ресурстық орталығының лентасын Алматы облысының әкімі Марат Сұлтанғазиев, Жастар және отбасы істері комитетінің төрағасы Қайрат Қамбаровпен ауыл ақсақалдары қиды.
Мұнан соң, келген қонақтар жаңа ғимаратқа бас сұғып, танысып шықты. Өңір басшысы мәжіліс залында аудан жастарымен кездесіп, пікірлесті.
Сәулеті мен салтанаты келіскен ғимарат жастарға қызмет көрсетеді. Сондай-ақ, антикафе, интернет кітапхана, коворкинг, мәжіліс залы, жаттығу залы, психологиялық кеңес беру кабинеттері жұмыс істейді.
Айта кету керек, орталықтағы қызметтің барлығы ақысыз. «Бұл Кеген жастары үшін сыйлық деп білеміз. Кез-келген жас өзінің өмірде болып жатқан мәселесіне, жеке басына, қоғамдағы мәселелерге ұсыныс, пікірлерін орталыққа келіп білдіре алады. Біз жастармен бірлесіп, тығыз жұмыс істейміз», -дейді аудандық жастар орталығының жетекшісі Тоғжан Қанатқызы.
Қазақстанның жастары- елдің басты байлығы. Еліміздің болашағы да жастар, сондықтан оларға үлкен үміт артылып отыр. Мемлекетіміздің нығая түсуіне мол үлес қосу үшін, жастар енді бұрынғыдан да белсенді болуы керек. Солай болады деп сенеміз.
