Сан қырлы Сандуғаш
Қандай сала болмасын адам еңбегінің бағаланғаны жақсы. Соның бір дәлелі, Сандуғаштың еңбекқорлығы көп адамға үлгі боларлық. Кеген ауылындағы «Санди Кеген» деп аталатын сұлулық салонынына өзі жөндеу жұмыстарын жүргізіп, еңбектеніп жүріп ашты. Балаларының тәрбиесі мен кәсіпкерлікті қатар алып жүрген керемет жанның еңбегінің еленгеніне бізде қуандық. Өз кәсібін шын сүйетін адам ғана, осындай биіктерге жетеді. Сол еңбегінің арқасында, Алматы облысы әкімінің «Заңғар» жастар сыйлығының «Үздік жас кәсіпкер» номинациясын Кеген ауылының тұрғыны Терлікбаева Сандуғашқа бұйырды.
Сондай-ақ, Алматы облысының «Заңғар» жастар сыйлығына Кеген ауданынан көп балалы, жас отбасы- Әзімовтар отбасы бақ сынап, «Үздік жас отбасы» номинациясының иегері атанды.
Сыйлыққа ие болған жастарға Алматы облысы әкімінің «Заңғар» жастар сыйлығының дипломымен 300 000 теңгенің ақшалай сертификаты табысталды.
Біздің кейіпкеріміз Терлікбаева Сандуғаш Жексембіқызы 1992 жылы сегізінші қаңтарда Алматы облысы, Райымбек ауданы, Кеген ауылында дүниеге келген. Әкесі Терлікбаев Жексембі, анасы Терлікбаева Күлпаршын жеті баланы тәрбиелеп өсірген өнегелі отбасы. Үш әпкесімен үш ағасы бар Сандуғаш үйдің кенжесі. 2008 жылы «Алматы үздіксіз білім беру» колледжіне оқуға түсіп, 2011 жылы жақсыға аяқтап, 2011-2012 жыл аралығында жастар практикасымен «Нұр Отан» партиясында жұмыс атқарды. 2012-2014 жыл аралығында Кеген аудандық Қаржы бөлімінде бухгалтер көмекшісі, 2015 жылдан жеке кәсіптік курстарды оқып, 2016 жылдан жеке кәсіппен айналыса бастады. Кеген «Орталық базар» ішінен дүңгіршекті жалға алып, шаштараз қызметін атқарды. 2019 жылы 19 қаңтарда «Санди Кеген» атты сұлулық салонын ашып, Мемлекетіміздің басшысы Қасым-Жомарт Тоқаев елімізде кәсіпкерлерді дамыту, шағын және орта бизнесті қолға алып жатқан жас кәсіпкерлерге қолдау үшін, Қазақстанда 2019-2021 жылдар аралығында халықты нәтижелі жұмыспен қамту және кәсіпкерлікті дамытуға бағытталған, «Еңбек» нәтижелі еңбекпен қамту бағдарламасы бойынша, 500 мың грантын жеңіп алып, сән салонына керекті құрал-жабдықтар сатып алды. Қазіргі таңда екі жас кәсіпкерді жұмыспен қамтып отыр. Болашақта тағы жас кәсіпкерлерді жұмыспен қамту жоспарында бар. Қайырымды болу барлығымыз үшін ең жақсы қасиет деп санайды. Қолынан келгенше қайырымдылық жасауға тырысады. Көп балалы аналарға, «Мүмкіндігі шектеулі жандар» орталығына айына бір рет барып, шаштарын тегін алып беріп, өз үлесін қосып отырады. Тасашы ауылындағы мектеп жанында орналасқан интернаттың балаларына киім-кешекпен шамасы келгенше қамтамасыз етіп, шаштарын алып беріп тұрады. Жолдасы Бақтыбай Айдос екеуі Исламханмен Алдияр есімді ұлдар тәрбиелеп отыр. Исламханды төрт жасынан бастап, Алматы қаласына «Өнер» мектебіне оқытып, қазіргі таңда актер атанды. «Мұқағали Мақатаев», «Жусан иісі», «Ұрлаудан басқа амал жоқ», «Бір тоқсан», «Тоғжан» атты сериалдарға түсті. Исламхан алты жаста, Алдияр үш жаста.
Қолөнер кәсібінде қосымша іске асырып жүрген Сандуғаш Жексембіқызы:
– Болашақта жас кәсіпкерлер санын көбейтсем деген ойым бар. Адам жастайынан қай салаға икемді болса, соны дамыту керек. Уақыт өте келе бір саланы таңдауға тура келеді. Білімге, жаңашылдыққа ізденіс болумен қатар, өз-өзіңді дамытудан шаршамау керек. Кәсіпкер бір саланы өмір бойы алып жүрмеуі де мүмкін. Нарыққа қарай бейімделіп, жаңа жобаларға көңіл бөліп, соңғы технологияны да пайдаланған абзал.- дейді.
Дана халқымыз: «Кәсіп түбі-нәсіп» деп текке айпаған ғой. Жастардың өз бизнесін бастап, елеулі жетістікке жетуі арқылы біздің мемлекетіміздің абыройы асқақтап, ел экономикасы көтеріледі. Бұл арқылы отандық өнімнің болашағына жарқын жол ашылары анық.
Дәурен ЕРМЕКБАЙ
