Өнер мектебінің өрендері

335

Аудандық мәдениет үйінде Кеген балалар өнер мектебінің оқу жылының аяқталуына арналған қорытынды концерті өтті.  Кеген балалар өнер мектебінің оқу жылының аяқталуына арналған қорытынды концертінде көпшіліктің назарына шығармашылық көрмелері қойылды. Балаларды қолдап өнерлерін тамашалауға көрермендер қарасы көп жиналды. Балалар мұғалімдермен бірлесіп, көрермендер үшін үлкен көрініс дайындап, үздік нөмірлерін орындады. Түрлі аспаптарда ән шырқап, күй тартып, би билеп, хор және вокалдық әдемі әндерімен халықтың көңілінен шыға білді. Концерт соңында аудан әкімі Байедилов Талғат Ескендірұлы құттықтау сөз сөйлеп, жас ұрпаққа сапалы білім мен саналы тәрбие берудегі жетістіктері үшін ұстаздарды марапаттады. Аудандық ақсақалдар кеңесінің төрағасы С.Досымбеков, аудандық аналар кеңесінің төрайымы Б.Көнеева, аудандық қоғамдық кеңесінің төрағасы Х.Зықаев ізгі тілектерін айтып, ақ баталарын берді. Бұл балалар өнер мектебі бүгінде ауданымыздың үлкен өнер ордасына айналды. Мектеп алғаш ашылғанда 250 оқушы дәріс алса, қазіргі таңда білім алушылардың саны 447 балаға жетті. Жалпы жиырма беске жуық адамды жұмыспен қамтып отырған білім ошағы. Ұлттық мәдениетті дәріптеп, өнердің кәусар бұлағымен жас жеткіншектерді сусындатып, ұлттық өнерден терең білім беруді мақсат тұтатын мектепте жеткіншектер домбыра, қобыз, баян, музыка, скрипка, фортепиано, саксафон және хореография сыныптары бойынша талаптарын ұштауда. Мектеп шәкірттері аудандық, облыстық, республикалық және халықаралық дәрежедегі түрлі өнер байқауларына қатысып ауданымыздың атын асқақтатып жүлделі орындардан көрініп келеді. Біз олардың келешегінен көп үміт күтеміз. Өнерпаз жастарымызды мақтан тұтамыз.

Дариға Жалынқызы, «Qarqara».