Халықтық мерекеге айналды
Биылғы Ораза айттың алғашқы күні Кеген ауылында халықтық мерекеге айналды. Мерекеге ауылдың барша тұрғындары, бесіктегі сәбиіне дейін жиналды десек, артық айтпағандық. Ораза айт мерекесіне негіз қалаған «Жерұйық Кеген жастары» қоғамдық қорының азаматтары. Аталған жастар туралы бірер сөз. «Жақсының жақсылығын айт, нұры тасысын!»-деген жақсы тәмсіл бар. Сол айтпақшы, «Жерұйық Кеген жастары» құрылғалы бері ауыл үшін, жас ұрпақ үшін көптеген игілікті істер ұйымдастырып келеді. Олар өткен жылы ауылдағы отызға тарта отбасыға көмір, азық-түлік беріп, қарлығаштың қанатымен су сепкендей шарапаттарын тигізген. Осы көктемде маскүнемдік пен нашақорлыққа қарсы акция ұйымдастырды. Денсаулық фестивалі аясында марафон өткізді. Оның жеңімпаздарына жап-жақсы қаржылай сыйлық берді. Биылғы көктем маусымында ауылды көркейту, көгалдандыру мақсатында 600 түп тал-терек отырғызды. Ораза айттың тұсында қамқорлықты қажет ететін 40 отбасыға азық-түлікпен көмек көрсетілді. Аталған отбасыларға әр жылғы түлектер де шарапаттарын тигізді. Аудандық мәдениет үйінде ережесіз жекпе-жектен Әлемнің 3 дүркін чемпионы Ардақ Назаровпен мектеп оқушыларының және жастардың кездесуі ұйымдастырылды. Жастар ауылдағы Әлмерек абыз мешітінде ораза тұтқан қалың көпшілікке ауызашар беріп, сауапты іс жасады. Айта берсек, Кеген ауылының елім-жерім, туған ауылым деген, ұлттық салт-дәстүрімізді қастерлеген, ұлттық спортымызды ту еткен, дінімізді ардақтап, мұсылмандық парыздарын қадір тұтқан жастарының игілікті істері жетіп-артылады. Енді міне, олар ақылдаса келе Ораза айттың алғашқы күнін халықтық мерекеге ұластырды. Бәрекелді! Қастерлі күні алаңға жиналған сан мыңдаған адамды Кеген ауданының әкімі Талғат Байедилов құттықтады. Дүйім жұрттың басын қосқан ауыл жастарына алғысын білдіріп, әрбір істеріне, жақсы бастамаларына сәттілік тіледі. Ауданның бас имамы Асқар Сығаев «Жерұйық Кеген жастарының» әсіресе, дәл осы Рамазан айында атқарған игілікті істеріне дән ризашылығын білдірді. -Құрметті ауыл тұрғындары! Мен ұстаз ретінде шын көңіліммен қуанып тұрмын. Қолымыздан дәріс алып, мектептен түлеген шәкірттеріміздің ақыл толтырып, имандылық жолына түсіп, оның сыртында бастарын біріктірген ұйым құрып, ел мен жердің жоғын жоқтап, кем-кетігін толтырып, қамқорлықты қажет ететін отбасыларына дейін назарына алып, өсіп келе жатқан жастардың да жарқын болашағын ойлап, ізгілікті де игілікті іс-шараларын ұйымдастырып жүргендеріне дән ризамын. Осындай шәкірттеріміз үшін өзімді бақытты ұстаз деп санасам, артық айтпаймын. Жастарымызға бар жақсылықты тілеймін! Жолдары жарқын, қолдары қуатты бола берсін,-деді аудандық аналар кеңесінің төрайымы, зейнеткер ұстаз, ауданның Құрметті азаматы Бақытгүл Көнеева. -«Мен де кеттім ауылдан, сенде кеттің ауылдан, Осынымыз ұят болды-ау, қауымнан.»-деп Мұқағалидай ақиық ақынымыз жырлағандай, ауылымыздан алыстап кеткеніміз рас. Кеген ауылының бүгінгі жастарына ризамын. Алдыма келіп, ағалық ақылымды сұрап тұрады. Осынау мерекеге де арнайы шақырды. «Жас келсе, іске!»-дейді атамыз қазақ. Ізгілік пен игілікті көздеген сан қырлы жұмыстары жемісін бере берсін! Әсіресе, ауылдағы аз қамтылған әрі көп балалы отбасыларына жәрдемдесіп жүргендері үлкен дүние. Ауданның, ауылдың тізгінін ұстап отырған азаматтарға айтарым, елім-жерім деген осындай азаматардың ісіне әрдайым қолдау көрсетіп отырыңыздар. Ақпараттық қолдау қажет. Жекелеген жастарды ел-жұрттың көзінше марапаттап қойған да артық емес,-деді зейнет демалысындағы заңгер, ауданның Құрметті азаматы Әскелең Сатыбалдиев. Осы ауылдың бір айтулы түлегі, қазақша күрестен Әлем чемпионы, мерекенің құрметті қонағы Бауыржан Тәліп те жүрекжарды тілегін білдіріп, мерекемен құттықтады. Аудандық ардагерлер мен ақсақалдар кеңесінің төрағасы Сабыр Досымбеков көпшілікке ақ батасын берді. Ораза айт мерекесінде ауылдың 1982 және 2003 жылы туылған түлектері тұрғын үйге мұқтаж екі отбасыға баспана сыйлап, үлкен қуанышқа кенелтті. Осы күні «Жерұйық Кеген жастары» қоғамдық қоры атынан өңірдегі мүмкіндігі шектеулі бір топ балаға сыйлық берілді. Оның сыртында алаңға жиналған мыңдаған балаларға тегін балмұздақ, тәтті дәмдер, мақта, ойыншықтар таратылды. Балапандар өздеріне арналып құрылып қойылған ертегідей тамаша ойын алаңдарында ойнап, көңілдерін көтерді. Осы күні жастар ауыл тұрғындарына түрлі жағдайда қажет болар 160 адамдық жаздық үй сыйға тартты. Жастар жағы осынау мерекеге арнап орнатылған алтыбақан аясында тербетілді. Осы күні түрлі спорттық жарыстар өрнек тапты. Балалар асық атып, мәз-мейрам болды. Жеңімпаздардың бәрі лайықты марапатталды. Осылайша Ораза айт халықтық мереке ретінде кең тұрғыда аталып өтілді. Бұл игі дәстүрлі мерекеге айналары даусыз. Жиналған қалың қауым «Жерұйық Кеген жастарына» ризашылықтарын білдіріп, алғыстарын айтып, ақ баталарын беріп қуана тарқасты.
Қанат Біржансал, Дариға Жұмағалиева, Ерғанат Әбдіреш, (Фото) «Қарқара» Кеген ауылы.
