Патриоттық әндер шырқалды
«Кеген аудандық мәдениет және тілдерді дамыту бөлімі» «Кеген ауданының жастар ресурстық орталығының» ұйымдастыруымен, «Шолпан ресурстық орталығының» демеушілігімен тұңғыш президентіміз Н.Ә.Назарбаевтың «Ұлы даланың жеті қыры» мақаласы аясында «Елім менің» атты патриоттық ауданымызда оқушылар арасында әндер байқауы өтті. Егеменді еліміздің қол жеткізген толымды табыстарын, жеткен жетістіктерін, шыққан биіктерін, қарышты қадамын, заңғар заманын әлемге паш ету. Тарих тағылымдарын кеңнен насихаттау. Өскелең ұрпақты Отанын, елін, жерін сүюге тәрбиелеу мақсатында өткен байқауға №3 Кеген орта мектебінен Саянұр Рәсіл, Аяла Әбдуәли, Жанерке Ізтелеу, Дулат Ерболұлы, Ө.Жаңабаев орта мектебінен Ұлпан Серік, Өркен Жаңбырбай, Жібек Омарқызы, С.Серкебаев орта мектебінен Ая Қанатқызы, Тоғжан Қуаншеева атты оқушылар қатысты. Сайыстың басты талаптары қатысушының орындаушылық шеберлігі,орындалар әннің тақырыпқа сай болуы, кәсіби сүйеумелдеуге көңіл бөлу(аранжировка), әнді жанды дауыспен орындау, сахна мәдениеті мен киім үлгісі, ән айту мәнері мен дауыс ырғағына мән беріп, әділ бағалау болды. Байқауда жақсы өнер көрсетіп, топтан озған Жібек Омарқызы І орын, Ая Қанатқызы ІІ орын, Ұлпан Серік ІІІ орынды иеленсе байқаудың ең кішкентай қатысушысы Дулат Ерболұлы «Ерекше дауыс иесі» номинациясына ие болды. Орын алып, қатысқан бөбектерге алғыс хат пен сыйлықтар берілді.
Дариға Жалынқызы.
