Шеттен келген індеттің құрсауынан құтылуға жауаптылар барын салуда. Осы орайда барлық медициналық ұйымдарда сақтық шаралары жүргізіліп, қажетті жабдықтармен қамтамасыз етілуде.
Қауіп –қатер айтып келмесі анық. Осындай да састыратыны тағы бар. Жер жүзін жаулаған эпидемия халықтың сабырлығын сынаса, биліктің біліктілігін сын садағына ілетіні бар-ды.
Қас-қағым сәтте қасымыздан табылған кеселдің жолын кесу үшін Алматы облысы денсаулық сақтау басқармасы қолдарынан келгенін істеп бағуда. Соған байланысты облыс аумағындағы барлық ауруханалар басшылықтың жіті бақылауында.
13 наурыздағы есепке жүгінсек, бүгінгі таңда облыс бойынша жұқпалы ауруға арналған 550 адамдық төсек-орын бар. Оның ішінде 237 балаларға, 313 ересек адамдарға лайықталған. Медициналық ұйымдарда қосымша жұқпалы ауруға 479, провизорлық 517 және 1161 карантиндік орындар ашылған.
Ауру алқымыңнан алғанда ақ халаттылардың көмегі ауадай қажет емес пе? Еліміздің кей аймағында дәрігерлер тапшы болса, мұндай мәселе Алматы облысында туындаған жоқ. Жетісу өңірінде амбулаториялық және стационарлық деңгейде 38 инфекционист, 143 анестизиолог-реаниматолог, 8 нефролог, 12 трансфузиолог, 98 невролог және 447 терапевт дәрігерлер жұмыс істейді .
Елдің құтын қашырған коронавирусқа шалдықты деп күдікке алынған адамдар үшін және эпидемияның жұққаны расталған жағдай да қосымша 27 реанимациялық төсек-орындар дайындалған.
4 топ бойынша– инфекциялық стационарда 550 реанимациялық керуерт бар. оның ішінде 523 жұқпалы, 27 реанимациялық. Өзге де 18 медициналық ұйымда төсек орын жабдықталған.
3– топ бойынша – 18 медициналық ұйымда жағдайы орташа ауырлықтағы емделушілер үшін 517 провизорлық жатын орын дайындалды;
2 топ бойынша– жағдайы ауыр емделушілер үшін 20 объектіде 1 161 карантиндік төсек әзірленді.
«Талдықорған қаласы бойынша коронавирус тіркелген жағдайда 100 орындық жұқпалы аурулар бөлімшесі дайындалды. Дәрілік препараттармен және жеке қорғану құралдарымен қамтамасыз етілуі 100% құрайды»,- дейді Алматы облыстық денсаулық сақтау басқармасның басшысы Бауыржан Ербозымұлы.
КВИ күдігі бар науқастарды емдеуге жатқызу 7 медициналық ұйымда дайындалған провизорлық бөлімшелерде жүзеге асырылатын болады .
Талдықорған қаласында КВИ-мен байланыста болған адамдарды обсервациялау үшін 400 карантиндік төсек орын қосылды.
Соңғы мәліметтерге сүйенсек, жұқпалы аурулар бөліміне 3 науқас келіп түскен. Оның біреуі Еңбекшіқазақ ММБ жұқпалы аурулар бөлімінде жатыр. КВИ жұқтыруы мүмкін деген күдікке ілінген себебі үш азаматта шет елден оралған.
Эпидемияға шалдықты ма, жоқ па? соны анықтау үшін үш адамнан сынама алынған, барлық үш пациенттің вирусологиялық зерттеу нәтижелері теріс көрсеткішті көрсеткен. Қазіргі таңда 10 адам медициналық қызметкерлердің бақылауымен үй карантинінде жатыр. 2,3 санат бойынша 342 тұрғындар жіті назарда.
Кеселдің кесірі тимесе екен деген елдің медициналық маскаға деген сұранысы артқан. Бүгінде қаладағы дәріханалардан сирек кездесетін бұйым тапшылығының алдағы уақытта орны толатын болады.
Бұл туралы Алматы облысы әкімінің баспасөз-хатшысы Ғалымұрат Жүкел айтты. Сөзіне сенсек, «Dolce-Pharm» зауыты өткен айда 1,5 млн. маска өндірген екен. Сұраныстың артуына байланысты өнімді шығару мөлшерін екі есеге арттырмақ. Және де Ажар фабрикасы да алдағы таңда масканы тігуді қолға алған. Сонымен қатар, қоғамдық орындарда, көпшілік көп баратын жерлерге антисептик орнату жоспарланған.
Кәрі, жастың бәрін елеңдеткен індет Алматы облысында әзірге тіркелген жоқ. Болмасын да деген тілек бар. Базыналы елдің басын аман алып қалу үшін үкімет барлығын жұмылдыруда. Осы ретте 1406 нөмірі бойынша тәулік бойы Call-орталығы тұрғындарға қызмет ететіндігін еске саламыз!
Анар САБЫРОВ.
