Бала күлкісі – бақытымыз

1 маусым – Халықаралық балаларды қорғау күніне орай Кеген ауданында әлеуметтік тұрғыдан осал санаттағы отбасыларды қолдауға бағытталған «Бала күлкісі – бақытымыз» қайырымдылық акциясы ұйымдастырылды.
Аталған игі шара Кеген ауданы әкімдігінің Ішкі саясат бөлімі мемлекеттік мекемесінің қолдауымен және «Ақжүрек – Кеген» Алматы облысының мүгедектер қоғамдық бірлестігінің ұйымдастыруымен өтті.
Акцияның басты мақсаты– әлеуметтік қолдауды қажет ететін отбасылардың балаларына мерекелік көңіл-күй сыйлап, олардың қоғам қамқорлығында екенін сезіндіру. Іс-шара барысында балаларға арнайы сыйлықтар табысталып, олардың қуанышты сәттеріне ортақтасу мүмкіндігі туды.
Балалар – еліміздің болашағы, қоғамның ең қымбат қазынасы. Сондықтан олардың бақытты балалық шағын қамтамасыз ету, жан- жақты дамуына жағдай жасау – баршаға ортақ міндет. Осы бағыттағы шаралар өскелең ұрпаққа қамқорлық көрсетудің және ізгілік құндылықтарын насихаттаудың жарқын үлгісі болып табылады.
Акцияға қатысқан ата-аналар ұйымдасты-рушыларға алғыстарын білдіріп, балалардың жүзіндегі шаттық пен қуаныштың ерекше әсер қалдырғанын атап өтті.
«Бала күлкісі – бақытымыз» акциясы қайырымдылық пен мейірімділіктің қоғамдағы маңызын тағы бір мәрте айқындап, балалардың жарқын болашағына деген қамқорлықтың нақты көрінісіне айналды. Қорыта айтқанда, бала – өмірдің жалғасы, елдің ертеңі. Балаларға деген қамқорлық пен сүйіспеншілік ешқашан азаймауы тиіс. Өйткені бала күлген жерде бақыт, береке және жарқын болашақ бар.

Е.Муслимов,
Ақжүрек-Кеген
Алматы облысының мүгедектер қоғамдық бірлестігінің директоры.