БАҚЫТТЫ БАЛАЛЫҚ ШАҚ
Баланың күлкісі – әлемнің ең әсем әуені. Баланың шаттыққа толы жүзінен болашақтың нұрлы келбетін көруге болады. Сондықтан да адамзат баласы үшін бала құқығын қорғау, олардың бақытты балалық шағын қамтамасыз ету – ең маңызды міндеттердің бірі. Жыл сайын аталып өтетін 1 маусым– Халықаралық балаларды қорғау күні осы асыл мұраттарды дәріптейтін ерекше мереке.
Осы айтулы мерекеге орай орталық алаңда «Бақытты балалық шақ!» атты ауқымды мерекелік іс-шара ұйымдастырылып, аудан бүлдіршіндері мен жасөспірімдеріне көтеріңкі көңіл күй сыйлады.
Балалардың шат күлкісі мен қуанышты дауысы әуелеген бұл күн шынайы мерекенің көрінісіне айналды.
Мерекелік шараның басты мақсаты – өскелең ұрпаққа қамқорлық көрсетіп, олардың шығармашылық қабілеттерін дамытуға мүмкіндік беру, ұлттық құндылықтарды дәріптеу және балалардың қоғамдағы маңызын айқындау болды.
Шара барысында балалар арасында асфальтқа сурет салу байқауы ұйымдастырылды. Түрлі-түсті борларды қолдарына ұстаған бүлдіршіндер өз қиялындағы ғажайып әлемді бейнелеп, туған жерге, табиғатқа, отбасы мен Отанға деген сүйіспеншіліктерін сурет арқылы жеткізді. Әрбір туындыдан балғын жүректің тазалығы мен шексіз арманы сезіліп тұрды.
Мерекенің сәнін келтірген ұлттық спорттық ойындар да көпшіліктің ерекше қызығушылығын тудырды. Қазақ халқының бай мұрасын дәріптейтін жарыстарда балалар ептілік пен шапшаңдықтарын көрсетіп, ұлттық ойындардың мән-маңызын терең түсінуге мүмкіндік алды. Бұл жарыстар жас ұрпақтың бойында отансүйгіштік қасиетті қалыптастырып, ұлттық рухты нығайтуға ықпал етті.
Сонымен қатар аудан орталығында мерекелік шеру өтіп, оған білім беру ұйымдарының оқушылары, өнер ұжымдары мен спорт мектептерінің тәрбиеленушілері қатысты.
Әсем безендірілген калонналар мен жарқын киім киген балалардың шеруі мерекеге ерекше көрік берді. Бұл көрініс аудан тұрғындарына көтеріңкі көңіл күй сыйлап, балалардың қоғам өміріндегі маңызды орнын тағы бір мәрте айқындай түсті.
Мерекелік концерттік бағдарлама да көпшілік көңілінен шықты. Сахна төрінде ауданның талантты жас өнерпаздары ән шырқап, би билеп, көрермендердің ыстық ықыласына бөленді. Балғын өнерпаздардың өнері олардың шығармашылық әлеуетінің зор екенін көрсетіп, көрермендерге ерекше әсер қалдырды.
Салтанатты жиын барысында оқу, өнер және спорт салаларында үздік жетістіктерге жеткен дарынды оқушылар мен жас спортшылар арнайы марапатталды. Бұл – жас буынның еңбегіне берілген жоғары баға ғана емес, өзге балаларға үлгі болатын маңызды қадам. Ел болашағы саналатын дарынды жастардың жетістіктерін насихаттау олардың жаңа белестерді бағындыруына серпін береді.
Мереке аясында аудан басшысы Нұрбақыт Молдахметұлы жас ұрпаққа жүрекжарды ақ тілегін арнап, балалардың сапалы білім алып, жан-жақты дамуына мемлекет тарапынан әрдайым қолдау көрсетілетінін атап өтті. Сонымен бірге олардың жарқын болашағына сенім білдіріп, елдің ертеңі білімді де тәрбиелі ұрпақтың қолында екенін ерекше айтты.
Шынында да, балалар – мемлекетіміздің ең қымбат байлығы, халқымыздың үміті мен сенімі. Бүгінгі бүлдіршін – ертеңгі ел тізгінін ұстайтын азамат. Сондықтан олардың алаңсыз білім алып, дені сау, рухы биік болып өсуіне жағдай жасау – баршамыздың ортақ парызымыз. «Бақытты балалық шақ!» атты мерекелік іс-шара балалардың көңілін көтеріп қана қоймай, олардың қоғамдағы орны мен маңызын айқындаған тағылымды шара болды. Балғындардың шат күлкісі мен қуанышқа толы жүздері мерекенің басты жетістігіне айналды.
Балаларға деген қамқорлық – ел болашағына жасалған инвестиция. Ал балалық шағы бақытты өткен ұрпақтың болашағы да жарқын болмақ. Сондықтан әрбір баланың арманы асқақтап, талабы таудай болып, бейбіт елдің қуатты азаматы болып өсуіне тілектеспіз.
Балалар күлкісі ешқашан толастамасын! Бақытты балалық шақ – Мәңгілік Елдің жарқын келешегінің кепілі.
Лаура Қарасартова.
