ҚАРИЯСЫН ҚАДІРЛЕГЕН ҚОҒАМ – ҚУАТТЫ ҚОҒАМ

Қазақ халқы ежелден үлкенді ұлықтап, қариясын қазынаға балаған. «Қарты бар үйдің қазынасы бар» деген қанатты сөздердің астарында терең тағылым жатыр. Өмірдің сан белесінен өтіп, ұрпақ тәрбиелеп, ел дамуына өлшеусіз үлес қосқан аға буынға құрмет көрсету – қай кезеңде де қоғамның басты міндеттерінің бірі.
Бүгінде елімізде қарттардың өмір сапасын жақсартуға, олардың денсаулығын нығайтуға және белсенді өмір сүруіне жағдай жасауға ерекше көңіл бөлінуде. Осы бағыттағы маңызды жобалардың бірі– Алматы облыстық «Белсенді ұзақ өмір орталығы» коммуналдық мемлекеттік мекемесінің Кеген ауданы бойынша филиалы.
Аталған филиал өз жұмысын 2025 жылдың 5 қаңтарынан бастап жүйелі түрде жүргізіп келеді. Орталықтың негізгі мақсаты – зейнет жасындағы азаматтардың денсаулығын нығайту, олардың қоғамнан шет қалмай, белсенді өмір салтын ұстануына мүмкіндік жасау, өзара араласып, пікірлесіп, рухани серпіліс алуына қолайлы орта қалыптастыру.
Филиалдың жұмысын ұйымдастыру мен қызмет түрлерінің сапалы жүзеге асырылуын бақылау мақсатында арнайы кеңесші бекітіліп, алғашқы күннен бастап жүйелі жұмыстар қолға алынды. Қысқа уақыт ішінде орталықтың қызмет бағыттары нақтыланып, әр сала бойынша білікті мамандар даярланды. Ақпан айына дейін тоғыз түрлі қызмет түрі бойынша арнайы курстардан өтіп, сертификатталған мамандар жұмысқа қабылданды.
Орталықта бүгінгі таңда егде жастағы азаматтарға арналған тоғыз бағыттағы қызмет көрсетілуде. Атап айтқанда, скандинавиялық жаяу жүріс, йога, цигун, тоғызқұмалақ, хор-вокал, еңбек терапиясы, емдік дене шынықтыру, жадты нығайту және ІТ сауаттылығы бойынша сабақтар тұрақты түрде ұйымдастырылады.
Бұл қызметтердің әрқайсысы қариялардың денсаулығын жақсартуға, сергек өмір сүруіне және жаңа дағдыларды меңгеруіне бағытталған. Мәселен, скандинавиялық жаяу жүріс пен емдік дене шынықтыру жүрек-қан тамырлары жүйесін нығайтып, дене қозғалысын жақсартады. Йога мен цигун адамның ішкі үйлесімін қалыптастырып, жан тыныштығын сыйлайды.
Тоғызқұмалақ пен жадты дамыту сабақтары ойлау қабілетін шыңдап, есте сақтау жүйесін жетілдіреді. Ал ІТ сауаттылығы курстары аға буын өкілдеріне заманауи технологиялардың мүмкіндігін меңгеруге жол ашады.
Орталықтың басты ерекшелігі – мұнда тек денсаулыққа арналған қызметтер ғана көрсетілмейді. Бұл – қариялардың бас қосып, пікір алмасатын, достық қарым-қатынас орнататын, бос уақытын мәнді өткізетін рухани орта. Егде жастағы адамдардың жалғыздық сезімін азайтып, олардың қоғам өміріне белсенді араласуына ықпал ету – мекеме жұмысының негізгі бағыттарының бірі.
Орталықта қызмет алушылардың денсаулығын бақылап отыратын мейірбике тұрақты жұмыс жүргізеді. Сонымен қатар, олардың психологиялық көңіл-күйін назарда ұстап, қажетті кеңес беретін психолог қызмет көрсетеді. Әлеуметтік қызметкер түрлі мәдени-көпшілік шараларды, тренингтерді, семинарларды, мерекелік кездесулерді ұйымдастырып, қызмет алушылардың қоғамдық өмірге белсенді қатысуына жағдай жасайды.
Жыл бойы мемлекеттік және ұлттық мерекелерге арналған іс-шаралар, тағылымды кездесулер, өнер кештері, туған күн иелерін құттықтау рәсімдері өткізіліп келеді. Бұдан бөлек, табиғат аясындағы демалыстар мен танымдық саяхаттар ұйымдастырылып, қарттардың серуендеуіне, жаңа әсер алуына мүмкіндік жасалуда.
Орталық жұмысының жемісті нәтижелерінің бірі – қариялардың өмірге деген құлшынысының артуы. Көптеген қатысушылар денсаулығының жақсарғанын, жаңа достар тапқанын, күнделікті өмірінің мазмұнды әрі қызықты бола түскенін ерекше ризашылықпен атап өтуде. Бұл – атқарылып жатқан жұмыстың нақты нәтижесі мен қоғамдық маңызын көрсететін көрсеткіш.
2025 жылдың 21 мамырында орталықтың арнайы салтанатты ашылу рәсімі өткізіліп, аудан тұрғындары мен қонақтарының қатысуымен жаңа бастаманың тұсауы кесілген болатын. Ал биыл аталған орталықтың ашылғанына бір жыл толып отыр. Осы мерейлі датаға орай республика көлемінде, облыс пен аудандардағы барлық филиалдарда атқарылған жұмыстар қорытындыланып, мерекелік іс-шаралар ұйымдастырылуда.
Аудандағы филиалдың бір жылдық жұмысы да толағай табыстарға толы. Қысқа мерзім ішінде орталық аудан тұрғындарының сүйікті орнына айналып, көптеген зейнеткерлердің белсенді өмір салтын ұстануына ықпал етті. Бұл – мемлекет тарапынан көрсетіліп отырған қамқорлықтың, сала мамандарының кәсіби еңбегінің және қариялардың өмірге деген құштарлығының жарқын көрінісі.Қазақ қоғамында үлкенге құрмет көрсету– ұлттың рухани биіктігін айқындайтын асыл қасиет. Сондықтан қарттарға қолдау көрсетіп, олардың өмірін мәнді әрі мазмұнды етуге бағытталған осындай игі бастамалардың маңызы зор.
Қариясын қадірлеген қоғам ешқашан ұтылмайды. Себебі аға буынның өмірлік тәжірибесі мен ақыл-парасаты – кез келген мемлекеттің рухани тірегі. Ал «Белсенді ұзақ өмір орталығы» секілді мекемелер сол асыл қазынаның қадірін арттырып, олардың өмірін нұрландыра түсетін игі жобалардың бірі екені сөзсіз.
Орталықтың бір жылдығына арналған мерекелік шара барысында жыл бойы атқарылған жұмыстар сараланып, қызмет алушыларға көрсетіліп отырған тоғыз түрлі қызмет түрінің нәтижелері таныстырылды. Салтанатты жиынға аудан басшылығы, облыстық басқарма өкілдері, ардагерлер кеңесінің мүшелері, қоғамдық ұйымдар жетекшілері мен орталықтың тұрақты қатысушылары қатысты. Мерекелік жиында құттықтау сөздер айтылып, орталық жұмысына белсене араласып жүрген азаматтар мен мамандар лайықты марапатталды.
Шара аясында орталықтың өнерпаз қарттары дайындаған хор және вокалдық бағдарламалар ұсынылып, қатысушыларға көтеріңкі көңіл күй сыйлады. Сонымен қатар, қызмет алушылардың қолөнер бұйымдары мен шығармашылық жұмыстары көрмеге қойылып, олардың өнері мен еңбегі көпшілік назарына ұсынылды. Бұл көрме егде жастағы жандардың бойындағы талант пен өмірге деген құштарлықтың жарқын көрінісіне айналды.
Бір жылдың ішінде орталық көптеген қариялардың екінші үйіне айналып, олардың өміріне жаңа серпін, жаңа достық пен жаңа мүмкіндіктер сыйлады. Бүгінде мұнда келушілер саны артып, орталықтың қоғамдағы маңызы жыл өткен сайын айқындала түсуде. «Белсенді ұзақ өмір орталығы» – мемлекет қамқорлығының нақты көрінісі, қарияларға деген құрметтің жарқын үлгісі. Аға буын өкілдерінің денсаулығын нығайтып, олардың өмірге деген белсенділігін арттыруға бағытталған бұл игі бастама алдағы уақытта да өз жалғасын тауып, талай жанның өміріне қуаныш пен шаттық сыйлай беретіні анық.
«Белсенді ұзақ өмір орталығының» бір жылдық мерейтойы – өткенге тағзым мен болашаққа сенімнің, үлкенге құрмет пен ұрпақ сабақтастығының айқын көрінісі болды.

Лаура Мұхаметқали.