Жастарға серпін берген Жолдау
Қазақстан Республикасының Президенті Қасым-Жомарт Тоқаев күні бүгін ғана халқымызға арнаған дәстүрлі Жолдауын арнады. «СЫНДАРЛЫ ҚОҒАМДЫҚ ДИАЛОГ – ҚАЗАҚСТАННЫҢ ТҰРАҚТЫЛЫҒЫ МЕН ӨРКЕНДЕУІНІҢ НЕГІЗІ» атты Мемлекет басшысының Жолдауы жастарды жігерлендіріп тастады.
Мемлекет басшысы Қасым-Жомарт Тоқаев елді дамудың жаңа кезеңіне шығару үшін Елбасы саясатының сабақтастығын сақтап, жүйелі реформалар жүргізілетінін айтты.
“Отыз жылға жуық уақыт бұрын халқымыз өзінің тәуелсіздігін жариялап, бабаларымыздың ғасырлар бойы аңсаған арманын орындады. Осы уақыт ішінде Қазақстанның тұңғыш президенті Елбасы Нұрсұлтан Назарбаевтың басшылығымен еліміз әлемдегі беделді әрі орнықты мемлекетке айналды. Баянды бірлігіміздің арқасында тәуелсіздігімізді нығайтып, халқымыздың жағдайын жақсартуға жол аштық. Бұл жасампаздық пен ілгерілеу бейбітшілік пен келісім кезеңі болды. Еліміздің даму жолын бүкіл әлем мойындап, қазақстандық, яғни Назарбаев моделі деп атады”, – деді президент Қазақстан халқына Жолдауында.
Жолдауда нақты жүзеге асыру керек негізгі мәселер мен міндеттердің әр қайсысы жастарға тікелей байланысты. Себебі болашағынан зор үміт күттіретін білімді ұрпаққа, әрқашан өз сенімін білдіретін мемлекет басшымыз осы Жолдауында 2020 жылды “еріктілер жылы”деп жарияланды.
«Өзекті міндет азаматтардың, әсіресе жастардың, студенттер мен оқушылардың волонтерлік қызметке қатысуын кеңейту, оларға белсенді өмірлік ұстаным дағдыларын дарыту болып табылады. Бұл азаматтық қоғамды нығайту жөніндегі біздің жұмысымыздың маңызды бөлігі» -деп ерекше атап өтті. Жүргізіліп әрі жасалып жатқан түбегейлі реформалар мен қыруар істердің бәрі жастар үшін, болашақ үшін жасалып жатқанын атап көрсетті. Президентіміз Қасым-Жомарт Тоқаевтың Жолдауы егемен еліміздің тұрақты дамуын қамтитын, мемлекетіміздің барлық саласына серпін беретін, халқымыздың игілігін көздейтін тарихи құжат болып табылады. Тәуелсіз Отанымыздың тұғырын биіктетуге, мемлекетіміздің әлеуметтік және экономикалық дамуын ілгерілетуге негіз қалайтыны анық. Мұның бәрі бізді қуантады. Тәуелсіз мемлекетіміздің тіреуі мен тілегі болар жастар ел
болашағына сенеді. Жалынды жастар алаңсыз білім алып, еңбек етіп, өмір сүргенді армандайды.
Биылғы жылды Жастар жылы деп жариялап, біз үшін барлық жағдайды қамдастырған Елбасымызға және келер 2020 жылды ерікті жастар жылы деп жариялаған ел президенті Қасым-Жомарт Кемелұлына алғыстан басқа айтарымыз жоқ. Ерікті жастар жылы құтты болсын!
Біржансалова Тоғжан Қанатқызы, «Кеген ауданының жастар ресурстық орталығының» жетекшісі.
