Жаңа Жолдау жаңа серпін.

182

Көлсайдай тұнық көлі мен аспантау аясын атажұрты санайтын Кеген ауданының 36 мыңнан астам тұрғыны бүгін Қазақстан Республикасының Президенті Қасым-Жомарт Кемелұлы Тоқаевтың алғашқы Қазақстан халқына арнаған Жолдауын интернет желісі мен БАҚ арқылы көріп, танысты.

Аудан тұрғындары Президентіміздің алғашқы Жолдауында атап көрсетілген мәселелерді қуана қуаттап, орынды жүзеге асырылуына лайықты үлестерін қосатын болады.

«Бірлік болмай, тірлік болмас» деген халық даналығы. Жолдауда Қасым-Жомарт Кемелұлы Тоқаев Елбасы, еліміздің Тұңғыш Президенті Нұрсұлтан Әбішұлы Назарбаевтың сындарлы саясатының арқасында біздің мемлекетті әлемдегі беделді әрі орнықты мемлекетке айналғандығын ерекше атап өткені мені қуантты. Өйткені, қазақстан елінің бірлігінің арқасында тәуелсіздігіміз нығайып, халқымыздың жағдайы жақсарды. Қасым-Жомарт Кемелұлы Тоқаев Елбасының сара жолын жалғастыра отырып, өзінің сайлау алдындағы бағдарламасының халық алдында орындалуын басты назарда ұстауы халықты одан ары жігерлендірді. Үкіметке 2020 жылдан бастап мұғалімдердің жалақысын 2 есе көбейтуді, сонымен қатар мәдениет саласының қызметкерлерінің еңбекақыларын көтеруді үкіметке тапсырғаны көңілімді тағы бір серпілтті. Өйткені біз секілді зейнеткерлікте отырған әрбір қарттың балалары мен келіндері, немерелері бюджеттік салада қызмет атқаруда. Осы негізгі бағытты көрсете отырып, олардың орынды шешім табуына өзі бағыт-бағдар ұсынғаны Президентті ерекше қырынан көрсетті. Бұл Жолдау Тәуелсіз еліміздің тұрғындарының болашақта әл-ауқатының одан ары жақсарту жолында сенімімізді нығайтатын, абыройымызды асқақтататын қастерлі құжат ретінде қабылданғанын нық сеніммен айта аламын.

Жолдаудағы аталып өтілген бағыттардың қай-қайсысын алып қарасақ та біздің тыныс-тіршілігіміз бен рухани өміріміздің бет-бейнесін анық аңғаруға болады. Тағы бір атап көрсетілгені жұртшылықты толғандырып жүрген жер мәселесіне арнайы тоқталғаны. Жердің ешқандай шетелдікке берілмейтіндігі қатаң тапсырылды. Бұл әрине, әсіресе ауылдық жерлердегі елдімекендердегі қарапайым шаруа адамдарына тың серпіліс берді. Ендігі кезекте жерді мейлінше тиімді пайдалануды қолға алуға біздер зейнеткерлер де атсалысатын боламыз. Жолдауда тағы бір ерекше аталып өткен нәрсе шағын кәсіпкерлікті дамыту бұл ауыл кәсіпкерлеріне өз шаруашылығын одан ары жақсартуға өз септігін тигізетін болады. Сондай-ақ, жас буынның сапалы біліммен сусындауына бағытталған алғы шарттар, тұрғын үй көлемін еселеп арттырудың белгіленген жоспарлы шаралары да көкейде жүрген түйткілдің оңды шешім табуына негіз қалайтынына сенім зор. Қалай дегенмен де Қасым-Жомарт Кемелұлы Тоқаевтың бүгінгі Жолдауы көкейге сенім ұялатып, жүрекке жылу берген, санада серпіліс тудырып, ырысымызды еселеуге, мәнді де мағыналы ғұмыр кешуімізге тура жол сілтеді дей аламын. Жаңа тұрпаттағы Жолдауды таулы өңірдің ақ пейіл жұрты осылайша ыстық ықыласпен қабылдағаны анық.

Сабыр ДОСЫМБЕКОВ, Кеген аудандық ардагерлер кеңесінің төрағасы.