Тәуелсіздік қастерлі ұғым – ең қымбат қазынамыз
Еркіндігім.
Қасиеттім.
Қастерлім.
Өзің барда өзегімде жоқ шер мұң!
Кеше сенің келбетіңді арман ғып,
Боданына бұғауландық басқа елдің.
Бабалардың басын тігіп бәйгеге,
Аналардың жанарына жас бердің!
Уа, Еркіндік, қош келдің!
Сөзімнің басын осы өлең шумақтарымен бастағанды жөн көрдім. Қасиетті де қастерлі ұғым саналатын еркіндігіміз, басымызға қонған бақ, қолымыздағы ең қымбат байлығымыз емес пе.
Өз елімнің азаматшасы ретінде мен үшін Тәуелсіздік басты құндылық болып табылады. Еміреніп елім деп, толарсақтан саз кеше жүріп жеткен азаттығымызды бізге бабаларымыз аманаттап кеткен еді. Білім саласында атқарып жүрген еңбек жолымда өскелең ұрпақты адал, өмірге құштар, көзі ашық, көкірегі ояу, мәдениетті, рухани жан дүниесі бай, өз елінің патриоты болатын, оның мүдделерін құрметтейтін және қандай жағдай болмасын оны қорғауға дайын тұратын азамат тәрбиеу менің басты міндетім.
Шежірелі тарихымызға ой жүгіртер болсақ халқымыз небір қиын кезеңдер мен зұлмат жылдарды басынан өткерді. Осынау сайын далада көшпелілер өркениетін қалыптастырған, кіндік қаны тамған туған жерін және еркіндігін қасық қандары қалғанша қорғаған ата-бабаларымыз қандай жағдайда да өзінің қайсарлығы мен ержүректігін дәлелдеп, қазақ халқының абыройын асқақтатып келді. Бостандыққа жету жолында көптеген қиындықтарға тап болды және өркендеу, тәуелсіздікке апаратын жол ұзақ және тікенді болды. Біздің жер көптеген ғасырлар бойы біздің елдің тәуелсіздігі мен егемендігі үшін күрес алаңы болды. Тәуелсіздік үшін күресте қанша қан төгілді. Атап айтсақ, Ұлттық көтерілістер, қанды соғыстар мен революциялар, Кеңес өкіметінің орнауы, 30-шы жылдардағы ашаршылық, қазақ зиялыларының жаппай қуғын-сүргіні – осы оқиғалардың барлығы сансыз құрбандыққа толы болғаны анық тарих беттерінде суреттеледі. Бұл мән-жайлар Қазақстанның саяси және экономикалық дамуын баяулатты. Бірақ халқымыздың бейбітшілік пен келісімде өмір сүруге деген ұмтылысының арқасында біздің еліміз дамудың жаңа жолына түсті, ғасырлық арманы Тәуелсіздікке қол жеткізді.
Желтоқсанның желі мен ызғарына қарсы тұрған жастардың жалынды рухы мен ерліктерінің арқасында шаңырағы биік, керегесі кең мемлекет болып қалыптастық. Бүгінде бай қуатты елдермен теке-тіресіп тұру оңай емес. Жас та болса бас болып, еліміз еңсесін тік көтеріп алпауыт мемлекеттермен қатар тұр.
Тәуелсіздікті алу бар, бірақ оны қорғап қалу, баянды ету, келешек ұрпақтың қолына аманаттау – мынадай мың құбылған, алмағайып заманда оңай емес. Осы орайда Қалқаман Сарин ағамыздың:
Өзегімді өртке ораған қоғамда,
Өз үйіме өзім өгей болам ба?!
Алшаң басып жүре алмаса алты алаш
Азаттығым! Қадірің де жоқ онда!
…Саған жету қиын болса қаншалық,
Сақтап тұру қиынырақ одан да!
Алла берген азаттықтың әр сәті-
Аманат қой
Маған, Саған, Оған да!- деп азаттықты сақтау оны баянды ету, оңайдан емес.
Қорытындылай келе, ата-бабамыздан қанмен берілген өжеттік, қайсарлық сияқты қасиеттер болашақ ұрпақты да тек алға, жаңа белестерге жетелейтіні анық. Еліміз аңсаған тәуелсіздігіміздің тұғыры биік болсын! Бейбіт заманда өмір сүріп, аспанымыз әрқашан ашық болсын! Бір шаңырақтың астында тату-тәтті өмір сүріп, еркіндігімізді сақтайық!
Еліміздегі бейбітшілік пен ынтымақтастықты одан әрі нығайта түсейік! Тәуелсіз Қазақстанымыз жасасын!
Тазабек Мөлдір Еркінқызы,
С.Серкебаев атындағы
мектеп-гимназиясының ағылшын тілі пәнінің мұғалімі.
