“Сурет әлемі” көрмесі – өнер мен шығармашылыққа жол ашқан күн

Кеген ауылындағы З.Нұрқаділов атындағы өнер мектебінде ерекше өнер мерекесі – “Сурет әлемі” атты сурет және қолөнер көрмесі өтті. Іс- шараны “Ақжүрек-Кеген” Алматы облысының мүгедектер қоғамдық бірлестігі ұйымдастырды. Көрменің өтуіне Кеген ауданы әкімдігі мен аудандық “Ішкі саясат” бөлімі мемлекеттік мекемесі қолдау көрсетті.

Көрменің басты мақсаты – мектеп жасындағы балалардың шығармашылық қабілетін дамыту, олардың өнерге деген қызығушылығын арттыру және өз туындыларын көпшілік алдында көрсетуге мүмкіндік беру болды.
“Сурет әлемі” көрмесіне 35 оқушы қатысып, өздерінің салған суреттері мен қолөнер бұйымдарын көрермен назарына ұсынды. Балалар түрлі жанрларда және техникада жұмыс жасап, табиғат көріністерін, тұрмыстық заттарды, ұлттық нақыштағы бейнелерді ерекше шеберлікпен бейнеледі. Әр туындыдан балалық қиялдың шексіздігі мен шабыттың күші сезілді.
Көрме аясында ұйымдастырылған бояу шеберханасында балаларға сурет салу техникасы бойынша арнайы мастер-класстар өткізілді. Шеберхана шығармашылық ортаны қалыптастырып, балалардың өнерге деген қызығушылығын одан әрі арттырды.
Іс-шара соңында көрмеге қатысқан барлық 35 оқушыға марапаттар мен арнайы сыйлықтар табысталды. Бұл – олардың еңбегіне берілген әділ баға ғана емес, алдағы уақытта өнерге ынтасын арттыратын үлкен қолдау болды.
“Сурет әлемі” көрмесі – балалар шығармашылығын насихаттай отырып, олардың өздеріне деген сенімін арттырған, өнерге бастар жол ашқан жарқын оқиға болды.

Е.Муслимов,
Ақжүрек-Кеген Алматы
облысының мүгедектер қоғамдық бірлестігінің президенті.