Шыбышы жастары ауылға қақпа орнатты
Шырайлы өлке Шыбышы Қулық тауының батыс беткейіне орналасқан тау етегіндегі шағын ауыл. Кім келсе де жайдарлы жүздерінен жылылық ұшқындап қарсы алатын ауыл азаматтары ізет- тілектеріне қайран қаласың. Аналарымыздың ақ жарқын жүздерінен қазақы қалпымызды бағзы заманнан ұстанған салт- дәстүріміздің сапасына сызат түсірмей сақтап келгенде дәл осы жандар екені көрініп тұр. Жатырқамай жылылық танытып, үлкендік ізеттілігін көрсетіп қашан көрсең де кең пейілдерін тарылтқан емес. Бұл ауылдың бағзы қалпы түзу. Қазақта керемет сөз бар «қисық қалыптан түзу кірпіш шықпайды» дейді емес пе! Талбесіктен тәрбиенің қалпы бұзылмаған жастардың бүгінгі тірлігін көріп қуанып қалдық. Тауына шығып төменге қарасаң қыран құстай самғап көкке көтерілгендей боласың. Әсем табиғатпен ауыл ажары түкті кілем төселгендей жасыл желекке көмкеріліп көрік беріп тұрғанын көргенде ойыңа ауыл үлкендері Есей ағамыздың өлең жолдары, Шахан анамыздың жырлары орала кетеді. Нәрлі жырлары өскелең ұрпақтың санасына сіңіріп шаңбасқан санаңды сілкіп сансаққа сүйрелейді. Есей ағамызды сөзге тартқанымызда келелі ойын ортаға салды: Ауылымызда айтар жаңалығымыз өте көп. Мемлекеттің көмегімен орталық көшеге екі шақырым жол түзеліп асфалт төселгелі жатыр. Имандылыққа тәрбиелейтін орынның бірі ауыл тұрғындары мен жастарымыз бірігіп ауыл ішінен мешіт құрылысын бастады. Ауылымыздың 1982 жылғы түлектері бүгінгі күні ұйымдасып ауылымыздың кіре берісінен қақпа орнатып халқын қуантуда. Бұл құптарлық іс. Келешек жеткіншектерімізге үлгі, 20 жыл бұрын мектеп қабырғасын аяқтап әр салада еңбек етіп жүрген шәкірттеріме отбасына амандық саулық тілеймін деген ізгі тілегін білдірді. Ауыл азаматтарының кез- келгенімен сөйлесе қалсаңыз ауыл тынысынан сөз қозғап, жеткіншек жастарға батасын беріп жатады. 20 жылдыққа келген Бақытбекті сөзге тартқанымда еліне жеріне деген сүйіспеншілігін жасырмады. Өзіміздің туып өскен ауылымызды көркейту мақсатында 1982 жылы туған түлектер ұйымдасып кіре беріс жерден бір миллион екі жүз елу мың теңге тұратын қақпаны тұрғызып, бүгін салтанатты лентасын қиып жатқан жайымыз бар. Сыныптастарым Арнұр, Бақытжан, Бақкелді, Алмас, Ернат, Әділеттердің еңбектерін мақтанышпен атай кетейін,- дейді қуанышын жасыра алмаған Бақытбек. Бізде қақпаларыңнан тек жақсылық енсін деген ізгі тілегімізді білдірдік. Қақпаның ашылу салтанатына аудандық ішкі саясат бөлімінің басшысы Еркінбек Қалқаев, Жылысай округінің әкімі Қайрат Нарынбаев ауыл тұрғындары, сөз сөйлеп қақпаның лентасын қиып, ақ батасын берді. Аналардың шашуы шашылып өнерпаз ұл-қыздардың әуезді әні шырқалды. Ас беріліп құран бағышталды. Жүздерінде қуаныш табы байқалған ауыл тұрғындары ауылға жастарды тұрақтандыруға шақырған үндеуін бізде қолдап ізгілік істеріне оңшылық тіледік.
Нұрболат Тастанқұлов, Ерғанат Әбдіреш (фото). Шыбышы ауылы.
