ЗАҢҒАР ТҰЛҒАҒА – ЛАЙЫҚТЫ ҚҰРМЕТ
Лаура Мұхаметқали, Суреттерді түсірген: Мира МУРАТАЛИЕВА, «Қарқара» газеті.
Мемлекет және қоғам қайраткері, елінің елеулі тұлғасы, халық перзенті – Заманбек Нұрқаділовтің есімі ел жадында алтын әріппен жазылған. Саясаткер, Кеген орта мектебінің 1951-1961 жылғы түлегі, Алматы қаласының әкімі, Алматы облысының әкімі, Қазақ СССР Жоғарғы Кеңесінің 2 дүркін депутаты, ҚР Парламент Мәжілісінің депутаты Заманбек Нұрқаділов Кеген өңірінің тумасы, қарапайым ауылдан шыққан арда азаматтың туған топыраққа сіңірген еңбегі мен ел алдындағы абырой- беделі– тарихтың өзі бағалайтын құндылық. Жуырда осынау заңғар тұлғаның құрметіне орай Кеген ауданында тағылымды шара өтті.
Кеген ауылындағы өзі оқыған Кеген орта мектеп қабырғасына орнатылған мемориалды- тақтаның салтанатты ашылуы– ұрпақтар сабақтастығы мен тарихи жадыны жаңғыртудың жарқын көрінісі болды. Бұл бастаманы 1982 жылғы мектеп түлектері қолға алып, Заманбек Қалабайұлының жарқын бейнесі мен өмір жолын кейінгі жас ұрпаққа өнеге ету ниетімен іске асырды.
Салтанатты шара Заманбек Нұрқаділов атындағы өнер мектебі алдындағы ескерткіш- бюстіне гүл шоқтарын қою рәсімінен басталды. Келген қонақтар мен аудан басшылығы өнер мектебінің ішін аралап, арнайы ұйымдастырылған музей экспозициясымен танысты. Бұл музей – тұлғаның өмірі мен қызмет жолынан сыр шертетін тарихи естеліктерге толы.
Шара одан әрі Өжек Жаңабаев атындағы мектепте жалғасты. Аудан әкімі Нұрбақыт Теңізбаев құттықтау сөз сөйлеп: “Өз ұлын, өз ерлерін ескермесе, ел тегі алсын қайдан кемеңгерді”, – деп Ілияс Жансүгіровтің ұлағатты өлеңін мысалға келтіріп, Заманбек Қалабайұлына көрсетілген бұл құрметтің маңыздылығына тоқталды.
Мемориалдың ашылу рәсімінде сөз алған ақын, драматург, мемлекет және қоғам қайраткері, Алматы облысының Құрметті азаматы Нұрлан Оразалин, қоғам қайраткері, Алматы облысының Құрметті азаиаты, Қазақстан Республикасының Құрметті құрылысшысы Стақан Белгожаев, сондай-ақ шараны ұйымдастырушы түлектер атынан Гүлнар Таударбекова тұлғаның ел алдындағы қызметі мен ерлікке толы өмір жолын тебірене жеткізді.
Заманбек Нұрқаділов – еліміздегі ірі құрылыс жобаларына жетекшілік еткен, Алматы қаласының гүлденуіне елеулі үлес қосқан, халықтың мүддесін биік қойған тұлға. Оның есімі – әділдік пен батылдықтың символы. Тәуелсіздіктің алғашқы жылдары ел дамуының күрделі сәттерінде ел игілігі үшін шешуші бастамаларды көтеріп, олардың жүзеге асуына ұйытқы болған қайраткерлердің бірі болды. Ұлттың болашағы үшін, қоғам алдындағы жауапкершілікті сезініп елі үшін аянбай еңбек етті. Сол себепті де оның атын ардақтау – елге, жерге, әділдікке деген құрмет.
Бүгінгі жас ұрпақ осындай ерен ерлердің өнегесімен өсіп, елге қызмет етудің маңызын ұғынады. Мемориал – тек ескерткіш емес, ұлт санасына ұялайтын тағылымның айғағы болмақ.
Қоғамға үлгі, ұрпаққа мұра болған Заманбек Нұрқаділов есімі ел жадында мәңгі сақталмақ.
