Әр жан – ерекше, әр мүмкіндік – шексіз

Жуырда аудандық мәдениет үйінде «Денсаулық – зор байлық» мүгедектер қоғамдық бірлестігінің ұйымдастыруымен «Әр жан – ерекше, әр мүмкіндік – шексіз» атты мерекелік шара өтті. Бұл – мүмкіндігі шектеулі азаматтарды құрметтеу, қоғамдағы мәртебесін көтеру және әлеуметтік толеранттылықты насихаттау бағытындағы маңызды мәдени іс-шара болды.
Кешті аудан әкімінің орынбасары Қабылбеков Кеңес Күнесбайұлы ашып, мүмкіндігі шектеулі жандар мен олардың жақындарына ыстық ықыласын білдірді. Ол: «Біз қоғамымыздағы әрбір жанның құрметке лайық екенін түсінуіміз керек.

Әр жүрек – ерекше, әр мүмкіндік – шексіз» – деген ізгі лебізін халыққа жолдады.
Сонымен бірге, белсенді қызмет етіп жүрген бірқатар азаматтар аудан әкімінің Алғыс хаттарымен марапатталды. Марапатталғандардың арасында — Айдын Тұяқбайлы және кәсіпкерлер Аханов Еркебұлан, Әміров Сержан, Досымбаев Дәулет бар.
Келесі кезекте сөз алған аудандық маслихат төрағасы Алмасбек Нұғыманов ерекше балаларға көрсетілген қамқорлық мен жанашырлық танытып, оларды қолдауға бағытталған игі істері және ерекше балаларға көрсеткен қолдауы үшін Жанбабаева Шолпан Ілікқызы Кеген аудандық маслихатының Құрмет грамотасымен марапатталды.
«Денсаулық – зор байлық» атты мүгедектер қоғамдық бірлестігінің төрайымы Жанбабаева Шолпан өз сөзінде қоғамдық бірлестік атқарып жатқан жұмыстарды баяндады. Қазіргі таңда аудан көлемінде төмендегідей күндізгі болу орталықтары жұмыс істейді:
– Нарынқол ауылында — 20
– Есік қаласында — 40
– Кеген ауылында — 25
– Шонжы ауылында — 38
– Шелек ауылында — 40
Осы орталықтарда психоневрологиялық ауытқулары бар және тірек-қимыл аппараты бұзылған 3 жастан 18 жасқа дейінгі балаларға ерекше күтім мен қолдау көрсетіледі. Бірлестік бұл бағытта балалардың әлеуметтік бейімделуіне, дамуына, отбасыларымен қарым-қатынасын күшейтуге мән берілуде.
Мерекенің рухани бөлігін аудан мәдениет үйі өнерпаздары ұштастырды. Концерттік бағдарлама шеңберінде жан-жақты көріністер ұсынылып, ән, тағылымды сөздер, би және өлеңдермен атмосфера толы болып, көрермендер жүрегіне жылы сезім сыйлады.
Кеш барысында:
– Қоғамның әр мүшесі – мүгедектігі бар азаматтар да – өмірдің толық құндылығын сезінуге тиіс екені;
– Әр адамның қоғамға қосар үлесі бар екендігі;
– Қамқорлық, мейірім, сүйіспеншілік – шексіз болуы тиіс деген идеялар басты назарда болды.
– Шараның шымылдығы концерттік бағдарламаға ұласып, көрермендерге көтеріңкі көңіл-күй сыйлады. Мүмкіндігі шектеулі жандардың өнері, ерік-жігері мен өмірге деген құштарлығы залдағы көрерменнің жүрегін тебірентті.
Осындай рухани кештер – тек мерекелік емес, әлеуметтік тұрғыдан да мәні зор шаралар. Олар қоғамның назарын ерекше жандарға аударып, әр адамның қоғамда өз орны бар екенін көрсетеді.
Бұл мерекелік іс-шара — тек бір күндік көңіл-күй емес. Ол – қоғамдағы теңдік, әділеттілік пен жанашырлықтың көрінісі. Біздің міндет – мүмкіндігі шектеулі жандарды оқшауламай, олардың әлеуетін бағалай білу. Мұндай шаралар олардың әлеуметтік интеграциясына серпін береді, қоғамның мәдениетін байытады.
Осылайша, «Әр жан – ерекше, әр мүмкіндік – шексіз» шарасы — жүректегі мейірім, жандағы сенім және құрметтің көрінісі. Олардың қайсарлығы – табандылықтың, төзімділіктің, өмірге құштарлықтың үлгісі. Бұл үлгі – қоғамға күш береді, рухты көтереді.
Алдағы уақытта да мұндай игі бастамалардың жиі болуы – ауданның әлеуметтік бейімділігі мен мәдени дамудың белгісі болары анық.

Лаура ҚАРАСАРТОВА.