Жақсыдан шарапат

Ел болашағының тізгінін ұстайтын жас ұрпақ – мемлекетіміздің басты құндылығы. Олардың толыққанды білім алып, саналы азамат болып қалыптасуына ықпал ету – басты міндет.

Осыған орай, жыл бойы жалғасын табатын Республикалық қайырымдылық акциясы аясында «Ақтасты орта мектеп» коммуналдық мемлекеттік мекемесінде белсенді жұмыс жүргізілуде. 2025 – 2026 оқу жылында 1 тамыз бен 30 қыркүйек уақыт аралығы мейірімділікке, қайырымдылыққа арналды.
Қазақтың жақсы қасиеттерінің асылы – жомарттық, кең пейілділік. Ол адамға қызмет қылып, жақсылық жасауға тән сипат. Оқушыларымыздың жақсы көңіл күймен жаңа оқу жылын сағына, асыға мектебінің табалдырығын аттап білім алуына жағдай жасап, демеуші болып, қол ұшын созған ауылымыздың азаматтарын қайырымдылық жасауға ұйымдастырып жүретін Төлегенұлы Ердос, Нұрлыбайұлы Азат, Жоланұлы Қайрат сынды азаматтарымызға ризашылық білдіреміз.
Дана халқымыз: «Қайырымдылық жасасаң, қайырын өзің көресің» – деп қандай да қайырымды істің қайыры бар екенін айтып кеткен.
Сондай – ақ қайырымдылық акциясының өтуіне атсалыcқан ауылымыздың әкімі Төребаев Ерболат, мектеп ұжымынан Ашкеева Света, Бекмуратова Дина, Байбекова Қарғаш, Алпарова Гулзира көмек көрсетіп демеуші болып, игі шараның ұйытқысы болып, оқушыларымызға қолдау көрсеткендері үшін алғысымыз шексіз.
Жас ұрпақ – елдің ертеңі. Шын мәнінде, бүгінгі жас– ертеңгі елдің мызғымас тірегі, келешек келбеті. Сол себепті олардың білімді, бәсекеге қабілетті, жан – жақты болуы ел дамуындағы аса маңызды фактор болып табылатыны анық. Осыған орай акция кезінде мектеп директоры Қамбарбекова Қымбат Тоғызбайқызы, оқу ісінің меңгерушісі Керімқұлова Айша Мұқанқызы балаларды білім алуға, еңбек етуге қызығушылықтарын арттырып, жігерлендіріп, жүрек жарды тілектерін білдірді. Адамзат баласын жақындастыратын құнды қасиет – адамгершілігі. Адамгершілігі мықты жанның әр кезде де өзгелерге көмектесіп, алғыс алуы анық. Жақсылық жасау – күн шуағындай адам жүрегін нұрға бөлейді. Ал, балаға қуаныш сыйлау бақыттың биік шыңы. Сондай – ақ «Міндетті білім беру» қорынан әртүрлі әлеуметтік санаттағы 29 балаға мектеп формасын сатып алуға қаржылай көмек көрсетілді.
Баласын көңілдің гүлі, көздің нұрына теңеген халықпыз. Жаз мезгілі балалардың асыға күтетін мезгілі Аудандық білім бөлімінің қолдауымен осы мезгілде мектебімізден 9 оқушы «Бөбек», «Мадагаскар», Түркістан, «Балдаурен», «Тау- жанашар» лагерлеріне барып демалып қайтты.
«Батамен ер көгерер, жаңбырмен жер көгерер» – деп бабаларымыз айтпақшы әр сауапты істеріңіз үшін Алланың жақсылығына кенелулеріңізге тілектеспіз.
Ләзат Жанпейісова,
«Ақтасты орта мектеп»КММ
әлеуметтік педагог.