Бердібек әлеміне саяхат

Аудан әкімінің қолдауымен, аудандық Ішкі саясат басқармасының ұйымдастыруымен балалар әдебиетінің классигі Бердібек Соқпақбаевтың туғанына 100 толуына орай жазушының туған күні қарсаңында оқушылар арасында «Бердібек әлеміне саяхат» атты шығармашылық байқау өтті.
Шығарма байқауы көркем әдебиетті насихаттау, жеке тұлға, дарынды шығармашылық тұлға қалыптастыру, білім алушылардың тілдік және әдебиеттік білімдері мен өздерінің таным, түйсік көзқарастарының тәжірибелеріне сүйене отырып, өз ойын жүйелі, әдеби тіл қалыбында бере білуге машықтануды мақсат тұтты. Сондай-ақ, оқушыларға жазушы өмірі мен шығармашылығын таныстыра отырып, халыққа танылған әйгілі шығармасы туралы білімдерін жетілдіру. Оқушылардың әдеби ой-өрісін, қызығушылығын ояту, сөйлеу мәдениетін қалыптастыру. Сол арқылы оқушыларды тәртіптілікке, адамгершілікке тәрбиелеу. Көркем шығармаларды оқуға деген талпынысын арттыруды көздеді.
Байқауға жалпы аудан бойынша 70-ке тарта шығарма келіп түсті. Жазушының шығармасын оқи отырып, ой түю мен көркемдеп жазуды талап еткен байқауға оқырмандары өз деңгейінде қалам тартқан. Арнайы құрылған әділқазылар мүшесі аудандық мәдениет үйі театр режиссеры Нұрбақыт Аршын, облыстық «Алатау арайы» газетінің Кеген аудандық тілшісі Дәурен Ермекбай, аудандық «Қарқара» газеті редактордың орынбасары Лаура Мұхаметқали, аудандық мұражай директоры Әділет Чукенов байқауға келіп түскен шығармаларды саралай отырып жеңімпаздарды анықтады. Сөз саптауы мен шығарманың құрылымын, тіл байлығын алға тарта отырып, шығармаларды іріктеу сатысынан өткізіп, талапқа сай туындыларды жүлде қорына енгізді. Десе де, оза шабу барда, қалыс қалу бар демекші, жетпіс шығарманың ішінен суырылып шыққан қаймақтарын марапаттау шарасы аудандық мәдениет үйінде өтті.
Шығармашылық кештің шымылдығын ашып, сахна төріндегі үлкен экраннан жазушының өмірі мен шығармашылық жолы, балалық шағы зобалаң мен қиын қыстауға тап келген өмір көші видеолента ретінде көрсетілді. Одан кейін обылыстық «Алатау арайы» газетінің Кеген аудандық тілшісі Дәурен Ермекбай жазушының шығармашылығы мен өмір белесіне тоқтала отырып, баяндама жасады. Аудан әкімінің орынбасары Кеңес Қабылбеков сөз алып, балалар әдебиетінің шың құзына айналған Бердібек Соқпақбаевтың өнегелі өмір белесінен сыр шертіп, жеңімпаздарды марапаттады. І.Жұмағұлов атындағы орта мектептің 11-сынып оқушысы Еңілік Оразақын Бас жүлдені жеңіп алып, 50 мың теңгенің серификатымен марапатталса, 1 орын жеңімпазы Тасашы орта мектебінің оқушысы Дәулетжан Бахарбек 40 мың теңгенің сертификатын жеңіп алды. 2 орыннан көрінген С.Бейсенбетұлы атындағы орта мектептің 9-сынып оқушысы Бейсенбай Талшын 30 мың теңгенің серификатын жеңіп алды. 3 орынға табан тіреген А.Нүсіпбеков атындағы орта мектептің 10-сынып оқушысы Айтберген Әсия 20 мың теңгенің сертификатына ие болды. Төмендегі 5 оқушы ынталандыру сыйлығына ие болып, 10 мың теңгенің серификатын қанжығасына байлады. Олар: Ұ. Бағаев атындағы орта мектептің 10-сынып оқушысы Бақберген Айзат, Қ.Байғабылов атындағы орта мектептің 10-сынып оқушысы Кенжебек Нұрай, С.Серкебаев атындағы мектеп-гиманзиясының 10-сынып оқушысы Тілек Алина, Қарабұлақ орта мектебінің 8-сынып оқушысы Сәкен Аяна, К.Нүрпейісов атындағы мектеп лицейінің 7-сынып оқушысы Ақарыс Нұрбақыт.
Бас жүлде мен 1 орынды жеңіп алған жеңімпаздар сахна төрінен орын алып, өз шығармаларын ортаға салды.
Шығармашылық кеште сөз алған ардагер журналист Шыңғыс Тұрсынұлы мен ақын Шеризат Мекебаев шығармашылыққа бет бұрған балғындарға сәт сапар тілеп, Бердібектің шығармашылығы сендерге қанат бітірсін,- деді.
Кеш соңы аудандық мәдениет үйі өнерпаздарының шағын концерттік бағдарламасына ұласты.

Лаура Мұхаметқали,
«Қарқара» газеті,
Фото Дәурен Ермекбай.