Ауылым – алтын бесігім!
Жауырда аудандық мәдениет үйінде облысы әкімдігінің қолдауымен, облыстық мәдениет және құжттама басқармасы мен Алматы облыстық халық шығармашылығы орталығының ұйытқы болуымен «Кегенім – жұмақ мекенім!» – атты мерекелік кеш өтті. Мәдениет үйінің кіре берісі мен орталық алаңды жырға бөккен кеш қазақы дәстүрімізді дәріптеп, өткенімізге бір оралтқандай болды. Сәйгүлікке мінге қас батырлардай қазақы шапанды иығына көмкерген ер батырлар, ат қанатында ойнап, шешендік өнерімен қазақтың ауызекі әдебиетінің қаймағын жаңғыртып сал-серілердің ізін жалғаса, қыдыр дарыған құт елдің берекесін мен бірлігінің бастауы болған Қыдыр ата бейнесіндей ақ шапанын көмкере киген ақ қария облыстан келген қонақтар мен аудан басшыларын, ел-жұртын қарсы алып төрге оздырды. Әрмен қарай екі қанатта сап түзеген ақ әжелеріміз әннен шашу шашып, мың бұралған биші қыздарымыз өнерлерін ортаға салып, тап баяғы серілердің бейнесіндей көркем көрініске куә етті. Ақшаңқа ұзына созылған мәдениет үйінің алаңына дейінгі келбет көңіл толтырып, жанға жылу ұялатты. Өнерпаздар үйінің кіре беріс залында әр ауылдан арнайылатып қойылған көрме залы қазақтың қазақтығын таныта түсті. Себебі, ұлттық салт-санамызды жаңғыртар ұлттық құндылықтарымыз бен ұлттық тағамдарымыз самсыған көрмеде қазақ елінің бар болмысын паш етіп-ақ тұрды. Келген қонақтар көрмені аралап, еліміздің, ауданымыздың мәдениетін жетік сезініп, ұғынды деуге болар. Қаймағы бұзылмаған қазақы ауданымыздың әлі де исі аңқыған қазақылығын көріп, көңілге медеу, жүрекке нұр ұялады.
Мәдениет – ұлттың бет бейнесі, рухани болмысы екендігін тағы бір мәрте осы бір шұрайлы кеш дәлелдеп өткендей. Өркениетті ұлт ең алдымен тарихымен, мәдениетімен, ұлтын ұлықтаған тұлғаларымен ерекшеленеді. Елдің елдігі, мемлекеттің біртұтастығы оның мәдениеті мен әдебиетіне, тіліне, дініне тікелей байланысты. Сондықтан да елдің елдігін, бірлігін, бекемдігін әлемге әйгілер ол – ел мәдениеті. Осы тұрғыда еліміздің рухани байлығы мен болмысын өзге елге танатар болсақ ең алдымен мәдениеттен бастау аларымыз анық. Осы қағидатты мақсат тұтан бұл шара өз деңгейінде бар болмыс, бітімімен салтанат құрды.
Әрмен қарай киелі сахна төрінде жалғасын тапқан мерекелік шараның шымылдығын ашып сөз алған аудан әкімі Нұрбақыт Теңізбаев ізгі ниетін білдірді. Алматы облыстық халық шығармашылығы орталығының директоры Ануар Үмбеталиев сөз сөйлеп, ел бірлігінің қайнар көзі мәдениетіміздің шоқтығы биіктігін көрсетпек, бірлігіміз бекем болса мәдениетіміздің де өресі биік екенін тілге тиек етті.
Елдің ертеңі, келешекті кемелді болуы ел ынтымағымен тікелей байланысты екендігі осы кештің бағдаршамы іспеті. Көркемделген сахна, барша халқтың болмысы қазақы ұлттық нақышта бейнеленіп, еліміздің өзіндік өрнегін әйгілеп тұрды. «Сарыарқа», «Туған жер», «Туған елім», «Бір Бәйтерек», «Бұлбұл», «Ұлы дала», «Кеген, Кеген» әндері шырқалып құлық құрышын қандырса, «Қазақ биі» көрініс тауып санха жыр әлеміне көмкерілді.
Өткен жолы ауданаралық өткен байқаудың қорытындысы бойынша жеңімпаздар марапатталып, сый-сыяпат табыс етілді.
Жүлделі 1 орынды «Жалағаш» ауылдық мәдениет үйі жеңіп алса, 2 орыннан көрінген «Ұзынбұлақ» ауылдық мәдениет үйі болды. 3 орыннан «Тасашы» ауылдық мәдениет үйі көрініп, жеңімпаздарға арнайы ақшалай сыйлық табыс етілді. Сондай-ақ төмендегі номинациялар бойынша жеңімпаздар марапатталып, сый-сыяпат табыс етілді.
«Үздік көрме» номинациясы бойынша Қантай Әбдібекқызы, «Үздік күй» номинациясымен Асхат Ермұратұлы, «Вокалдық топ» номинациясы бойынша «Алғабас» ауылдық мәдениет үйі, «Үздік дәстүрлы ән» номинациясямен Н.Молдасейітов, «Үздік әжелер ансамбілі» номинациясымен «Асыл әжелер» тобы, «Үздік эстрадалық ән» номинациясымен Таңшолпан Өзекбаева, «Үздік халық шағармашылығын дамыту» номинациясымен Тоқай Аманбол мен Есенбол, «Үздік оркестр» номинациясымен «Шабыт» оркестрі, «Үздік би» номинациясымен «Гүлдар-ай» би тобы марапатталды.
Лаура Мұхаметқали,
Фото Н. Тастанқұлов,
Қарқара газеті.
