Еңбек адамы

Бір басында тектілікті, ірілік пен іскерлікті асқақтатар сан қасиет тоғысқан, сонысымен де елінің көшелі бір азаматы болып, қырық жылдан астам уақыт жасыл желекті қорғауға орасан зор үлес қосқан, яғни орманшы болып жұмыс атқарған, есімі жақсылар мен жайсаңдардың қатарында аталып жүрген ардақты азамат Тайбек Әшірұлы туралы сөз қозғамақшымыз. Тайбек ағамыз мінезіне көркі сай, өз ісіне жауапты, білімді азамат әрі өнегелі әке. Әркез саған жақсылық тілеп, қуансаң балаша мәз болатын жан.
Халқымыздың «Туған жерге туың тік!» деген тәмсілінде патриотизмнің кіндік қаның тамған жеріңе, өскен ауылыңа деген сүйіспеншіліктен тамыр тартатыны айтылған. Сол сынды туған жеріне аянбай еңбек еткен Смайылов Тайбек Әшірұлы 1954 жылы 1 тамызда Алматы облысы, Кеген ауданы, Жылысай ауылында дүниеге келген. Әкесі Әшір Смайылов Ұлы Отан соғысының ардагері, ІІ-ші топтағы мүгедек. 1983 жылы сәуір айының 9-шы жұлдызында дүниеден өтсе, анасы Қалиша Дауталиева 1969 жылы 3 сәуір күні қайтыс болды.
Осындай еңбекқор әке мен шешенің маңдай тері мен адамшылығын жасынан сіңіріп өскен Тайбек ағамыз мектепте оқып жүргенде-ақ болашақ мамандығын таңдап қойған еді. 1971 жылы Жалаңаш қазақ орта мектебін аяқтаған соң, жоғарғы оқу орнына емтихан тапсырып, 1983 жылы Қазақтың Еңбек Қызыл Ту орденді ауылшаруашылығы институтының орман шаруашылығы факультетіне оқуға түсті. 1976 жылы таңдаған мамандығын тәмамдаған арманы асқақ жігіт «Орман шаруашылығы инженері» мамандығын алып, алғашқы еңбек жолын «Таушелек» орман шаруашылығы мекемесінде техник-орманшы болып бастады.
1977-1978 жылдары аралығында «Құрметі» орманшылығында техник-орманшы қызметінде болды. 1978-1979 жылдарда «Құрметі» орманшылығында орман меңгерушісінің көмекшісі, 1979-1980 жылдары «Таушелек» орман шаруашылығы мекемесінің жас көшеттер инженері қызметін атқарды. Жас орман инженері еңбексүйгіштігі мен батылдығының арқасында орман шебері қызметіне көтеріледі. Үзіліссіз білігі мен тынбай жинаған тәжірибесі оның беделін арттырады. 1980 жылы «Қарабұлақ» орманшылығы бөлімшесіне орман шебері болып тағайындалды. 1981 жылы отбасы жағдайына байланысты Талғар қаласына қоныс аударды. Осы жылы Талғар қаласындағы ауыл шаруашылығын механикаландыру және электрлендіру техникумына лаборант болып орналасты. 1982 жылы Талғар қаласындағы Республикалық сырттан оқыту техникумына лаборант болып ауысты. 1983 жылы осы оқу орынына әдіскер қызметіне тағайындалды. 1983 жылы Алматы қаласындағы «Пригородный» орманшылығына орман шебері қызметіне ауысты. Сол жылы әкесінің ұзаққа созылған науқастан қайтыс болуына байланысты, Жалағаш ауылына көшіп келді. «Таушелек» орман шаруашылығында қызмет болмауына байланысты, алғашқы да қатардағы жұмыскер, өрт сөндіруші жұмыстарын істеді. 1984-85 жылдар аралығында орман шебері, 1985 жылы мамыр айынан 1986 жылы сәуір айына дейін орман меңгерушісі болды. Үзіліссіз білігі мен тынбай жинаған тәжірибесі оның беделін арттырады. Мамандығы мен кәсібіне сәйкес тапсырылған қай істі болсын ынтасымен атқарды. Орман шаруашылығын дамы¬туға күш-жігерін жұмсайды. Өз ісінің шебер ұйымдастырушысы ретінде Тайбек Әшірұлы «Таушелек» орман шаруашылығы директорлығына шақырылды. 1986-1988 жылдары «Таушелек» орман шаруашылығы мекемесінде директор қызметін атқарды. 1988 жылдың соңына қарай «Кеген» орман шаруашылығымен «Таушелек» орман шаруашылығы мекемелерінің бірігуіне байланысты, директорлық қызметінен босап, осы жылы «Қарабұлақ» орман шаруашылығына орман меңгерушісі болып тағайындалды. 1991-1993 жылдары «Жалаңаш» орман бөлімшесінің меңгерушісі болса, 1994 жылы «Екіаша» орман бөлімшесінің меңгерушісі қызметіне тағайындалды. 2010- 2017 жылдар аралығында зейнетке шыққанға дейін «Көлсай көлдері» мемлекеттік ұлттық табиғи паркі» республикалық мемлекеттік мекемесінде орманшы болып қызмет атқарды.
Туған жерінің табиғатын сүйіп өскен Тайбек ағамыз зейнетке шықса да, орман шаруашылығынан қол үзбей, ізбасарларына ақыл қосып, кеңес беріп жүрді. Сөйтіп, болмысы ұстаз, өзін нағыз орманшы екенін мойындата білді. Ол барлық іске шығармашылықпен, жан-жақты қарап, орман ісінің жаңа буын мамандарын әзірлеуге көңіл бөлді. «Орман-еліміздің тынысын ашатын өкпесі. Әр тал, әр көшет-елдің тағдыры»- дейді.
Өзіне жүктелген міндетті жауапкершілікпен атқарып, орман саласында ұзақ жыл еңбек еткен ардагер, «Қазақстан Республикасының 25 жыл» мерекелік медалінің иегері Тайбек Смайылов елі мен жері үшін шынайы пейілімен қыз¬мет етті.
Ол отбасында да өнегелі отағасы болды. Жұбайы Күләш Сәрсенова екеуі 1976 жылы отбасын құрып, бү¬гінде елге еңбек сіңіріп жүрген ұлықты ұл, қылықты қыз тәрбиелеп өсірді. Күләш Сәрсенова жоғары білімді, 1976 жылы ЖенПИ-дің география-биология факультетін бітірген, 38 жыл ұстаздық қызметте болды, бүгінде зейнет жасында. Қыздары Айгүлмен Әсел, ұлы Берік кәсіпкерлік қызметпен шұғылданады. Бәрі ата-ана арманына лайықты еліне адал қызмет етіп жүрген азаматтар. Бұлардан тараған немерелері ата-апасының көз қуаныштары.
Алпыстың асқарына мойымай көте¬ріліп, жетпістің желкенін көтерген Тайбек Әшірұлы туралы айтылар тағылымды әңгіме таусылмайды. Себебі елге табан ақы, маңдай терін аямаған еңбек адамы қашанда халқымен бірге жасай береді.

Дәурен ЕРМЕКБАЙ.