Тайбек ағадан үйренгеніміз көп болды
Мен Қызылту орденді Алматы Ауыл шаруашылығы институтының Орман шаруашылығы факультетін 1991 жылы тәмәмдап, еңбек жолымды Кеген орман-аң шаруашылығы мекемесінің Темірлік бөлімшесінде қатардағы орманшы қызметінен бастаған едім. Содан бері аттай 32 жыл өте шығыпты. Сол саналы ғұмыр мен уақыттың ішінде қызмет бабымен біраз ел мен жерді аралап, елін-жерін сүйген азаматтармен иық тіресіп, үзеңгілес болып, етене араласқан жайым бар. Сол арда азаматтардың бірі және бірегейі – Смайылов Тайбек Әшірұлы еді.
2000-2005 жылдары Тайбек Әшірұлымен әріптес болып басталған таныстығымыз кейінірек өмірлік дос, аға-іні ретінде жалғасты. Кеген орман-аң шаруашылығы мекемесінің Құрметі бөлімшесінде бөлімше басшысы болып істеген сол жылдары Тайбек аға мені кәсіби шеберлікке, көптің жүгін көтерер көшбасшылыққа баулыды.
Көп жылдан бері орман шаруашылық саласын жандандырып жүрген Тайбек аға еселі еңбек етіп жүрген жігерлі де жауапты басшы болды. Ал, мен болсам ол кісінің әр бастамасын қолдайтын жауапкершілігі мол жас маман, жаңа білім мен тәлімге жаны құмар жақсы шәкірті бола білдім. Сол жылдары Тайбек ағаның басшылығымен Құрметі бөлімшесі алдыңғы қатардағы бөлімшелердің бірі болған еді. Себебі, өз ісінің маманы, кәсіби майталманы ретінде Тайбек аға ұжымның алдына нақты мақсаттар қоя білді. Сонымен қатар сол мақсаттарға жету үшін ұжымдағы әріптестерге дұрыс бағыт-бағдар көрсете білді. Ең негізгісі -ұжымдағы әр маманның жүрек соғысы мен тілін таба білді. «Жұмыскерді мініскер істетеді» – деген халық нақылы осыны меңзесе керек.
Тайбек Әшірұлының бойында кәсіби біліктілік және көшбасшылық қасиетпен қатар қарапайымдылық пен мейірімділік ерекше үйлесім табатын. Қазіргі кезде айтылып жүрген «Кемел адамның» эталоны осы болар деп ойлаймын. Біліктілік пен іскерлікті орайын келтіріп ұштастыра білген Тайбек аға орман шаруашылығына сүбелі үлесін аянбай қосты. Мен сияқты талай жас маманды тәрбиелеп, армандарына қанат бітірді, жүректеріне сенім ұялатты. Қазіргі кезде құрметті демалысында жүрген зейнеткер ағаға, өмірлік ұстазға шын ниетпен қартаймас жайдарлы көңіл, мәнді де мағыналы өмір, жасқа бермес жалын мен сарқылмас қуат тілеймін!
Әріптес інісі:
Серік Қызайбайұлы ЫСҚАҚОВ.
