Әлеуметтік сала қызметкерлерінің кәсіби мерекесі атап өтілді
Адамға қамқорлық жасау, қиын сәтте қолдау көрсету, қоғамдағы әлеуметтік тұрақтылықты қамтамасыз ету – үлкен жауапкершілік пен жанашырлықты талап ететін маңызды міндет. Әсіресе, әлеуметтік қорғау саласында еңбек етіп жүрген мамандардың қызметі қашанда құрметке лайық. Өйткені олар күнделікті жұмыста халықпен етене араласып, көмекке мұқтаж жандардың мұң-мұқтажын тыңдап, мәселелерінің шешілуіне өз үлестерін қосып келеді.
Осы орайда аудандық әкімдіктің үлкен мәжіліс залында Әлеуметтік қорғау жүйесі қызметкерлерінің кәсіби мерекесіне арналған салтанатты жиын өтті. Мерекелік шараға аудан әкімі Таңат Есенкелдіұлы Айдарбеков, сала ардагерлері мен қызметкерлері, мекеме басшылары қатысты.
Салтанатты жиында алдымен аудан әкімі Таңат Есенкелдіұлы құттықтау сөз сөйлеп, әлеуметтік қорғау саласы мамандарының қоғам өміріндегі маңызына тоқталды. Сондай-ақ халықтың әл-ауқатын арттыру, әлеуметтік қолдауды қажет ететін азаматтарға көмек көрсету жолындағы еңбектеріне алғыс білдіріп, жауапты қызметтеріне табыс тіледі.
Мерекелік жиын барысында бірқатар сала қызметкерлері мен еңбек ардагерлері түрлі деңгейдегі марапаттарға ие болды. Атап айтқанда, Алматы облысының әкімі Ш.Әріновтің Алғыс хатымен, Алматы облысының жұмыспен қамтуды үйлестіру және әлеуметтік бағдарламалар басқармасының басшысы Нұрәлиұлы Вайсовтың Алғыс хатымен, сондай-ақ Кеген ауданы әкімінің Құрмет грамотасымен бір топ маман марапатталды.
Сонымен қатар «Алматы облысының жұмыспен қамтуды үйлестіру және әлеуметтік бағдарламалар басқармасы» мемлекеттік мекемесінің «Белсенді ұзақ өмір орталығы» коммуналдық мемлекеттік мекемесінің Кеген аудандық филиалы «Жылдың ең үздік филиалы» номинациясы бойынша ең жоғары марапат – Гран-при жүлдесіне ие болды. Бұл – ұжымның жүйелі жұмысы мен тұрғындарға көрсетіп отырған сапалы қызметінің лайықты бағасы.
Ал «Алматы облыстық жергілікті агроөнеркәсіптік кешені және мемлекеттік мекемелер қызметкерлері кәсіподағы» қоғамдық бірлестігінің «Кәсіподаққа сіңірген еңбегі үшін» төсбелгісімен Қарқара ауылдық округінің әлеуметтік қызметкері Молдабаева Гүлжанат марапатталды.
Сондай-ақ Алматы облысы әкімінің Алғыс хаты Кеген ауылдық округінің әлеуметтік қызметкері Абыханова Эльмира Тельманқызына табысталса, әлеуметтік қызметкер Акимжанова Ынтымаққа басқарма басшысының Алғыс хаты берілді.
Жалпы, бұл марапаттар– сала мамандарының күнделікті қажырлы еңбегіне көрсетілген құрметтің белгісі. Себебі әлеуметтік қызметкер болу тек міндетті орындау емес, ол – адам тағдырына бейжай қарамай, әрбір жанға мейіріммен қарап, қолдау көрсете білу.
Салтанатты жиын барысында сала ардагерлеріне де құрмет көрсетіліп, олардың жылдар бойы жинаған тәжірибесі мен атқарған еңбегі кейінгі буынға үлгі екені атап өтілді.
Расында, әлеуметтік қорғау саласының қызметкерлері қоғамдағы ізгіліктің жаршысы іспетті. Олардың әрбір игі ісі мен көрсеткен көмегінің артында адам тағдыры, отбасының үміті, азаматтардың алғысы тұр. Сондықтан бұл сала мамандарының еңбегі әрдайым ел құрметіне лайық.
Мерекелік басқосу ізгі тілектер мен жылы лебіздерге ұласып, сала қызметкерлеріне зор денсаулық, отбасыларына амандық, жауапты жұмыстарына толағай табыс тілеумен қорытындыланды.
Лаура Қарасартова.
Суреттерді түсірген: Н.Батырбай.
