ҚАЙЫҢДЫҒА БАСТАР ЖОЛ ЖАҢАРДЫ
Кеген ауданының туристік әлеуетін арттыру жолындағы маңызды жобалардың бірі жүзеге асып, табиғатының қайталанбас көркімен әлемге танылған Қайыңды көліне апаратын 10 шақырым автомобиль жолының жаңартылған бөлігі пайдалануға берілді. Бұл – өңірдің туристік инфрақұрылымын дамытуға, келушілерге қолайлы жағдай жасауға бағытталған игілікті істің бірі. Көкпен таласқан асқар таулардың ортасында орналасқан, мөлдір суы мен су астында тік көтерілген шыршаларымен ерекшеленетін Қайыңды көлі – ауданымыздың баға жетпес табиғи байлығы. Жыл сайын мұнда еліміздің әр өңірінен және шетелден мыңдаған турист келіп, табиғаттың ғажайып көрінісіне тамсанады. Сондықтан көлге апаратын жолдың сапасын жақсарту – туристерге қолайлы жағдай жасаумен қатар, өңірдің экономикалық дамуына да ықпал ететін маңызды қадам.
Жаңартылған жол бөлігінің салтанатты ашылу рәсіміне Кеген ауданының әкімі Таңат Есенкелдіұлы Айдарбеков, «СЕРВИС НС» ЖШС директоры Жандос Сәрсенбекұлы Шохшин, «Кереге ТрансСервис Групп» ЖШС директоры Нұрлан Қуанышбайұлы Сүйінуллаев, «Көлсай көлдері» мемлекеттік ұлттық табиғи паркінің басшылығы, мердігер ұйым өкілдері мен ауыл тұрғындары қатысты.
Салтанатты жиында аудан әкімі Таңат Есенкелдіұлы сөз сөйлеп, жол құрылысының жүзеге асуына үлес қосқан азаматтарға алғысын білдірді. Ол атқарылған жұмыстың аудан туризмін дамытудағы маңызына тоқталып, сапалы жол – саяхатшылар үшін қолайлылықтың, ал өңір үшін жаңа мүмкіндіктердің бастауы екенін атап өтті.
Шара барысында мердігер ұйым өкілдеріне аудан әкімінің Алғыс хаттары табысталды. Бұл– ел игілігіне бағытталған іске жауапкершілікпен қарап, ортақ мақсат жолында еңбек еткен азаматтарға көрсетілген құрметтің белгісі.
Табиғаттың осы бір ғажайып мекеніне келетін туристер үшін сапарлау әлдеқайда қолайлы болмақ. Бұл бастама Қайыңды көлінің туристік тартымдылығын арттырып қана қоймай, жергілікті кәсіпкерліктің өркендеуіне, жаңа жұмыс орындарының ашылуына және аудан экономикасының дамуына серпін береді деген сенім мол. Табиғи байлығымызды көздің қарашығындай сақтай отырып, оған бастар жолды жақсарту – келер ұрпаққа қалдырар игі мұраның бірі.
Лаура Мұхаметқали.
Суреттерді түсірген: Қ.ТАЛДЫБЕК.
