Сәдуақас Серкебаев атындағы мектепте Қазақстан Журналистер одағының мүшесі, Райымбек ауданының «Құрметті азаматы», жазушы Шыңғыс Тұрсыновпен «Қаламы қарымды қаламгер – жазушы» атты әдеби-танымдық кездесу кеші өтті.
Аталған шара Қазақстан Республикасының Президенті Қасым-Жомарт Тоқаевтың 2026 жылғы 16 мамырдағы «Кітап оқу мәдениетін дамыту және зерделі ұлт қалыптастыру жөніндегі шаралар туралы» Жарлығын іске асыру мақсатында ұйымдастырылды.
Кездесудің басты мақсаты – оқырман қауымды қаламгердің шығармашылығымен таныстыру, кітап оқуға деген қызығушылықты арттыру, жас ұрпақтың бойына рухани құндылықтарды сіңіру және әдебиетке деген сүйіспеншілікті қалыптастыру.
Әдеби кеш барысында жазушы Шыңғыс Тұрсыновтың өмір жолы, шығармашылық еңбегі мен әдеби туындылары кеңінен таныстырылды. Қаламгердің туған жерге деген сүйіспеншілігі, адамгершілік құндылықтарды арқау еткен шығармалары мен өмірлік ұстанымдары туралы тағылымды ойлар айтылды.
Кездесудің ең маңызды сәттерінің бірі– жазушының «Қош бол, Альбом!» атты жаңа кітабының тұсаукесер рәсімі болды. Салтанатты рәсімге Кеген аудандық кітапханасының директоры Индира Әлиқызы қатысып, қаламгерге ізгі тілегін арнады.
Жаңа кітаптың жарық көруі – қаламгер шығармашылығындағы айтулы белес. Кітаптың тұсаукесері барысында туындының мазмұны мен тәрбиелік мәні туралы сөз қозғалып, оқырман қауымға кеңінен таныстырылды.
Кештің әсерлі сәттерінің бірі – «Қош бол, Альбом!» кітабының кейіпкерлері Сайранбек, Болатбек, Дәрия және Тұрардың ортаға шығып, өз ой-пікірлерімен бөлісуі болды. Шығарма кейіпкерлерінің кездесуге қатысуы әдеби кештің мазмұнын байытып, жиналған көпшілікке ерекше әсер қалдырды.
Сонымен қатар кездесуге қатысқан Бейсенбай және Жақсылық ағалар қаламгердің шығармашылығы жайында жылы лебіздерін білдірді. Жақсылық ағаның орындауындағы «Кегенге кел!» әні туған жерге деген сүйіспеншілікті арттырып, кешке ерекше көрік берді.
Әдеби жүздесу барысында туған өлкенің табиғаты мен тарихын бейнелейтін:
Сыртынан ауылымның тұрсаң қарап,
Тарихын сан ғасырдың берер санап.
Қат-қабат шың-құз жартас Қулық тауым,
Басында арыстанның көкжал барақ.
Төсінде айдын шалқар аққулы көл,
Жерұйық көрем десең Кегенге кел!-
деген жыр жолдары оқылып, туған жердің қадір-қасиеті дәріптелді.
Кездесу барысында ақын Шеризат Мекебаев та сөз алып, жазушының шығармашылығына қатысты пікірін білдірді. Қаламгерге деген құрмет пен оқырманның ыстық ықыласы кештің өн бойынан айқын сезілді.
Шара соңында Кеген аудандық кітапханасының директоры Индира Әлиқызы кездесуді қорытындылап, жазушыға шығармашылық табыс тіледі. Қаламгерге құрмет көрсетіліп, ізгі тілектер айтылды.
Сәдуақас Серкебаев атындағы мектепте өткен бұл әдеби кездесу жас ұрпаққа рухани тәрбие беріп, кітаптың адам өміріндегі маңызын ұғындырған тағылымды шара болды. Жазушы мен оқырман арасындағы осындай жүздесулер әдебиетке деген қызығушылықты арттырып қана қоймай, ұлттық руханиятымыздың дамуына да өзіндік үлес қосары сөзсіз. Қаламы қарымды қаламгер Шыңғыс Тұрсыновтың шығармашылық шабыты шарықтап, жаңа туындылары оқырман жүрегінен орын ала берсін!
