Өңір өркендеуіне бағытталған жұмыс сапары
Алматы облысының әкімі Марат Елеусізұлы Сұлтанғазиев Кеген ауданына жұмыс сапарымен келді.
Жұмыс сапарының бағыты ең алдымен ауыл өмірінің өзегі саналатын мал шаруашылығы мен жайылым мәселесінен басталды. Облыс әкімі және облыстық басқармалар басшыларының қатысуымен Жалағаш ауылдық округінің Қопалы учаскесіне барып, жайылымдарды суаруға арналған 12 құдықты қайта жаңғырту жұмыстарымен танысты.
Кеген өңірі – ежелден мал шаруашылығын кәсіп еткен, төрт түліктің бабын білетін елдің мекені. Сондықтан шалғай жайылымдарды сапалы сумен қамтамасыз ету – ауыл шаруашылығының дамуына тікелей ықпал ететін маңызды мәселе. Жалағаш ауылдық округінің Торайғыр, Қопалы және Жазық Жалаңаш учаскелеріндегі жайылымдарды сумен қамтамасыз етуге бағытталған жоба аясында 12 құдық қайта жаңғыртылуда. Жобаның жалпы құны 1 млрд 143,445 млн теңгені құрайды. Жоба жүзеге асқан жағдайда 3 800 гектар жайылымдық жерді сумен қамтамасыз ету көзделген. Бұл аумақта ірі қара, қой-ешкі және жылқы өсіретін шаруашылықтардың мүмкіндігі арта түспек. Суат пункттері салынып, жалпы ұзындығы 42 шақырым құбыр желісі тартылмақ. Оның ішінде Торайғыр учаскесінде 20 шақырым, Қопалы учаскесінде 22 шақырым құбыр жүргізіледі.
Жайылым мәселесі – ауыл тұрмысының ғана емес, тұтас өңір экономикасының мәселесі. Малдың өрісі кең, суы жеткілікті болса, шаруаның да еңсесі тіктеледі. Сондықтан қолға алынған бұл жұмыс – табиғи ресурсты ұтымды пайдаланып, шалғайдағы мал шаруашылығын дамытуға жасалған нақты қадам. Сапар барысында облыс әкімі Алғабас ауылдық округіндегі Шелек өзені бойында жүзеге асырылып жатқан шағын су электр станцияларының құрылыс жұмыстарымен танысты.Бүгінде өңірдің энергетикалық әлеуетін арттыруға бағытталған инвестициялық жобалар кезең-кезеңімен жүзеге асырылуда. Солардың бірі – «Kegen Hydro» ЖШС қолға алған шағын су электр станциясы. Жобаның жалпы құны 7,2 млрд теңгені, ал қуаттылығы 4,5 МВт-ты құрайды. Жобаны іске асыру мерзімі 2025–2027 жылдарға жоспарланған. Қазіргі уақытта құрылыс жүргізілетін аумақта жерді тегістеу жұмыстары атқарылуда. Ал Шелек өзені бойында жүзеге асырылатын тағы бір жоба – «ОсирисЭнерго» ЖШС салатын шағын су электр станциясы. Бұл жобаның инвестициялық көлемі 11,23 млрд теңге, қуаттылығы 10,01 МВт. Құрылыс кезеңінде 50 адамды жұмыспен қамту жоспарланса, нысан іске қосылғаннан кейін 25 тұрақты жұмыс орны ашылмақ. Бұл жобалар – Кеген өңірінің экономикалық әлеуетін арттырумен қатар, жаңартылатын энергия көздерін дамытуға бағытталған маңызды бастамалар. Табиғи мүмкіндікті тиімді пайдалану арқылы электр энергиясын өндіру – бүгінгі күннің ғана емес, болашақтың да сұранысы.
Жұмыс сапары аясында облыс әкімі Алғабас ауылындағы бастауыш мектептің құрылыс жұмыстарымен де танысты.
Ауыл балаларының сапалы білім алуы үшін салынып жатқан жаңа мектеп 50 орынға арналған. Ғимараттың жалпы ауданы 1 155,44 шаршы метрді құрайды. Жоба «Ұлағатты ұрпақ» қоғамдық қорының демеушілігімен жүзеге асырылуда. Жаңа білім ордасында бес оқу кабинетімен қатар спорт залы, акт залы, кітапхана, медициналық пункт, асхана және ойын бөлмесі қарастырылған. Сонымен бірге балалардың дене шынықтыруымен айналысуына арналған мини-футбол, баскетбол және волейбол алаңдары салынбақ. Құрылыс жұмыстары 2026 жылдың 2 тамызында басталып, 15 желтоқсанында аяқталуы жоспарланған. Баланың білімге алғашқы қадамы жасалатын бастауыш білім ошағының заманауи талапқа сай болуы – ел ертеңіне жасалған қамқорлық. Сондықтан Алғабас ауылында бой көтеріп жатқан жаңа мектеп тұрғындар үшін қуанышты жаңалық болмақ.
Сапар барысында Алғабас ауылындағы әлеуметтік осал топтағы отбасыларға арналған тұрғын үйлердің құрылысымен де танысты. Жоба аясында екі отбасылық бес үй және бір отбасылық бір үй салынуда. Тұрғын үйлердің көлемі – 80 шаршы метр. Жобаның инвестициялық көлемі 168 млн теңгені құрайды. Құжаттағы мәліметке сәйкес, Кеген ауданы бойынша тұрғын үй кезегінде 943 азамат тіркелген. Әлеуметтік аз қамтылған отбасыларды тұрғын үймен қамтамасыз ету мақсатында аудан көлемінде 148 тұрғын үй немесе 331 пәтер салу жоспарланған, қазіргі уақытта оның 119 тұрғын үйі, яғни 242 пәтері салынып жатыр. Баспана – адам өміріндегі ең маңызды қажеттіліктің бірі. Әсіресе әлеуметтік қолдауға мұқтаж отбасылар үшін жаңа үй – жай ғана баспана емес, жаңа өмірге деген сенім мен болашаққа деген үміт. Әлеуметтік саясаттың шынайы көрінісі де осындай нақты істерден байқалады.
Алғабас ауылындағы мәдениет үйінде ауыл шаруашылығы техникаларының көрмесі ұйымдастырылды. Көрмеге ауданның бірқатар шаруа қожалықтары қатысып, өздерінің ауыл шаруашылығы саласындағы мүмкіндіктерін таныстырды.
Жұмыс сапарының маңызды бөлігінің бірі – Кеген ауданы тұрғындарымен кездесу болды. Алғабас ауылдық мәдениет үйінде өткен кездесуде ауданның әлеуметтік-экономикалық даму көрсеткіштері таныстырылып, тұрғындардың ұсыныс-пікірлері тыңдалды.
Кездесу барысында аудан әкімінің баяндамасы жасалып, облыс әкімі өңірдің даму бағыттарына қатысты ой-пікірін ортаға салды. Бұдан кейін тұрғындар өздерін толғандырған мәселелерін көтеріп, сұрақтарына жауап алды.
Бүгінгі қолға алынған әрбір жоба, салынып жатқан әрбір нысан, іске асырылып жатқан әрбір инвестициялық бастама – осы өңірдің ертеңіне салынған негіз. Ауылдың ажары – тұрғындарының әл-ауқатымен, елдің еңсесі – атқарылған нақты істермен көркейеді. Жұмыс сапары барысында таныстырылған жобалар Кеген өңірінде даму қарқынының тоқтамағанын, ел игілігі үшін атқарылып жатқан жұмыстардың жүйелі екенін көрсетті. Өңірдің өркендеуі – ортақ мақсат, ал сол мақсатқа жету жолындағы еңбек – баршаға ортақ жауапкершілік екені сөзсіз.
