Жақсылық жаса!

Кеген ауданы, Тасашы орта мектебі жанындағы интернатында республикалық «Мектепке жол» қайырымдылық акциясы «Әр балаға қуаныш сыйлайық!» ұранымен өтті.
Аталған акцияның басты мақсаты-аз қамтылған және көпбалалы отбасылардың балаларын қолдау, жаңа оқу жылына дайындық кезеңінде және әлеуметтік себептер бойынша балалардың мектепке бармауының алдын алу үшін әлеуметтік көмек көрсету, сондай-ақ, олардың мектепке жолы қуанышты болу үшін балаға шынайы қамқорлықпен назар аудару.
«Жұмыла көтерген жүк жеңіл» демекші, аталған акцияға қала кәсіпкерлері Сара Қасымханова, Эльмира Оразымбетова, Гүлнара Халивалиева, Диана Жандосқызы, Сымбат Шағанаевалардың демеушілігімен интернат тәрбиеленушілеріне түгелдей оқу құралдары мен киім-кешектер алынып, қолдау көрсетілді.
Интернат ұжымы қайырымдылық акциясына атсалысқан қолы ашық, жомарт жандарға ризашылықтарын білдіріп, кәсіптеріне береке тіледі.
Құралай Оқасова, Тасашы орта мектебі жанындағы интернатының меңгерушісі:
– Оқу жылы басталғанда бір жанұядан бірнеше баланы киіндіріп, қажетті заттармен қамтамасыз ету барлық отбасыға бірдей оңай емес. Әсіресе, көп балалы жандарға біраз ауырлау. Дегенмен, мектеп, интернат жанынан ұйымдастырылатын осындай ізгі шаралар бізге үлкен көмек,- деп алғысын білдірді.
Жаңа оқу жылының қарсаңындағы бұл игі бастама елімізде дарынды, білімді, алғыр, дені сау ұрпақ өсуіне ұйытқы болмақ.
Бір балаға көрсетілген көмек-бір отбасыға жасалған қолдау. Ал осындай игі істердің көпшілік болып жүзеге асуы-қоғамымыздағы мейірімділік пен бірліктің айқын белгісі.
Дәурен ЕРМЕКБАЙ.