Отан шебін күзету – абыройлы міндет
Ел тыныштығы мен мемлекеттің қауіпсіздігі – қашанда қастерлі ұғым. Ұлан-ғайыр қазақ даласының шекарасын қырағылықпен күзетіп, елдің тұтастығы мен тыныштығын қорғау – шекара қызметіндегі әрбір сарбаз бен офицерге жүктелген үлкен жауапкершілік. Осы жауапкершілікті абыроймен арқалап жүрген азаматтардың еңбегі қашанда ел назарынан тыс қалмақ емес.
18 тамыз – Қазақстан Республикасының Шекарашылар күніне орай Қарқара мәдениет үйінде Отан шебін күзетіп жүрген әскери қызметшілерге құрмет көрсетіліп, ел қауіпсіздігін қамтамасыз ету жолындағы еңбегі еленген азаматтар аудан әкімінің марапаттарына ие болды. Мерекелік шара барысында алғашқы құттықтау сөз және марапаттау рәсімін өткізу үшін аудан әкімі Нұрбақыт Молдахметұлы Теңізбаев сахна төріне шақырылды. Аудан басшысы шекара қызметінің ел қауіпсіздігін қамтамасыз етудегі айрықша маңызын атап өтіп, Отан қорғау жолындағы азаматтарға жылы лебізін білдірді. Мемлекеттік шекараның беріктігін қамтамасыз етуге қосқан үлесі және кәсіби мерекеге орай бірқатар шекара қызметінің өкілдері аудан әкімінің Құрмет грамотасымен марапатталды. Атап айтқанда, «Кеген» шекаралық бақылау бөлімшесінің бастығы, капитан Уразбаев Алишер Ермекұлы ел шебін күзетудегі жауапты қызметі үшін марапат төрінен көрінді. Сондай-ақ «Қарқара» шекара бөлімшесінің бастығы, аға лейтенант Ордабек Бақдәулет Дидарбекұлы мен «Аманжол» шекара бөлімше бастығының орынбасары, аға лейтенант Серіков Береке Айболатұлына аудан әкімінің Құрмет грамотасы табысталды. Бұл – күнделікті қызметтің сырт көзге көріне бермейтін ауырлығын арқалап жүрген шекара-шылар еңбегіне көрсетілген құрметтің белгісі. Шекара тыныштығы– ел тыныштығы. Ал сол тыныштықты сақтау жолындағы әрбір кезекшілік, әрбір бақылау, әрбір сергек сәттің артында үлкен жауапкершілік жатыр.
Мерекелік шарада аудан әкімінің Алғыс хатымен де бірқатар әскери қызметшілер марапатталды. Аудан әкімі атынан жолданған алғыс хатта Отан шебін қорғау жоғары кәсібилікті, батылдық пен табандылықты талап ететін абыройлы қызмет екені атап көрсетіліп, ел тыныштығы мен қауіпсіздігін қамтамасыз ету жолындағы еңбектеріне ризашылық білдірілді.
Аудан әкімінің Алғыс хатына ие болған азаматтардың қатарында «Қарқара» шекара бөлімшесінің барлаушы-радиотелефонисі, қатардағы жауынгер Усманов Матин Бахадурұлы, «Аманжол» шекара бөлімшесінің барлаушы есептоп нөмірі, ефрейтор Курванжанов Бахтияр Тұрғанжанұлы, сондай-ақ «Аманжол» шекара бөлімшесінің барлаушы-атқышы, қатардағы жауынгер Сатыбалды Дәулет Қайратұлы бар.
Сонымен бірге «Кеген» шекаралық бақылау бөлімшесінің бақылаушысы, қатардағы жауынгер Рысқұл Аллажар Ұланұлы мен кіші бақылаушысы, қатардағы жауынгер Құдыш Нұржан Нұрболатұлы да аудан әкімінің Алғыс хатымен марапатталды.
Шекара қызметі – жай ғана мамандық емес, ол Отан алдындағы сертке адалдықты талап ететін қасиетті міндет. Қырағылықты серік еткен шекарашылардың қызметі елдің ертеңіне деген сенімнің берік қалқаны іспетті. Олар ел мен жердің тұтастығын күзетіп, шекара шебінде күн-түн демей қызмет атқарады. Шекарашы үшін әрбір таң – жаңа жауапкершілікпен басталады. Қарауылдағы әрбір сәт, шекара шебіндегі әрбір қадам – мемлекеттің қауіпсіздігімен тікелей байланысты. Сондықтан олардың еңбегі құрметке де, қошеметке де лайық.
Мерекелік шара аудандық мәдениет үйі қызметкерлерінің концерттік бағдарламасына ұласты.
Ел шебін күзету – ерлік пен төзімділіктің, сертке беріктік пен Отанға деген шынайы сүйіспеншіліктің көрінісі. Шекара тыныш болса, ел де тыныш. Ал ел тыныштығын күзетіп жүрген азаматтарға көрсетілген әрбір құрмет – Отан қорғаушылардың еңбегіне берілген лайықты баға.
Қасиетті шекарамыз қашанда берік, еліміздің аспаны ашық, жұртымыздың іргесі тыныш болғай!
Лаура Қарасартова.
