Мен Құрылтай сайлауын еліміздегі маңызды қоғамдық шаралардың бірі деп қабылдаймын

Мен Құрылтай сайлауын еліміздегі маңызды қоғамдық шаралардың бірі деп қабылдаймын. Елдің болашағы туралы айтқанда, жастардың да ойы мен ұсынысы ескерілуі керек деп есептеймін. Өйткені алдағы жылдары еліміздің дамуына үлес қосатын да, осы қоғамда өмір сүретін де – біз.

Мен үшін ең маңыздысы – жастардың өз мүмкіндігін дұрыс пайдалана алуы. Білім алып, мамандық игеріп, еңбек етіп, өз кәсібін бастауға жағдай болса, жастардың болашаққа деген сенімі де артады. Әсіресе ауыл мен аудан жастарына туған жерінде еңбек етуге мүмкіндік беретін жобалар мен бастамалар көбейсе екен деймін.

Құрылтай арқылы қоғамның түрлі мәселелері ашық айтылып, халықтың ұсыныстары назарға алынады деп сенемін. Әрине, елдің дамуын тек бір құрылымнан күтуге болмайды. Әр азамат өз ісіне жауапкершілікпен қарап, адал еңбек етсе, бұл да мемлекетіміздің дамуына қосылған үлес.

Сондықтан жастарды елдегі маңызды үдерістерге қызығушылық танытып, өз азаматтық көзқарасын қалыптастыруға шақырамын. Еліміздің ертеңі бүгінгі біздің белсенділігімізден басталады деп ойлаймын.

Сембай Мадияр