Мыңжылқы жайлауында ауқымды сенбілік өтті
Қазақ халқы ежелден табиғатты тіршіліктің тұғыры, елдің ырысы мен берекесінің бастауы деп таныған. «Атадан мал қалғанша, тал қалсын» деген дана халқымыз қоршаған ортаны аялауды ұрпақ тәрбиесінің ажырамас бөлігіне айналдырған. Бүгінде осы игі дәстүр заман талабымен үндесіп, ел көлемінде жүзеге асып жатқан «Таза Қазақстан» жалпыұлттық экологиялық акциясы арқылы жалғасын тауып келеді.
Қасиетті Мыңжылқы жайлауында өткен Абыз-баба Елмерек Жаншықұлының 368 жылдығы мен ұлттық салт- дәстүрді дәріптеген «Қымызмұрындық–2026» мәдени-көпшілік іс-шарасы тек рухани мереке ғана емес, туған жердің тазалығына арналған игі бастамамен де ерекшеленді. Ұлттық құндылық пен экологиялық мәдениетті ұштастырған бұл шара көпшілікке үлкен тағылым сыйлады. Кең көлемде ұйымдастырылған сенбілікке Кеген ауданының әкімі Нұрбақыт Молдахметұлы қатысып, акцияның маңыздылығына арнайы тоқталды. Ол табиғаттың тазалығы – тек мемлекеттік мекемелердің емес, әрбір азаматтың ортақ міндеті екенін айтып, туған жерге жанашырлық таныту әр адамның азаматтық парызы екенін атап өтті.
Аудан басшысы сенбілікке қатысушылармен бірге тазалық жұмыстарына белсене араласып, қоршаған ортаны қорғау, табиғатты көздің қарашығындай сақтау және экологиялық мәдениетті қалыптастыру бағытындағы жұмыстардың маңызын ерекше атап өтті. Оның айтуынша, табиғатқа деген жанашырлық – туған елге деген құрметтің нақты көрінісі.
Игі іске аудан тұрғындары, мемлекеттік мекеме қызметкерлері, жастар, еріктілер мен қоғамдық ұйым өкілдері жұмыла қатысты. Бір жағадан бас, бір жеңнен қол шығарған көпшілік жайлау аумағын күл-қоқыстан тазартып, табиғаттың әсем келбетін сақтауға өз үлестерін қосты.
Сенбілік барысында 120 гектардан астам аумақ қоқыстан толық тазартылды. Бұл – жай ғана тазалық жұмысының нәтижесі емес, туған жерге деген сүйіспеншілік пен жауапкершіліктің нақты көрінісі. Кең алқаптың тазарып, табиғи қалпына келтірілуі экологиялық мәдениеттің қалыптасып келе жатқанын аңғартты.
Мыңжылқы жайлауы – табиғаттың ғажайып көрінісі ғана емес, халқымыздың тарихы мен тағылымын бойына сіңірген қасиетті мекен. Осындай киелі жерде өткен тазалық акциясы ұлттық мерекенің мазмұнын одан әрі байытып, салт-дәстүр мен табиғатты қорғау ұғымдарының өзара сабақтас екенін тағы бір мәрте дәлелдеді. Өйткені табиғатты аялау – ұлттық тәрбиенің де, елдік сананың да ажырамас бөлігі.
Бүгінгі таңда экологиялық мәселелер бүкіл әлемді алаңдатып отырған кезеңде мұндай игі бастамалардың мәні бұрынғыдан да арта түсті. Әсіресе жастардың белсенді қатысуы олардың бойында қоршаған ортаға деген жанашырлықты, жауапкершілік сезімін қалыптастыруға зор ықпал етеді. «Таза Қазақстан» акциясы аясында ұйымдастырылған бұл сенбілік – табиғатты қорғауға бағытталған бір күндік шара ғана емес, елдің ертеңіне деген қамқорлықтың жарқын үлгісі болды. Туған жердің тазалығын сақтау – әр азаматтың ар-намысы мен азаматтық борышы екенін көпшілік өз ісімен дәлелдей білді.Табиғатқа деген қамқорлық – келер ұрпаққа қалдырар ең қымбат мұра. Сондықтан мұндай игі бастамалар жалғасын тауып, туған жердің әрбір бұлағы мөлдір, әрбір жайлауы көркем, әрбір өлкесі таза болып сақталуы– баршамыздың ортақ мақсатымыз болуы тиіс.
Сонымен қатар, ұлттық салт-дәстүрді ұлықтап, «Қымызмұрындық–2026» мәдени-көпшілік іс-шарасының жоғары деңгейде ұйымдастырылып, мазмұнды өтуіне елеулі үлес қосқан мекеме басшылары мен бір топ белсенді азамат аудан әкімінің Алғыс хатымен марапатталды. Бұл – елдік дәстүрді дәріптеп, рухани құндылықтарды жаңғырту жолындағы еселі еңбектің лайықты бағасы болды.
