Заң мен тәртіп – азаматтық жауапкершіліктің кепілі
Қоғамның тұрақты дамуы мен азаматтардың қауіпсіз өмір сүруінің басты негіздерінің бірі – заң мен тәртіп. Заң талаптарын сақтау әрбір азаматтың міндеті ғана емес, сонымен қатар оның қоғам алдындағы жауапкершілігінің көрінісі. Құқықтық мәдениеті жоғары қоғамда тәртіп сақталып, адамдардың құқықтары мен бостандықтары қорғалады.
Осы мақсатта Алматы облысы «Тіл» оқу-әдістемелік орталығы коммуналдық мемлекеттік мекемесінің Кеген аудандық филиалында құқықтық сауаттылықты арттыру бағытында «Заң мен тәртіп – азаматтық жауапкершіліктің кепілі» тақырыбында заңгер мен тыңдаушылар арасында кездесу өтті. Іс-шараға Кеген ауданының заңгері Сарыбаев Дархан қатысып, заң талаптарын сақтау, құқық бұзушылықтың алдын алу, азаматтардың құқықтары мен міндеттері жөнінде жан-жақты ақпарат берді.
Кездесу барысында Кеген ауданының заңгері құқықтық сауаттылықтың қоғамдағы маңызына тоқталып, әрбір азаматтың заң алдындағы жауапкершілігі туралы кеңінен түсіндірді. Сонымен қатар, қазіргі таңда жиі кездесетін құқықтық мәселелер, интернет алаяқтықтарының алдын алу, азаматтардың құқықтарын қорғау, еңбек заңнамасы және әкімшілік жауапкершілік мәселелері бойынша маңызды мәліметтермен бөлісті.
Іс-шара барысында тыңдаушылар өздерін толғандырған сұрақтарын қойып, заңгерден нақты жауаптар алды. Кездесу ашық диалог форматында өтіп, қатысушылар құқықтық сауаттылықтарын арттырып, күнделікті өмірде кездесетін құқықтық мәселелердің шешу жолдары туралы пайдалы ақпарат алды.
Мұндай кездесулер азаматтардың құқықтық мәдениетін қалыптастыруға, заңға деген құрметті арттыруға және қоғамдағы тәртіп пен тұрақтылықты нығайтуға ықпал етеді. Заң мен тәртіпті сақтау – әрбір азаматтың ортақ міндеті. Өйткені заң үстемдік құрған қоғамда әділдік салтанат құрып, елдің дамуына берік негіз қаланады.
Кездесу соңында қатысушылар Кеген ауданының заңгері Сарыбаев Дарханға және іс-шараны ұйымдастырған Алматы облысы «Тіл» оқу-әдістемелік орталығының Кеген аудандық филиалының ұжымына алғыс білдіріп, осындай тағылымды кездесулердің алдағы уақытта да жалғасуына тілектестік танытты.
Ақерке ЕРДЕСБАЙ,
филиал оқытушысы.
