ЖАРТЫ ҒАСЫРДЫҢ ЖАРҚЫН ЖҮЗДЕСУІ
Адам өмірінде ұмытылмайтын, жүрек төрінен орын алатын ерекше сәттер болады. Солардың бірі – мектеп қабырғасындағы балалық шақ пен жастық дәуреннің естеліктерін жаңғыртатын түлектер кездесуі. Биыл Қарқара орта мектебін тәмамдаған түлектердің мектеп бітіргендеріне елу жыл толып, жарты ғасырлық мерейтойлық кездесу жоғары деңгейде ұйымдастырылды.
Бұл кездесу – жай ғана басқосу емес, өткен күндерге тағзым жасап, өмір жолын саралайтын, ұстаздарға құрмет көрсетіп, достықтың қадірін ұлықтайтын тағылымды шара болды. Мектептен түлеп ұшқан азаматтар алдымен туған ауданға арнайы ат басын бұрып, ел-жұртымен қауышты. Әсіресе республикаға танымал азамат, ел ағасы Омар Қиқым бастаған түлектердің туған жерге деген ыстық ықыласы мен перзенттік парызы көпшілікке үлгі болды.
Өткен елу жыл ішінде әрқайсысы өмірдің түрлі белестерінен өтіп, әр салада жемісті еңбек етті. Бірі білім мен ғылымның, бірі мәдениет пен өнердің, енді бірі мемлекеттік қызмет пен кәсіпкерліктің дамуына өз үлестерін қосты. Қай салада жүрсе де туған жердің мерейін асырып, ел сенімін ақтауға күш салды. Бүгінде олардың басым бөлігі зейнеткерлік жасқа жетіп, ұрпақ тәрбиесіне көңіл бөліп отырған ардақты ата-әжелер. Немере сүйіп, шөбере қызығын көріп отырған бақытты жандар үшін бұл кездесу өмірдің өткені мен бүгінін сабақтастырған ерекше мереке болды. Кездесу барысында өмірден өткен ұстаздар мен сыныптастардың рухына арнайы құран бағышталып, ас берілді. Бұл – қазақ халқының үлкенді құрметтеп, бақилық болғандарды ұмытпайтын ізгі дәстүрінің жарқын көрінісі. Көңіл толқытарлық сәттердің бірі – ұстаздар мен қатар оқыған достар туралы естеліктер болды. Уақыт қанша алыстатқанымен, мектеп қабырғасындағы балалық шақтың тәтті естеліктері ешқашан ұмытылмайтыны тағы бір мәрте дәлелденді.
Қарқара орта мектебінің сол кездегі білім сапасы мен ұстаздарының біліктілігін көрсететін ерекше көрсеткіштің бірі – бір сыныптан алты медалистің шығуы болды.
Ол кезеңде мұндай нәтиже сирек кездесетін үлкен жетістік саналған. Сондықтан да түлектер осы жетістікті мақтанышпен еске алып, білім берген ұстаздарының еңбегіне шынайы алғыстарын білдірді. Шынында да, білімнің шамын жаққан ұстаз еңбегі ешқашан өлшенбейді. Жарты ғасыр бұрын шәкірт жүрегіне сәуле сепкен мұғалімдердің өнегесі бүгінгі күні де өз жемісін беріп отыр.
Алты бірдей медалист тәрбиелеген мектептің мерейі әрқашан биік болмақ. Бұл– тек жеке адамдардың ғана емес, тұтас бір білім ордасының жетістігі. Түлектер өз сөздерінде мектеп қабырғасында алған тәлім-тәрбие өмір жолындағы барлық жетістіктерінің негізі болғанын ерекше атап өтті. Адам болып қалыптасуына ықпал еткен ұстаздарының есімдерін құрметпен еске алып, олардың алдындағы қарыздың ешқашан өтелмейтінін жеткізді.
Мерейтойлық шара аудандық мәдениет үйінде жалғасын тапты. Мұнда өткен тағылымды кеште түлектер балалық шақтың қызықты күндерін еске алып, мектеп өмірінен сыр шертті. Ескі суреттер көрсетіліп, жастық шақтың жарқын естеліктері қайта жаңғырды. Бір кездері мектеп партасында қатар отырған балалардың бүгінде ел ағасына айналғанын көру – өмірдің өзі жазған ғажайып шежіре іспетті.
Кеш барысында әр сыныптың өкілдері сөз сөйлеп, өткен күндер туралы әсерлі естеліктерімен бөлісті. Бірі алғаш мектеп табалдырығын аттаған күндерін айтса, енді бірі ұстаздарының тәлімін, достарының адамгершілік қасиеттерін тебірене әңгімеледі. Уақыт өзенінің тоқтаусыз ағысында елу жыл өтсе де, достықтың алтын көпірі үзілмегені қуантты. Сол бір балалық шақтағы шынайы қарым-қатынас бүгінгі күні де өз жалғасын тауып отырғанын көру – үлкен бақыт.
Кездесудің мәртебесін арттырған ерекше жайттың бірі – аудан әкімі Нұрбақыт Молдахметұлының арнайы қатысуы болды. Аудан басшысы жарты ғасыр бұрын мектеп бітірген ардагер түлектерге жүрекжарды лебізін білдіріп, олардың ел дамуына қосқан үлестерін жоғары бағалады.
Өз сөзінде аудан әкімі әр кезеңнің өз қаһармандары болатынын, ал бүгінгі кездесуге жиналған азаматтардың туған өлкенің өркендеуіне еңбек сіңірген тұлғалар екенін атап өтті.
Сондай-ақ өскелең ұрпақ үшін бұл буынның өмір жолы мен еңбекқорлығы үлкен өнеге екенін жеткізіп, мерейтой иелеріне зор денсаулық, ұзақ ғұмыр, отбасылық бақыт тіледі. Түлектер де аудан басшысының ықыласына ризашылықтарын білдіріп, туған жердің өркендей беруіне тілектестік танытты.
Жарты ғасырлық кездесу – уақыттың қаншалықты жүйрік екенін ғана емес, адам өміріндегі достықтың, ұстаз еңбегінің және туған жерге деген сүйіспеншіліктің мәңгілік құндылық екенін көрсеткен тағылымды шара болды.
Қарқара орта мектебінің түлектері ұйымдастырған бұл басқосу жас ұрпаққа өнеге, кейінгі буынға үлгі болатын мәні зор кездесу ретінде есте қалды.
Өткенге құрмет көрсетіп, бүгінді бағалап, болашаққа ізгі тілек арнаған осындай кездесулердің тәрбиелік маңызы ерекше. Өйткені адамды адам ететін де – оның туған жерге, білім берген ұстазға және өмір жолында бірге жүрген достарына деген адалдығы.
Жарты ғасыр бұрын мектеп бітірген түлектердің жүрегіндегі достық шырағы әлі де сөнбеген. Сол шырақ келер ұрпаққа да жылуын беріп, өмір жолдарын нұрландыра бермек.
Лаура Мұхаметқали.
