Кәсіпкерлік – ел дамуының қозғаушы күші

Ауданда кәсіпкерлік саласын дамытуға бағытталған маңызды кездесулердің бірі – аудан кәсіпкерлерімен өткен кеңейтілген жиын жоғары деңгейде ұйымдастырылды. Бұл басқосу – тек пікір алмасу алаңы ғана емес, сонымен қатар өңірдегі шағын және орта бизнестің тыныс-тіршілігін саралап, нақты мәселелерді бірлесіп шешуге бағытталған маңызды қадам болды.

Жиынға өткізіліп, аудан басшылығы, кәсіпкерлер, қаржы институттарының өкілдері, сондай-ақ құқық қорғау органдары мен салалық мамандар қатысты. Кездесудің басты мақсаты – кәсіпкерлердің көкейінде жүрген өзекті мәселелерді ашық талқылау, мемлекеттік органдармен кері байланысты күшейту және бизнестің дамуына кедергі келтіретін түйткілдерді бірлесіп шешу болды.
Модератор ретінде сөз алған аудан әкімінің орынбасары Батырханұлы Мұхтар жиынның мән-маңызына тоқталып, кәсіпкерлікті қолдау – ауданның әлеуметтік-экономикалық дамуының негізгі басымдықтарының бірі екенін атап өтті. Бұл бағытта мемлекет тарапынан жасалып жатқан қолдау шаралары мен жеңілдіктердің тиімділігін арттыру үшін жүйелі жұмыстар жүргізіліп жатқанын жеткізді.
Күн тәртібінде ауыл шаруашылығы саласына қатысты маңызды мәселелер кеңінен қаралды. Атап айтқанда, асыл тұқымды мал шаруашылығын дамыту, бордақылау алаңдарын несиелендіру, көктемгі дала жұмыстарын қаржыландыру, ауыл шаруашылығы техникасын лизингке алу тетіктері, сондай-ақ агроөнеркәсіп кешені субъектілерін мемлекеттік қолдаудың өзге де бағыттары талқыланды. Бұл мәселелер – ауылдық аймақтар үшін аса өзекті әрі экономиканың тірегі саналатын салалар. Жиын барысында Алматы облысы кәсіпкерлер палатасының директоры Азамат Тағаймұратұлы Әлиев сөз алып, кәсіпкерлерге көрсетіліп жатқан қолдау шаралары, құқықтық кеңестер мен бизнес жүргізудегі жаңа мүмкіндіктер туралы жан-жақты баяндады. Сонымен қатар, кәсіпкерлердің құқықтарын қорғау, олардың мүдделерін мемлекеттік деңгейде ілгерілету бағытындағы жұмыстарға тоқталды.
Кәсіпкерлер палатасы директорының орынбасары Еркін Майлыбайұлы құқықтық мәселелерге кеңінен тоқталып, бизнес өкілдерінің заң аясында еркін әрі қауіпсіз жұмыс істеуіне жағдай жасау – басты міндеттердің бірі екенін атап өтті.
Жиында аудан прокуроры Алмат Амитжанұлы Данилов та сөз сөйлеп, кәсіпкерлердің құқықтарын қорғау, заңсыз тексерулер мен әкімшілік кедергілерді азайту бағытында атқарылып жатқан жұмыстар жөнінде ақпарат берді. Бұл өз кезегінде кәсіпкерлердің сенімін арттырып, олардың белсенділігін күшейтуге ықпал ететіні сөзсіз.
Кездесуде қаржы институттарының өкілдері де қатысып, жеңілдетілген несие, субсидия және қаржылық қолдау құралдары туралы түсіндірме жұмыстарын жүргізді. Бұл – өз ісін бастағысы келетін немесе кеңейтуді жоспарлаған кәсіпкерлер үшін үлкен мүмкіндік.
Жиынның ең маңызды бөлігі– сұрақ-жауап кезеңі болды. Кәсіпкерлер өздерін толғандырған мәселелерді ашық айтып, нақты жауаптар алды. Әрбір көтерілген мәселе назардан тыс қалмай, тиісті мекемелерге нақты тапсырмалар берілді.
Осындай мазмұнды кездесулер – билік пен бизнес арасындағы байланысты нығайтып, өңірдің экономикалық әлеуетін арттыруға үлкен серпін береді. Кеген ауданында кәсіпкерлікке деген қолдау тұрақты түрде жалғасып, жаңа мүмкіндіктерге жол ашылатыны анық.
Кәсіпкерлік – ел экономикасының тірегі. Ал оны дамыту – баршамызға ортақ міндет.
Мамандарға кәсіпкерлер тарапынан түрлі өзекті сұрақтар қойылып, әрқайсысына нақты әрі мазмұнды жауаптар берілді. Әсіресе, қаржыландыру, мемлекеттік қолдау тетіктері, құқықтық мәселелер мен әкімшілік кедергілер төңірегіндегі сауалдар кеңінен қамтылды.
Жиын барысында Алматы облысы кәсіпкерлер палатасының директоры Алиев Азамат Тағаймұратұлы кәсіпкерлердің ұсыныс-пікірлеріне ерекше назар аударып, олардың әрбір мәселесі назардан тыс қалмайтынын атап өтті. Ол өз сөзінде кәсіпкерлердің құқықтарын қорғау, бизнесті дамытуға қолайлы орта қалыптастыру бағытындағы жұмыстар алдағы уақытта да жүйелі түрде жалғасатынын жеткізді.
Лаура ҚАРАСАРТОВА,
фото Мира Мұраталиева.