«Жылдың үздік мұғалімі – 2025» Нұрбек Досымханов

Аудан орталығы С.Серкебаев атындағы мектеп – гимназиясының ұжымы үшін бұл апта – ерекше қуаныш пен мақтаныштың аптасы болды. Себебі, осы білім ордасының жаста болса, тәжірибелі педагогы Досымханов Нұрбек Керімбайұлы облыстық «Жылдың үздік мұғалімі – 2025» байқауының жеңімпазы атанып, автокөлік иегері болды.

Бұл – тек бір мұғалімнің емес, тұтас мектеп ұжымының, ауданымыздың ортақ жеңісі деуге болады. Себебі ұстаздың бұл жетістігі – жылдар бойғы табанды еңбектің, сапалы білім беруге деген адалдықтың, оқушыға деген шынайы жанашырлықтың жемісі.
Ұстаздық жолды жүрек қалауымен таңдаған Нұрбек Керімбайұлы – бірнеше жылдан бері білім саласында үздіксіз еңбек етіп келе жатқан, өзінің білімі мен біліктілігін дәлелдей білген маман. Оның шәкірттері облыстық, республикалық деңгейдегі білім додаларында жүлделі орындарға ие болып жүр. Сонымен қатар, жаңа форматтағы оқыту әдістерін меңгерген, цифрлық білім беру құралдарын тиімді қолданатын жаңашыл педагог ретінде де көзге түсіп жүрген ұстаз.
«Бұл жеңіс – менімен бірге еңбек етіп жүрген әріптестерімнің, қолдау көрсеткен мектеп басшылығы мен шәкірттерімнің жемісі. Бірлік пен қолдаудың арқасында осы жетістікке жеттім», – дейді Нұрбек Керімбайұлы қуанышымен бөлісіп.
Жеңімпаз ұстазды мектебі ерекше ықыласпен қарсы алды. Ұжым мүшелері, шәкірттер, ата-аналар барлығы да жеңімпаз ұстазды гүл шоқтарымен, арнау өлеңдермен, жүрекжарды тілектерімен күтіп алды.Сүйікті шәкірттері:
– «Сізді үнемі жігерлі, жасампаз қалпыңызда мақтан тұтамыз!»– десе, әріптестері:
– «Нұрбектің жеңісі – барлығымызға қуаныш, шабыт, жаңа биік белестерді бағындыруға жетелейтін үлкен көпір», – деп лебіз білдірді.
Мектеп ұжымы:
– «Мектебіміздің мерейі арта берсін, осындай үлгі боларлық ұстаздарымыз көп болғай!» – деген ізгі тілектерін жеткізді.
«Жақсы мұғалім – мектептің жүрегі» деп Ахмет Байтұрсынұлы айтқандай, Нұрбек Керімбайұлының бұл жеңісі – білім беру саласындағы үлкен серпіліс болмақ. Мұндай марапаттар – ауыл мектебінде де сапалы білім беріліп жатқанын дәлелдейді. Бұл жетістік тек марапат қана емес, жастарға бағыт, әріптестерге шабыт, ұлт болашағына – сенім білдіреді десек артық айтқандық емес.
С.Серкебаев атындағы мектеп-гимназияның мәртебесін өсіріп, ауданның білім көкжиегінің мәртебесін тағы бір мәрте айқындаған Нұрбек Досымхановты шын жүректен құттықтаймыз!
Ұстаз жолы – жеңіс жолы болғай!

Лаура Қарасартова.