Жиын өтті
Жуырда құқық бұзушылықтың алдын алу және сыбайлас жемқорлыққа қарсы іс-қимыл мәселелері жөніндегі ведомствоаралық комиссияның кезекті отырысы өтті. Жиынды аудан әкімінің орынбасары, комиссия төрағасы Кеңес Қабылбеков жүргізіп, қоғамдағы заңдылықты нығайту, қоғамдық қауіпсіздікті қамтамасыз ету және құқық бұзушылықтың алдын алу бағытындағы өзекті мәселелерді ортаға салды. Кеңес Қүнесбайұлы Мемлекет басшысы айқындаған «Заң мен тәртіп» қағидаты бүгінгі мемлекеттік саясаттың негізгі басымдықтарының біріне айналғанын атап өтті. Оның айтуынша, құқықтық тәртіпті сақтау – тек құқық қорғау органдарының ғана емес, барлық мемлекеттік мекемелер мен қоғамның ортақ міндеті. Сондықтан құқық бұзушылықтың алдын алу, азаматтардың қауіпсіздігін қамтамасыз ету, сыбайлас жемқорлық тәуекелдерін азайту және мемлекеттік органдардың жауапкершілігін арттыру бағытындағы жұмыстар жүйелі түрде жалғасуы тиіс. Жиында қоғамдық тәртіпті сақтау, азаматтардың құқықтары мен заңды мүдделерін қорғау, қоғамда заңға құрмет пен құқықтық мәдениетті қалыптастыру мәселелеріне ерекше назар аударылды. Сонымен қатар сыбайлас жемқорлықтың кез келген көрінісіне мүлдем төзбеушілік қағидатын орнықтырудың маңыздылығы айтылып, әрбір мекеменің бұл бағыттағы жұмысына нақты баға беріліп, алдағы міндеттер айқындалды.
Комиссияның күн тәртібінде құқық бұзушылық профилактикасы жөніндегі және сыбайлас жемқорлыққа қарсы іс-қимыл саласындағы бірқатар маңызды мәселелер қаралды.
Алғашқы мәселе бойынша Кеген аудандық полиция бөлімі бастығының орынбасары, полиция майоры Думан Нұрбатырұлы баяндама жасап, мас күйінде жасалатын құқық бұзушылықтардың алдын алу бойынша атқарылып жатқан жұмыстарға тоқталды. Сонымен қатар белгіленбеген уақытта алкоголь өнімдерін сату деректері, заң талаптарының сақталуы және осы бағыттағы профилактикалық шаралар туралы жан-жақты мәлімет берді.
Екінші мәселе аясында қоғамдық құқықтық тәртіпті қамтамасыз ету, вандализмнің, бұзақылықтың, қоғамдық орындарда тиісудің және ұсақ құқық бұзушылықтардың алдын алу бағытындағы жұмыстар талқыланды. Полиция қызметкерлері қоғамдық орындарда заң талаптарын күшейту, тұрғындар арасында түсіндіру жұмыстарын жандандыру және құқық бұзушылыққа «нөлдік төзімділік» қағидатын қалыптастыру қажеттігін атап өтті.
Отырыста 2026 жылдың алғашқы жарты жылдығындағы қылмыстық ахуалға да талдау жасалды. Атап айтқанда, Кеген ауылдық округінде – 11, Жалағаш ауылдық округінде – 4, Алғабас ауылдық округінде – 3 қылмыс тіркелгені хабарланды. Осыған байланысты аталған ауылдық округ әкімдерінің құқық бұзушылықтың алдын алу бағытында атқарған жұмыстары тыңдалып, алдағы кезеңге арналған нақты міндеттер белгіленді. Кеген ауылдық округінің әкімі Ернат Сәмбекұлы Скаков пен Алғабас ауылдық округінің әкімі Сырым Есенханұлы Жексембиев өз округтеріндегі қоғамдық қауіпсіздік пен профилактикалық жұмыстар жөнінде ақпарат берді.
Комиссияның сыбайлас жемқорлыққа қарсы іс-қимыл бөлігінде тұрмыстық қатты қалдықтарды шығару қызметіне белгіленетін тарифтердің ашықтығы мен негізділігін қамтамасыз ету мәселесі қаралды. Бұл бағыт бойынша аудандық тұрғын үй-коммуналдық шаруашылығы және тұрғын үй инспекциясы бөлімінің басшысының міндетін уақытша атқарушы Нұрқасым Нұрман Дәулетжанұлы баяндама жасап, қолданыстағы жұмыстар мен тәуекелдерді азайту шаралары туралы мәлімдеді.
Келесі мәселе ауыл шаруашылығы саласындағы сыбайлас жемқорлық тәуекелдеріне арналды. Аудандық ауыл шаруашылығы бөлімінің басшысының міндетін уақытша атқарушы Ержан Адай Ержанұлы мемлекеттік субсидиялар мен қолдау шараларын бөлудегі ашықтықты қамтамасыз ету, мемлекеттік қызметтердің қолжетімділігі мен заңдылығын сақтау бағытында атқарылып жатқан жұмыстар жөнінде баяндады. Жиын барысында комиссия мүшелері баяндамашыларға сауалдар қойып, құқық бұзушылықтың алдын алу мен сыбайлас жемқорлық тәуекелдерін төмендету бағытындағы жұмысты жетілдіруге қатысты ұсыныстарын білдірді. Барлық мәселелер жан-жақты талқыланып, жауапты мемлекеттік органдарға нақты тапсырмалар жүктелді.
Комиссия отырысының қорытындысында аудан әкімі аппаратының мемлекеттік-құқықтық бөлімінің бас маманы Жанар Мамырбекова қабылданатын шешім жобасымен таныстырды. Талқылаудан кейін комиссия мүшелері шешімді бірауыздан қолдап, оның орындалуын тиісті мемлекеттік органдардың тұрақты бақылауына алу жөнінде шешім қабылдады.
Заң үстемдігін қамтамасыз ету, құқық бұзушылықтың алдын алу және сыбайлас жемқорлыққа қарсы тиімді іс-қимыл жүргізу – қауіпсіз әрі тұрақты қоғам қалыптастырудың басты алғышарты. Бұл бағыттағы жұмыстардың нәтижелі болуы мемлекеттік органдардың ғана емес, әрбір азаматтың заңға құрметпен қарап, қоғамдық жауапкершілікті сезінуіне тікелей байланысты. Ведомствоаралық комиссияның кезекті отырысы осы маңызды міндеттерді іске асыру жолындағы үйлесімді жұмыстың нақты көрінісі болды.
Лаура Қарасартова.
