Жаңа Конституция – жаңарған қоғамның таңдауы
Жаңа Конституция – жаңарған қоғамның таңдауы
Әрбір мемлекеттің даму жолында оның болашағына бағыт-бағдар беретін маңызды кезеңдер болады. Осындай кезеңде қабылданатын шешімдер елдің ертеңіне, халықтың тұрмыс-тіршілігіне және қоғамның қалыптасуына тікелей әсер етеді. Жаңа Конституция туралы айтқанда, мен ең алдымен оның мемлекетіміздің алдағы даму бағытын айқындаудағы маңызына назар аударамын.
Конституция – халықтың ортақ мүддесін тоғыстыратын, мемлекет пен қоғам арасындағы байланысты реттейтін басты құжат. Оның негізгі құндылығы – адамды, оның қадір-қасиетін, құқықтары мен бостандықтарын құрметтеуге негізделуі. Әрбір азамат өзінің құқығы қорғалатынына сенімді болғанда ғана қоғамда тұрақтылық пен өзара сенім қалыптасады.
Бүгінгі қоғам бұрынғыдан әлдеқайда белсенді. Азаматтар елдегі өзгерістерге бейжай қарамайды, өз пікірін білдіріп, қоғамдық мәселелердің шешілуіне атсалысуға ұмтылады. Бұл – оң үрдіс. Себебі мемлекет дамуы тек мемлекеттік органдардың жұмысына ғана емес, әрбір азаматтың белсенділігі мен жауапкершілігіне де байланысты.
Меніңше, жаңа Конституцияның мәнін түсіндіру жұмыстары қағаз жүзіндегі ақпаратпен шектелмеуі керек. Оның әрбір азаматтың күнделікті өмірімен байланысын, құқықтары мен міндеттеріне әсерін қарапайым әрі түсінікті тілде жеткізу маңызды. Әсіресе, жастар арасында құқықтық сауаттылықты арттыруға ерекше көңіл бөлген жөн. Заңды білетін, әділдікті бағалайтын, өзгенің құқығына құрметпен қарайтын ұрпақ – мемлекеттің сенімді тірегі.
Сонымен бірге, Конституцияда айқындалған құндылықтарды отбасы тәрбиесінен бастап, білім беру ұйымдарында, еңбек ұжымдарында және қоғамдық ортада қалыптастыру қажет. Өйткені заңға құрмет алдымен адамның өзінен, оның күнделікті әрекеті мен азаматтық ұстанымынан басталады.
Елдің болашағы – баршамызға ортақ жауапкершілік. Сондықтан жаңа Конституцияны қабылдау немесе оның қағидаттарын жаңарту мәселесіне тек саяси құжат ретінде емес, қоғамның дамуына бағытталған маңызды қадам ретінде қарауымыз керек. Әрбір азаматтың белсенділігі, бірлігі мен ортақ іске деген жауапкершілігі еліміздің өркендеуіне негіз болады.
Конституцияның қадірі – оның мәтінінде ғана емес, өмірде орындалуында. Заң үстемдік құрған, азаматтың құқығы қорғалған, әділдік пен жауапкершілік орныққан қоғамның болашағы әрдайым жарқын болады.
Сембай Мадияр
