Туған жерге ту тіккен
Бала шақтан болашаққа жетуге, ақыл-ой түюге ықпал ететін бірден-бір тұлға-ұстаз. Өскелең ұрпақтың терең білімді, жарқын өмірлі болуына ұстаз мол септігін тигізеді. Ұлағатты ұстаздан шәкірттің қашанда үйренері көп, түйері мол. Сондай ұстаздың бірі-Бекмұрат Әріпжанұлы.
Ол Кеген ауданы, Ақтасты орта мектебінде математика пәнінің мұғалімі болып қызмет етеді. Әріптестерінің арасында сыйлы, оқушыларының сүйікті ұстазына айналған кейіпкеріміз 1981 жылы 12 сәуірде Алматы облысы, Кеген ауданы, Ақтасты ауылында дүниеге келіп, Ақтасты орта мектебінде білім алған. Ұстаз 1999 жылы Абай атындағы мемлекеттік университетінің математика-информатика пәнінің мұғалімі мамандығы бойынша оқуға түсіп, 2003 жылы аталған оқу орнын ойдағыдай аяқтап, жоғары білім алды.
Еңбек жолын 2003 жылы 13 сәуірде Алматы облысы, Түрксіб ауданы, Әлмерек ауылының №25 орта мектебінде математика пәнінің мұғалімі болып бастады. 2003 жылдың 27 тамызында Талды орта мектебіне математика-информатика пәнінің мұғалімі болып жұмысқа қабылданды. 2004 жылы Ақтасты орта мектебінде математика-информатика пәнінің мұғалімі, 2025 жылдың қыркүйегінен осы уақытқа дейін Ақтасты орта мектебінің тәрбие ісі жөніндегі орынбасары болып қызмет атқарады.
Өзінің еңбек жолында білім беру саласына адалдығымен, жауапкершілігімен және оқушыларға сапалы білім беруге деген ізденісімен ерекшеленді. Ұстаздық қызметінде оқушылардың білім сапасын арттыруға, олардың пәнге деген қызығушылығын қалыптастыруға және жан-жақты дамуына өз үлесін қосып келеді. Ауыл балаларына сапалы білім беріп, үздіксіз ізденіп жүрген Бекмұрат Әріпжанұлы педагог-зерттеуші мұғалімдер қатарына қосылды.
-Менің ұстаздық мамандығын таңдаудағы басты мақсатым-ұлтқа қызмет ететін білімді, жаңашыл көзқарастағы ұрпақ тәрбиелеу. Ел болашағының жарқын болуы жас ұрпаққа байланысты десек, ең алдымен балаға сапалы білім беру, оларды жан-жақты етіп тәрбиелеу-біздің міндетіміз,- деген ұстаз бүгінде білім саласында, әсіресе, мектептерде ер мұғалімдердің аз екенін, оқушыларды ұлтжандылыққа, шыдамдылыққа, намысшыл болуға тәрбиелеуде ер-азаматтардың рөлі зор екенін айтады.
Ұстаздық қызметінде жинақтаған тәжірибесін жас мамандармен бөлісіп, білім беру үдерісін жетілдіруге өз үлесін қосып келе жатқан Бекмұрат Әріпжанұлының жұбайы Сәуле Нұрлиханқызы да ұстаздық жолда қызмет етіп келеді. Білімі-жоғары, бастауыш сыныптың мұғалімі. Отбасында бір ұлды тәрбиелеп отырған cүйікті әке. Баласының тәрбиесі мен біліміне көңіл бөлетін азамат.
«Ұстазды алтын діңгекке балар едім»-деп, ұлы ағартушы Ыбырай Алтынсарин айтқандай, ұстаздық-тарихтағы ең ұлы істің бірі. Еткен еңбек еленді. Бекмұрат Әріпжанұлы өскелең ұрпақа сапалы білім мен тәрбие беру ісіне қосқан үлесі үшін аудан әкімінің Алғыс хатымен, Құрмет грамотасымен және облыс әкімінің Құрмет грамотасымен марапатталды.
-Туған жерімде еңбек ету-мен үшін жай ғана қызмет емес. Мен өз еңбегім арқылы ауыл жастарының сапалы білім алуына, болашаққа сеніммен қадам басуына үлес қосуды қалаймын,- дейді ол.
Жауапкершілігі мол қызметте еңбек ететін бүгінгі кейіпкер қызметіне адал, кіндік қаны тамған жерге ту тіккен азамат. Бекмұрат секілді білікті ұстаздар аудандағы білім саласының дамуына өзіндік үлес қосып жүргені анық.
Дәурен ЕРМЕКБАЙ.
