Тазалық – ортақ міндет
Тазалық – ортақ міндет
Кеген ауылында «Таза Қазақстан» республикалық экологиялық акциясы аясында сенбілік өтті. «Таза Қазақстан» республикалық экологиялық акциясы аясында 19 қыркүйек күні Кеген ауылында санитарлық тазалық және абаттандыру жұмыстары ұйымдастырылды. Игі шараның негізгі мақсаты – елді мекеннің тазалығын сақтау, қоғамдық орындарды көркейту және тұрғындардың қоршаған ортаға деген жауапкершілігін арттыру.
Сенбілік барысында Кеген ауылының бірқатар көшелерінде тазалық жұмыстары жүргізілді. Атап айтқанда, Райымбек көшесі бойында Түп көшесіне дейінгі аумақтар, сондай-ақ Түп көшесі мен Өзіңханов көшесінің бойы тазартылды. Бұдан бөлек, Райымбек көшесіндегі спорт мектебіне дейінгі аумақтарға да тазалық жұмыстары жүргізілді.
Шараға аудандық және ауылдық округ әкімдігі аппаратының қызметкерлері, коммуналдық және тиісті мекемелердің ұжымдары, мемлекеттік қызметшілер, жастар мен белсенді тұрғындар атсалысты. Әр мекеме өзіне бекітілген аумақта тазалық жұмыстарын жүргізіп, көше бойларын қоқыстан тазарту, айналаны ретке келтіру және абаттандыру бағытында жұмыстар атқарды. Сенбілік барысында ауданның бірқатар салалық бөлімдері мен мекемелерінің қызметкерлері де белсенділік танытты. Олардың қатарында ауыл шаруашылығы, кәсіпкерлік, экономика және қаржы, сәулет және қала құрылысы, мәдениет, тілдерді дамыту және спорт, жұмыспен қамту және әлеуметтік бағдарламалар, қорғаныс, ветеринариялық бақылау саласының өкілдері бар.
Сонымен қатар аудандық мұражай, кітапхана, орман шаруашылығы, өнер мектебі, архив, аурухана, дене шынықтыру-сауықтыру кешені, мәдениет үйі, «Қарқара» газеті, мансап орталығы және басқа да мекемелер өздеріне бекітілген аумақта тазалық жұмыстарын жүргізді.
«Таза Қазақстан» бастамасының мәні – бір күндік сенбілік өткізумен ғана шектелмей, тазалықты күнделікті өмір салтына айналдыру. Туған жердің көркі мен тазалығы әр азаматтың қоршаған ортаға деген жауапкершілігінен басталады. Көше тазалығы, қоғамдық орындардың ұқыптылығы, жасыл желекке жанашырлықпен қарау – баршаға ортақ міндет. Табиғатты таза сақтау, ауыл көшелерін абаттандыру және тұрғындарға жайлы орта қалыптастыру бағытындағы жұмыстар алдағы уақытта да жалғасын табады.
