Кеген аудандық Аналар кеңесінің төрайымы Бақытгүл Көнеева бастаған ақ жаулықты әжелер дауыс беруге қатысып, азаматтық белсенділіктерін танытты

Кеген ауданында ел болашағына бейжай қарамайтын аға буын өкілдері де сайлау учаскелеріне барып, өз таңдауларын жасады. Кеген аудандық Аналар кеңесінің төрайымы Бақытгүл Көнеева бастаған ақ жаулықты әжелер дауыс беруге қатысып, азаматтық белсенділіктерін танытты.

Ақ жаулықты әжелер үшін сайлауға қатысу – тек дауыс беру ғана емес, елдің ертеңіне деген жауапкершіліктің көрінісі. Ұрпақ тәрбиесіне ұйытқы болып, отбасы мен қоғамның береке-бірлігін нығайтуға үлес қосып жүрген аналар қауымы ел өміріндегі маңызды саяси науқаннан да шет қалған жоқ.

Бақытгүл Көнеева бастаған әжелер дауыс беру учаскесіне көтеріңкі көңіл-күймен келіп, заң талаптарына сәйкес өз таңдауын жасады. Олар сайлау – әр азаматтың конституциялық құқығы әрі ел болашағына ықпал ететін маңызды қоғамдық үдеріс екенін атап өтті.

«Елдің ертеңі – бүгінгі таңдаудан басталады. Біз кейінгі ұрпақтың жарқын болашағын, елдің тыныштығы мен тұрақтылығын тілейміз. Сондықтан әр азамат өз таңдауын жасап, ел өміріне белсенді араласуы қажет», – деген мазмұнда өз ойларын білдірді ақ жаулықты әжелер.

Аналар кеңесі – қоғамдағы татулық пен тұрақтылықты, отбасылық құндылықтар мен ұлттық тәрбиені дәріптеуде маңызды орын алатын қоғамдық құрылым. Әсіресе аға буынның өнегесі кейінгі ұрпаққа үлгі. Олардың сайлауға белсенді қатысуы да жастарды азаматтық жауапкершілікке, елжандылыққа тәрбиелеудің бір көрінісі.