Қарқара төрінде қымыздың қасиеті ұлықталды

Ұлттық дәстүр – ұлттың рухани өзегі. Ал сол дәстүрдің мәйегіне айналған Қымызмұрындық– халқымыздың табиғатпен біте қайнасқан тіршілігін, береке-бірлігі мен дархан көңілін айшықтайтын тағылымы терең мереке. Биыл қасиетті Қарқара жайлауында бесінші рет ұйымдастырылған «Абыз-баба Әлмерек Жаншықұлының 368 жылдығы және Қымызмұрындық– 2026» мәдени-көпшілік, спорттық іс-шарасы ұлттық құндылықтарды ұлықтап қана қоймай, қазақ руханиятының жаңа белесін көрсеткен тағылымды мерекеге айналды.
Жер жәннаты – Жетісудың інжу-маржаны саналатын Қарқара жайлауы ежелден елдің бірлігі мен ерлігінің, тарихы мен тағылымының алтын бесігі болып келеді. Биыл да сайын даланың сәніне айналған осынау көркем өлкеде халқымыздың бай мұрасын жаңғыртқан, ұлттық салт-дәстүрді дәріптеген ауқымды этнофестиваль жоғары деңгейде ұйымдастырылды.

Бірнеше күнге созылған дүбірлі мерекеге Қазақстанның барлық өңірлерінен ғана емес, Түркия, Әзербайжан, Қырғызстан, Өзбекстан, Түрікменстан, Қытай және Қарақалпақстаннан келген қонақтар қатысты.
Қарқараның кең жазирасына 250 киіз үй тігіліп, 130 гектар аумақ тұтас этноауылға айналды. Осынау думанды думанға 35 мыңға жуық адам жиналып, қазақтың қонақжайлығы мен дархан мәдениетінің куәсі болды.
Қымызмұрындық – жай ғана мереке емес. Бұл – ата-бабадан аманат болып жеткен дәстүрдің өміршеңдігін дәлелдейтін, ұлттық болмысымызды айқындайтын ерекше мәдени құбылыс. Жыл сайын ауқымы кеңейіп келе жатқан фестивальдің биыл республикалық маңызы бар мәдени іс-шаралар күнтізбесіне енуі – соның айқын дәлелі. Бұл мерекенің ендігі жерде тек Кеген өңірінің емес, тұтас қазақ елінің брендіне айналып келе жатқанын аңғартады.
Мерекенің шымылдығы қазақы салтқа сай ақ батамен ашылды. Әлмерек Жаншықұлының рухына Құран бағышталып, ас берілді. Бұл – өткенге тағзым, тарихқа құрмет, ұрпақ сабақтастығының жарқын көрінісі болды.
Салтанатты жиынға Қазақстан Республикасы Президентінің кеңесшісі Мәлік Отарбаев пен Алматы облысының әкімі Марат Сұлтанғазиев қатысып, Мемлекет басшысы Қасым-Жомарт Тоқаевтың құттықтауын жеткізді. Құттықтауда ұлттық мұраны сақтау мен жаңғырту– әрбір азаматтың қасиетті борышы екені ерекше атап өтілді.
Расында, қымыз – қазақтың ұлттық сусыны ғана емес, көшпелі өркениеттің символына айналған қасиетті тағам. Оның төңірегінде қалыптасқан дәстүрлер халықтың тұрмыс-тіршілігімен біте қайнасып жатыр. Бүгінде ұлттық сусынды өндіру ісіне жаңа технологиялардың енгізілуі, оның халықаралық нарыққа шығуы – дәстүр мен заманауи дамудың сабақтастығын көрсетеді.
Этноауылға бас сұққан әрбір жан қазақтың ғасырлар бойы қалыптасқан мәдениетімен етене танысты. Киіз үйлерде халқымыздың тұрмыс-тіршілігінен сыр шертетін жәдігерлер қойылып, қолөнер шеберлерінің бұйымдары, суретшілердің еңбектері, ұлттық тағамдар, ауыл шаруашылығы өнімдері мен заманауи техникалар көпшілік назарына ұсынылды. Әрбір көрме өткен мен бүгіннің арасындағы алтын көпір іспетті әсер қалдырды.

Әсіресе, ұлттық салт-дәстүрге арналған көріністер мен тарихи жәдігерлер жастардың қызығушылығын арттырып, ұлттық құндылықтардың өміршеңдігін тағы бір мәрте дәлелдеді. Қазіргі жаһандану дәуірінде мұндай шаралардың тәрбиелік мәні ерекше екені анық.
Фестивальдің ең әсерлі тұстарының бірі – ұлттық спорт түрлерінен ұйымдастырылған жарыстар болды. Мыңжылқы атшабарында өткен аламан бәйге, топ бәйге және құнан бәйге көрермендердің ерекше қызығушылығын тудырды. Қазақстанның түкпір-түкпірінен және Қырғыз Республикасынан келген екі жүзге жуық шабандоз жүйрік аттарын додаға қосып, шынайы тартыс көрсетті. Фестивальдің сәнін келтірген ерекше көріністердің бірі – Қарқараның сайын даласында ұйымдастырылған «Мыңжылқы» шеруі болды. Қаз-қатар тізілген мыңға жуық жылқы кең жазираны дүбірге бөлеп, көрермендердің алдында салтанатты түрде жүріп өтті. Көкжиекпен астасқан Қарқара төрінде құлындай ойнаған, жал-құйрығы желбіреген тұлпарлардың көрінісі көпшіліктің көңілінде ұмытылмас әсер қалдырды. Бұл тек көркем көрініс қана емес, жылқыны жеті қазынаның бірі деп қадірлеген қазақ халқының көшпелі өркениетін, ұлттық рухы мен жылқы мәдениетінің өміршеңдігін айшықтаған тағылымды сәт болды. Көрермендер ұзақ уақыт қол соғып, тарихи көріністі ерекше ықыласпен тамашалады.
Аламан бәйгеде Жамбыл облысының Қордай ауданынан келген «Айтолқын» тұлпары мәреге бірінші жетіп, бас жүлде– «JETOUR» автокөлігін жеңіп алды. Өзге бәйгелерде де еліміздің әр өңірінен келген шабандоздар жоғары шеберлік танытып, ұлттық ат спортының деңгейі жылдан-жылға өсіп келе жатқанын дәлелдеді.
Ұлттық спорттың сәнін кіргізген қазақ күресі де көрерменнің ерекше ықыласына бөленді. Елдің әр аймағынан келген түйе палуандар боз кілемде белдесіп, бас жүлдеге тігілген автокөлік үшін бақ сынады. Сонымен қатар алыптар сайысы, қошқар көтеру, қой көтеру, теңге ілу, асық ату сынды ұлттық ойындар нағыз күш пен ептіліктің мерекесіне айналды.
Мәдени бағдарламаның мазмұны да ерекше болды. Қарқара төрінде Астана жастар театрының қойылымдары көрсетіліп, белгілі дәстүрлі әнші Рамазан Стамғазиев, «МұзART», «Меломен», «Алатау серілері», «Алаш ұлдары», Өмірқұл Айниязов және басқа да танымал өнерпаздар сахна төрінен ән шашуын арнады.

Сүйінбай атындағы облыстық филармония әртістері мен жергілікті өнер ұжымдарының өнері ұлттық мерекенің ажарын аша түсті.
Балалар үшін де арнайы ойын алаңдары ұйымдастырылып, қуыршақ театры, сурет салу, қолөнер үйірмелері, шахмат пен тоғызқұмалақ жарыстары өткізілді. Ал мың литр қымыздың тегін таратылуы мерекенің басты сәніне айналып, қонақтарға ұлттық дәмнен ауыз тиюге мүмкіндік берді.
Қымызмұрындықтың тағы бір ерекшелігі – оның өңір туризмін дамытудағы маңызы.
Соңғы жылдары Қарқара жайлауы, Көлсай мен Қайыңды көлдері, Шарын шатқалы, Хантәңірі баурайы әлем саяхатшыларының қызығушылығын тудырып келеді. Осындай ұлттық мерекелер өңірдің туристік әлеуетін арттырып, қазақ мәдениетін халықаралық деңгейде танытуға жол ашуда.
Қарқарадағы Қымызмұрындық тағы бір мәрте қазақ халқының бай мәдениеті мен салт-дәстүрінің өміршең екенін дәлелдеді. Бұл – өткенді дәріптеп қана қоймай, болашаққа бағдар беретін рухани мектеп. Ұлттық құндылықты ұлықтаған осындай игі бастамалар ұрпақ санасына елдік рух пен туған жерге деген сүйіспеншілікті сіңіріп, халқымыздың бірлігі мен ынтымағын нығайта беретіні сөзсіз.
Қымыздың қасиеті, Қарқараның көркі, қазақтың дархан көңілі тоғысқан бұл мереке халық жадында ұзақ сақталатын тағылымды күндердің біріне айналды. Осындай рухани құндылықтарды ұлықтайтын шаралар көбейген сайын ұлттық болмысымыздың тамыры тереңдеп, келешек ұрпақтың ел тарихына деген құрметі арта түсетіні анық.