Іле ауданында ата-аналарға арналған форум өтеді
Іле ауданында ата-аналарға арналған форум өтеді
Қазіргі қоғамда бала тәрбиесі, жасөспірімдердің психологиялық жағдайы және ата-ана мен бала арасындағы сенімді қарым-қатынасты қалыптастыру мәселелері ерекше маңызға ие. Баланың жан дүниесін түсіну, оның көңіл күйіндегі өзгерістерді дер кезінде байқау және қиын сәтте қолдау көрсету – әрбір ата-ананың басты міндеттерінің бірі.
Осы өзекті мәселелерді талқылау мақсатында 2 қараша күні Іле ауданының Өтеген батыр ауылындағы Мәдениет үйінде «QASYNDAMYN» форумы өтеді.
Форумның басты спикері – гештальт-психолог, бала тәрбиесі мен ата-ана және бала арасындағы қарым-қатынас мәселелері бойынша 12 жылдан астам тәжірибесі бар Лейла Мирас. Ол жасөспірімдермен жұмыс істеп, өмірлік қиындықтарға тап болған балаларға психологиялық қолдау көрсетіп келеді.
Кездесу барысында жасөспірімдердің психологиялық жағдайы, олардың ішкі күйзелістері, не себепті тұйықталып қалатыны және мінез-құлқындағы өзгерістерді қалай байқауға болатыны талқыланады. Сонымен қатар ата-ананың балаға дұрыс қолдау көрсетуі, оның сенімін жоғалтпау және отбасындағы ашық қарым-қатынасты нығайту жолдары қарастырылады.
«Баламызды қалай тыңдай аламыз? Оның сенімін қалай сақтаймыз? Жасөспірім қиындыққа тап болғанда оған қалай көмектесеміз?» Бұл – бүгінгі ата-аналарды толғандыратын маңызды сұрақтар.
Балаға қамқорлық жасау оның күнделікті қажеттіліктерін қамтамасыз етумен ғана шектелмейді. Оның сезімін түсіну, ойын ашық айтуына мүмкіндік беру, пікіріне құрметпен қарау және қандай жағдай болмасын қолдауға дайын екенімізді сезіндіру де маңызды. Өйткені ата-ананың түсіністігі мен қолдауы баланың өзіне деген сенімін нығайтып, қиындықтарды еңсеруіне көмектеседі.
«QASYNDAMYN» форумы ата-аналарға бала тәрбиесіндегі өзекті мәселелерді талқылауға, маманның тәжірибесіне негізделген кеңестер алуға және отбасындағы өзара түсіністікті нығайту жолдарын қарастыруға мүмкіндік береді.
Ұрпақ тәрбиесі – баршамызға ортақ жауапкершілік. Баланың жан дүниесіне үңіліп, оны тыңдай білу және дер кезінде қолдау көрсету – жарқын болашақтың негізі.
Форум 2 қараша күні сағат 10:00-де Іле ауданы, Өтеген батыр ауылындағы Мәдениет үйінде өтеді. Барша аналарды маңызды кездесуге қатысуға шақырамыз!
