Мереке құтты болсын!
Жуырда медицина қызметкерлері күніне орай аудандық мәдениет үйінде мерекелік шара өтті. Аудан әкімі Нұрбақыт Молдахметұлы барша медицина қызметкерлерін мерекемен құттықтап, еңбектеріне табыс, отбасына амандық тіледі. Аудандық аурухананың басшысы Алмас Тлеулиев баяндама жасап, әріптестеріне ізгі тілегін білдірді.
Ақ халатты абзал жан – саналатын денсаулықтың сақшысы дәрігерлер мен медбикелердің орасан еңбегі еленіп бір топ медицина қызметкерлері мереке қарсаңында аудан әкімінің Құрмет грамотасы мен Алғыс хаттармен лайықты марапатталды. «Денсаулық сақтау ісінің үздігі» төсбелгісімен балаларды оңалту орталығының бөлім меңгерушісі, реабилитолог- дәрігер Жұмагүл Алпысбайқызы марапатталса, «Сенім» денсаулық сақтау жүйесі жұмыскерлерінің салалық кәсіптік одағы Республикалық қоғамдық бірлестігінің Үздік төсбелгісімен Балтабаев Нұрболат марапатталды. «Сенім» Қазақстандық салалық денсаулық сақтау қызметкерлері кәсіподағының «Еңбек адамы» төс белгісімен емхана бөлімінің мейірбикесі Жетібаева Гүлнара марапатталса, «Кәсіподаққа сіңірген еңбегі үшін» белгісімен Шырғанақ дәрігерлік амбулаториясының аға мейірбикесі Мусекеева Фарида марапатталды.
Бүгінгі таңда елімізде көлемді реформалар жүзеге асуды. Оның ішінде денсаулық сақтау жүйесін модернизациялау маңызды рөлге ие. Мемлекет басшысы отандық медицина алдына үлкен әрі жауапты міндеттер қойып отыр. Қазақстандық медицина қызмерткерлері жаңа технологияларды диагностикалау мен емдеудің инновациялық әдістерін игеруде.
Аудан бойынша бүгінгі таңда 55 дәрігер, 227 орта буын және 74 кіші буын медицина қызметкерлері аудан халқының денсаулығы жолында еңбек етуде. Аудан бойынша тәуліктік стационарда 130 төсек орынмен қамтамасыз етілген. Емхана ғимаратында балаларға арналған медициналық оңалту орталығы «Қазақстан халқына» Қамқорлық қоры жұмыс істеуде.
Адам жанының арашасысы болған, денсаулықтың сақшысы, мейірбан жүректі ақ халатты абзал жан саналатын дәрігер мамандығын халқымыз ежелден қастерлеп, құрметтеген. Сан ғасырлық тарихы бар медицина саласы күн санап заман ағымына сай шарықтап келеді. Күн демей, түн демей ерлікке пара-пар еңбек үдерісінде сап түзеп, халық денсаулығы жолында тізе бүгусіз тер төгіп келе жатқан ақ желеңді дәрігерлердің ерен ерліктерін халық жақсы біледі. Әрине, бұл қағидаттың бәрі де дерлік маңдай тер мен өлшеусіз еңбектің күші. Қашан да ел денсаулығы жолында жан аямай тер төккен сіздердің ақ адал маңдай терлеріңіз ешқашан да ұмыт қалған емес. Елдікті, бірлікті бекемдеген алмағайып заманда да дәрігердің емдеу ісі өз биігінен аласармаған. Бүгінгі таңда Қазақстандықтардың денсаулығын жақсарту – еліміздің мемлекеттік саясатының басым бағыттарының бірі. Елімізде денсаулық саласын дамыту, тұрғындарға заман талабына сай, қолжетімді және сапалы медициналық қызмет көрсету жолында бар мүмкіндіктер жасалуда.
Құрметті медицина қызметкерлері! Жауапкершілігі жоғары ерен еңбектеріңізге, шипалы алақандарыңызға, мейірімді жүректеріңізге алғысымыз шексіз. Тынымсыз атқарып отырған еңбектеріңіз халыққа қуаныш сыйлап, өздеріңізді нұрға бөлесін! Сіздерді төл мерекелеріңізбен тағы да құттықтай отырып, отбасыларыңызға амандық, дендеріңізге саулық, күш – жігер, баянды бақыт пен жаңа табыстар тілеймін! Кәсіби біліктіліктеріңіздің арқасында биік асуларды бағындырып, ел алғысын арқалап, мәртебелеріңіз асқақтай беруіне шын жүректен тілектеспін!
Салтанатты шара соңы мәдениет үйі өнарпаздарының концерттік бағдарламасына ұласты.
Лаура Мұхаметқали, Суреттерді түсірген: Мира МУРАТАЛИЕВА, «Қарқара» газеті.
