Баба рухы – спорт алаңында
Баба рухы – спорт алаңында
Елінің бірлігі мен болашағы үшін тер төккен батыр, шешен, қолбасшы, абыз — Әлмерек бабаға тағзым ретінде республикалық деңгейде Алматы қаласындағы №200 мектеп-гимназиясында волейбол турнирі өтті. Салтанатты ашылу рәсімінде Әнұран айтылып, Әлмерек абызға арналған әнмен жалғасын тапты. Елдік пен ерлікті дәріптеген бұл игі шараны «Желтоқсан ақиқаты» Республикалық қоғамдық бірлестігі мен «Әлмерек» мәдени тарихи қоры» қоғамдық қоры және Әлмерек бабаның ұрпақтары бірлесіп ұйымдастырды.
Ауқымды спорттық додаға еліміздің әр өңірінен жиналған 10-нан астам команда қатысып, тартысты әрі жоғары деңгейдегі ойын көрсетті. Турнирдің басты мақсаты — салауатты өмір салтын насихаттау, жастар арасында спортқа қызығушылықты арттыру, әрі ұлт тарихында ерекше орны бар Әлмерек баба сынды тұлғалардың өнегелі жолын ұлықтау.
Ұйымдастырушыларға Алматы қаласы Наурызбай ауданы әкімінің, «Әлмерек» мәдени-тарихи қоры» Қоғамдық қорының және Патриоттық қозғалыс «Желтоқсан ақиқаты» Республикалық қоғамдық бірлестігінің алғыс хаттары табысталды. Әлмерек абыздың рухына құран бағышталып, ас берілді. Турнирге Алматы облысының Кеген және Райымбек аудандарынан, сондай-ақ Ауған соғысы мен Желтоқсан көтерілісінің ардагерлерінен құралған командалар қатысты.
Әр доп үшін талас, әр ұпай үшін жан алысып, жан берісу – бәрі де нағыз спорттың, нағыз жігердің көрінісі болды. Қызу тартыс нәтижесінде Наурызбай ауданының Желтоқсан ардагерлері жеңімпаз атанды. Бостандық ауданының Желтоқсан ардагерлері 2-ші орынды иеленсе, Жетісу ауданының Желтоқсан ардагерлері 3-ші орынға тұрақтады. Алатау ауданының Желтоқсан ардагерлері 4-ші орынды қанағат тұтты. Жеңімпаздарға Әлмерек абыз ұрпақтары атынан қаржылай сыйлықтар, кубоктар мен медальдар табыс етілді.
Осы игі шараны ұйымдастыруға атсалысқан патриоттық қозғалыс «Желтоқсан ақиқаты» Республикалық қоғамдық бірлестігінің Төрағасы Болат Құрымбаевқа, Төраға орынбасары Серік Жиенбаевқа, Алматы қалалық филиалы Бостандық аудандық бөлімшесі жетекшісінің орынбасары Ұлан Сәлімовке және Әлмерек абыз ұрпағы Ербол Байқашовқа алғыс білдіреміз. Бұл игі бастама – өткен тарих пен бүгінгінің арасын жалғап, ел бірлігі мен ұрпақ сабақтастығын нығайтатын маңызы зор шара. Ұйымдастырушылар мұндай рухани – спорттық шаралар алдағы уақытта дәстүрлі түрде жалғасын табатынын жеткізді. Әлмерек баба – қазақ тарихындағы көреген көсем, кемеңгер шешен, жауға қарсы қылыш сермеген баһадүр тұлға екені турнир барысында баяндалды. Осындай ел ардақтыларының есімін ұрпақ жадында жаңғырту — бүгінгі буынның парызы. Ең бастысы – баба есімі ұлықталып, жас ұрпақтың жүрегіне елдік рух дарыды. Осындау рухты шаралар ел болашығының темірқазығы жастарға бағыт бағдавр береді. Әлмерек баба сынды ел ардақтыларының өнегелі жолы, күрескер рухы бүгінгі ұрпаққа үлгі, ал болашақққа аманат!
Журналист Салтанат Әуелханқызы
