Саусағынан өнер тамған Ұстаз
Бөлексаз орта мектебінде 2018 жылдан бастап 7 жылдық педагогикалық өтілімен еңбек етіп келе жатқан ұстаз, ауылымыздың үлгілі келіні Жиенбаева Жазира Дәулетбекқызы жайлы сыр бөліскіміз келіп отыр.
Жиенбаева Жазира 29 қазан 1988 жылы Алматы облысы Панфилов ауданы Ақжазық ауылында дүние есігін ашқан. Қарапайым отбасында дүниеге келді. Әкесі Жиенбаев Дәулетбек Жамбыл ауданы Мыңбаев ауылында Мәдениет үйінде күзетші, анасы Ұлжан қалалық ауруханада мейірбике. Жазира үйдегі 3 баланың ортаншысы. Өзінен үлкен ағасы мен өзінен кейін сіңлісі бар. 1993 жылы мектеп табалдырығын аттап 2003 жылы Жамбыл орта мектебінің 10 жылдығын тәмамдайды. Сол жылы Талдықорған кәсіптік колледжіне оқуға түседі. 2007 жылы колледжді «Суретші, көркемдеу жұмыстарын жасаушы» мамандығымен бітіріп шығады. Жоғары оқу орнына құжаттарын тапсырып, 2007-2012 жылдары Абай атындағы Қазақ Ұлттық педагогикалық университетіне түсіп, «Бейнелеу және сызу» мамандығы бойынша диплом алып шығады. Диплом алған жылы өзімен бірге оқыған қазіргі өмірлік жары Жетпісбаев Ернатпен отау құрып, Бөлексаз ауылына келін болып түседі. Ернат пен Жазирадай өнерлі отбасында алланың берген алтындай 1 қыз бен 4 ұлы өсіп жатыр. Атасы Жетпісбаев Жұмаш ата мен енесі Ашимова Кеуерхан апаның қолына түскен Жазира жақсы келін бола білді. Кеуерхан апа да немерелерінің бәрін өзі бағып, өсіріп, мектеп қабырғасына жетелеп берді. Өмірлік жары Ернат Жетпісбаев та суретші, әнші, тамада, ақындығыда бар, қолынан бәрі келеді, сегіз қырлы бір сырлы жігіт, Кеген ауылында Өнер мектебінде сурет пәнінің мұғалімі.
Жиенбаева Жазира мектепте үйірме жұмысында оқушылармен қуыршақтарды қолмен жасап, балабақша тәрбиеленушілеріне қуыршақ театрын ұйымдастырып, ертегілерге саяхат жасап, балалардың танымын дамытуға өз үлесін қосып жүр. Мектептегі қоғамдық жұмысы еңбек және экология фракциясының жетекшісі.
Жиенбаева Жазира көптеген алғыс хаттармен, грамоталармен мадақталды. Атап айтқанда, 2019 жылы Аудан әкімінің Құрмет грамотасы марапатталды.
Оқушысы Мұрат Айданаға «Қолөнер» шеберлерінің сайысына белсенді қатысқаны үшін «Нұр Отан» партиясынан алғыс хат. «Дарын» республикалық ғылыми-практикалық орталығының ұйымдастыруымен 1-7 сынып оқушыларының зерттеу жобалары мен шығармашылық жұмыстарының «Зерде» ХІҮ республикалық конкурсында оқушысы Мұрат Айдана ІІІ дәрежелі дипломмен және сертификатпен марапатталды.
«ZIATKER.KZ» республикалық ғылыми-әдістемелік орталығының ұйымдастыруымен өткен Көркем еңбек пәнінен /қыздар арасында/ оқушылар арасындағы олимпиададан оқушысы Ернатқызы Айкөркем ІІІ дәрежелі дипломмен марапатталды.
Алаш партиясының құрылғанына 100 толуына аясында ұлттық салт-дәстүрімізді, әдет-ғұрпымызды кейінгі ұрпаққа дәріптеу, әдепті, ибалы келіндер тәрбиелеу, баулу мақсатында Бөлексаз ауылында өткізілген «Ақ келін» келіндер байқауынан үздік өнер көрсетіп, 1 дәрежелі дипломмен марапатталды.
8 наурыз-Халықаралық әйелдер күніне орай ұйымдастырылған «Үлгілі келін-2024» аудандық байқауында бас жүлдеге ие болып дипломмен марапатталып, ауылымыздың мәртебесін көтерді.
«Алматы облысы ішкі саясат басқармасы» мемлекеттік мекемесінің «Қоғамдық келісім және даму орталығы» коммуналдық мемлекеттік мекемесінің ұйымдастыруымен Қазақстан халқы Ассамблеясы жанындағы Аналар кеңесінің «Өнегелі келін-өрісің» атты келіндер байқауында жоғары нәтиже көрсетіп, 1 дәрежелі дипломмен және де 250 мың сертификатпен марапатталды.
Ұлы дана Абай атамыз айтқандай, «Ақырын жүріп, анық бас, еңбегің кетпес далаға» дегендей, осы Жазираға айтылғандай. Сабырлы біртоға мінезімен, қарапайым, көп сөйлемейді, үндемей жүріп, тек ісімен ғана өзінін шеберлігін елге таныта білді.
Аудандық аналар кеңесі төрайымы Көнеева Бақытгүл, ауылдың аналар кенесі Акимжанова Гүлнар, Алия Халелқызы басқарған мектеп ұжымы, ауыл көшесінің төрайымдары, барлық атсалысқан ауыл, аудан азаматтарының қолдауымен және де өзінің еңбегінің арқасында осындай жетістікке жетіп, биіктен көрінді.
Жазираға да әлі де алар асуың мол болуына, Ернат екеуінің биік шыңдарға бірге самғауға, балапандарыңды қанаттандырып ұшыруға ниет білдіреміз! Творчестволық табыс көп болсын!
Толқын Мукашева
Бөлексаз мектебінің орыс тілі мұғалімі.
